आयोजना नसकी भुक्तानी- गण्डकी - कान्तिपुर समाचार
कान्तिपुर वेबसाईट
AdvertisementAdvertisement

आयोजना नसकी भुक्तानी

कान्तिपुर संवाददाता

म्याग्दी — बेनी नगरपालिकाको अभिलेखमा वडा–३ भकिम्लीको चिनाखेतका ७६ घरमा मिटर जडित खानेपानी पुगेको उल्लेख छ । ‘एक घर एक धारा कार्यक्रम’ अन्तर्गत कागजमा योजना सम्पन्न भएको जनाइए पनि घरहरूमा धारा भने जोडिएको छैन ।

पालिकाले गत आव ०७७/७८ मा विनियोजन गरेको ७० लाख बजेटबाट गत असार मसान्तभित्र खानेपानी योजना निर्माण सक्ने लक्ष्य लिएको थियो । जसअनुसार सुन्दर निर्माण सेवा पोखराले ५८ लाख रुपैयाँमा चिनाखेत खानेपानी योजनाको ठेक्का पाएको हो । तर, सम्झौताअनुसार पूरै संरचना निर्माण नगरी र घरघरमा धारा पनि नबनाई ठेकेदार फर्केपछि योजना अलपत्र परेको छ । पालिकाले अधुरो योजनालाई कार्यसम्पन्न भनी भुक्तानी गरेपछि स्थानीय आक्रोशित छन् ।

‘मुहानको पानी रिजर्भवेयर ट्यांकीमा खसेको छैन । इन्टेक बनेको पनि छैन । वितरण लाइनबाट घरघरमा पानी जोड्ने आरबिटी हिलोमा पुरिएका छन्,’ स्थानीय दीपक पुनले भने, ‘धारामा कहिले पानी आउँछ ? काम सम्पन्न नभई ठेकेदारलाई भुक्तानी किन दिइयो ? काम सम्पन्न भएको प्रतिवेदन कसरी बनाइयो ?’

सम्झौतामा ३ घेराबारसहित इन्टेक, २० घनमिटर क्षमताका २ फेरोसिमेन्ट ट्यांकी, डिस्ट्रिब्युसन च्याम्बर १४ वटा, कलेक्सन ट्यांकी १ वटा, ब्रेक च्याम्बर २ वटा, ३ किलोमिटर मुख्य पाइपलाइन, ९ किलोमिटर लामो वितरण लाइन बनाउने उल्लेख छ । यसैगरी, घरघरमा कनेक्सन फिटिङ (पाइप, मिटर, धारा) आदि बनाई माझखर्क ठूलाछहरा मुहानको पानी धारामा झार्ने योजना थियो । ठेकेदारले एउटा इन्टेक र दुवै ब्रेक च्याम्बर बनाएको छैन । सबै ७६ घरमा पानीको धारा निर्माण भएको छैन ।

ठेकेदार कम्पनीले निर्माण नभएको इन्टेक र ब्रेक च्याम्बरको रकम कटाएर पालिकाबाट कन्टेन्जेन्सी पनि कटाई ५१ लाख ५४ हजार ४० रुपैयाँ भुक्तानी लिएको छ । पालिकाले भने डिजाइन, लागत अनुमान र सम्झौताअनुसार कामको मूल्यांकनका आधारमा भुक्तानी दिएको दाबी गरेको छ । ‘व्यवसायीले ढिलासुस्ती र केही लापरबाही गरेका पक्कै हुन्, पूर्णरुपमा दोषी होइनन्,’ पालिकाका असिस्टेन्ट सबइन्जिनियर चन्द्रबहादुर थापाले भने, ‘सबै काम प्रक्रियागत र कानुनसम्मत भएका छन् ।’

प्रकाशित : असार ८, २०७९ ०९:१८
प्रतिक्रिया
पठाउनुहोस्

मासिएको कुलो सफा गर्दै जनप्रतिनिधि

चन्द्रपुरको टेकान र चिडियादह हुँदै दक्षिण भेगमा निर्माण भएका एक सयभन्दा बढी कुलो मासेर बाटो
शिव पुरी

