जिल्ला प्रहरीमा पुस्तकालय- गण्डकी - कान्तिपुर समाचार
कान्तिपुर वेबसाईट
AdvertisementAdvertisement

जिल्ला प्रहरीमा पुस्तकालय

कान्तिपुर संवाददाता

पोखरा — जिल्ला प्रहरी कार्यालय कास्कीले कार्यालयभित्र पुस्तकालय सञ्चालनमा ल्याएको छ । विशेषगरी प्रहरी कर्मचारी र बाहिरका व्यक्तिहरूलाई पनि लक्षित गर्दै पुस्तकालय सञ्चालनमा ल्याइएको प्रहरीले जनाएको छ ।

अहिले समुदाय प्रहरी साझेदारी कार्यक्रम अन्तर्गत समुदायसँग विभिन्न कार्यक्रम गर्दै आएको प्रहरीले बौद्धिक क्षेत्रसँग पनि अन्तरक्रिया, भेटघाट गर्ने थलोको रुपमा पुस्ताकालयलाई विकास गर्ने बताएको छ ।

जिल्ला प्रहरी कार्यालयका प्रवक्ता डीएसपी सुन्दर तिवारीका अनुसार पुस्तकालयमा कानुन, मानवअधिकार, अपराध अनुसन्धान, प्रहरीका विभिन्न मोडल तथा ज्ञानसँग सम्बन्धित पुस्तक रहेका छन् ।

‘हिरासतमा रहेका थुनुवाले पनि पढ्न मिल्ने पुस्तक राखेर पढ्न दिइनेछ,’ उनले भने, ‘पुस्तक जम्मा गर्ने अभियान सुरु गरेका छौं ।’ द लाईब्रेरी क्याफे नाम दिइएको पुस्तकालयको कास्कीका प्रमुख जिल्ला अधिकारी जयनारायण आचार्यले सोमबार उद्घाटन गर्दै जिल्ला प्रहरी कार्यालय हातामा प्रवेश गर्ने सबैका लागि पुस्तकालय सिकाइको नयाँ स्रोत बन्ने विश्वास व्यक्त गरे ।

गण्डकी प्रदेश प्रहरी कार्यालयका निमित्त प्रमुख प्रहरी वरिष्ठ उपरीक्षक कृष्णहरी शर्माले पुस्तकालय नयाँ अभ्यास भएको र यसले प्रहरीलाई आफ्नो काममा थप दक्ष बनाउने बताए । कास्की प्रहरी प्रमुख उपरीक्षक रमेश थापाले सिक्ने चाहना भएका व्यक्तिलाई पुस्तकालय सञ्चालनमा ल्याएर सिकाइमा सहजीकरण गरिएको बताए । पुस्तकालय बिहान ७ देखि साँझ ७ बजेसम्म खुला रहने प्रहरीले जनाएको छ ।

प्रकाशित : असार १४, २०७९ १६:३६
प्रतिक्रिया
पठाउनुहोस्

प्रमुख प्रशासकीय अधिकृतसहित पाँच जनाविरुद्ध भ्रष्टाचार मुद्दा

कान्तिपुर संवाददाता

काठमाडौँ — सडक निर्माणमा अनियमितता गरेको आरोपमा रुपन्देहीको ओमसतिया गाउँपालिकाका प्रमुख प्रशासकीय अधिकृतसहित पाँच जनाविरुद्ध अख्तियार दुरुपयोग अनुसन्धान आयोगले भ्रष्टाचार मुद्दा दायर गरेको छ ।

ओमसतिया गाउँपालिका वडा नम्बर ४ मटेरिया गाउँको मुख्य सडक निर्माण गर्दा गुणस्तरहीन काम गरेको आरोपमा अख्तियारले तत्कालीन प्रमुख प्रशासकीय अधिकृत राजु नेपाल, इन्जिनियर लवकुश चाई र सब इन्जिनियर सन्तोष भुसाल तथा सडक निर्माण उपभोक्ता समिति अध्यक्ष गजतराज यादव र सचिव धर्मराज खरविन्दविरुद्ध बिगो, कैद र जरिवाना तथा अनियमितता भएको रकम आरोपितबाट भराउनु पर्ने मागदाबीसहित विशेष अदालतमा मुद्दा दायर गरेको हो ।

अख्तियारका सहायक प्रवक्ता वेदप्रसाद भण्डारीका अनुसार सडकको पीसीसी निर्माण गर्दा गुणस्तरहिन काम गरेको, लागत अनुमान अनुसार सडकको ढलानमा मोटाइ कायम नगरिएको, नापी किताब र बिलमा एउटा विवरण राखेर फिल्डमा अर्कै काम गरेकोलगायत आरोपमा प्रमुख प्रशासकीय अधिकृतसहित पाँचै जनालाई जनही २ लाख ६१ हजार ८ सय ५५ रुपैया बिगो, बिगो अनुसार जरिवाना मागदाबीसहित मुद्दा दायर गरिएको छ ।

हानीनोक्सानी भएको रकम प्रशासकीय अधिकृत नेपाल तथा इन्जिनियर चाई र सब-इन्जिनियर भुसालबाट असुल गरी राजस्वमा दाखिला गर्न मागदाबट्ठ गरिएको छ ।

प्रकाशित : असार १४, २०७९ १६:२९
पूरा पढ्नुहोस्
प्रतिक्रिया
पठाउनुहोस्
×