रौतहट — प्लटिङले मासिएको कुलो जनप्रतिनिधिले फेरि बनाउन थालेका छन् । चन्द्रपुर नगरपालिकामा पुरिँदै गएका र मासिएका कुलो फेरि बनाउन थालिएको हो ।

चन्द्रपुर नगरपालिका, ५, ६, ८ र ९ नम्बर वडामा प्लटिङ र केही किसानले नै पुरानो कुलो मासेका थिए । नगरपालिकाका कार्यपालिका सदस्य नेत्र कुशवारले पुराना मासिएका र पुरिएका कुलो धमाधम सफा गर्ने काम भइरहेको बताए । ‘चुरेदेखिको पानी कुलो हुँदै किसानको खेतमा पुग्थ्यो,’ उनले भने, ‘कुलो मासिएपछि बर्खाको बेला निकास नभएर पानी जति सडकमा आउन थाल्यो । त्यसैले कुलो सफा गर्न थालेका छौं ।’ केही समयअघि वडा नम्बर ८ स्थित घोडदेवी मन्दिर छेउमा कुलो मासेर ह्युमपाइप राखेर बाटो बनाउन लाग्दा स्थानीयले भत्काइदिएका थिए ।

कुलोको माध्यमबाट किसानको खेतमा पानी लाग्ने गरेकामा मासेपछि समस्या हुने भन्दै नगरपालिकाको ध्यानाकर्षण गराएका थिए । तर बेवास्ता भएपछि प्लटिङको नाममा कुलो मास्ने काम भएको किसानको भनाइ छ । यस क्षेत्रमा चार दशक पुराना कुलो र पैनी छन् । ती सबै मासिएपछि किसानले बोरिङ, पम्पसेटको माध्यमबाट सिँचाइ गर्न थालेका हुन् ।

चन्द्रपुर–६ स्थित झनझने टोलमा चार दशक पुरानो कुलो मासिएको छ । अहिले वडा अध्यक्ष सहदेव केसी आफैं जेसीबी लगाएर कुलो खन्न र सफा गर्न थालेका छन् । नापी कार्यालयमा नक्सा पास भएका कुलोसमेत मासिएका छन् । प्लटिङ व्यवसायीले कुलो मासेर बाटो बनाइसकेका छन् । नापी कार्यालय चन्द्रपुरका प्रमुख सबिक विकले नक्सामा पैनी, कुलो कायमै रहे पनि धेरै ठाउँमा मासेको गुनासो आएको बताए । ‘नगरपालिकाबाट नाप्न पत्र आयो भने हामीले तत्कालै त्यस्ता ठाउँमा गएर कुलो यकिन गर्न सक्छौं,’ उनले भने, ‘सार्वजनिक कुलोहरू संरक्षण गर्ने दायित्व नगरपालिकाको पनि हो ।’

चन्द्रपुरको टेकान र चिडियादह हुँदै दक्षिण भेगमा निर्माण भएका एक सयभन्दा बढी सार्वजनिक कुलो, पैनी प्लटिङको नाममा मासेर बाटो बनाइएको छ ।

नापी कार्यालयको नक्सामा उल्लेख भए पनि अहिले मासेर प्लटिङ व्यवसायीले धमाधम बाटो बनाएर जग्गा बिक्री गरिरहेका छन् । नगर प्रमुख सञ्जय काफ्लेले कुलो मास्न नदिने बताए । ‘पहिला जे भयो थाहा छैन । अब कुलो–पैनी मास्न दिँदैनौं,’ उनले भने, ‘कुलो, पैनी किसानको लाइफलाइन हो । यसको संरक्षण गर्नुपर्छ ।’

प्रकाशित : असार ८, २०७९ ०९:१४
पूरा पढ्नुहोस्
प्रतिक्रिया
पठाउनुहोस्
×