लमजुङमा आइतबार पनि पढाइ- गण्डकी - कान्तिपुर समाचार
कान्तिपुर वेबसाईट
AdvertisementAdvertisement

लमजुङमा आइतबार पनि पढाइ

आश गुरुङ

लमजुङ — बेंसीसहर नगरपालिका–३ बाहुनबेंसीस्थित यशोब्रह्म माविमा आइतबार पनि पठनपाठन भयो । सरकारले आइतबार सार्वजनिक बिदा दिए पनि पठनपाठन भएको विद्यालयका शिक्षक सिर्जना बरालले बताइन् । उनका अनुसार शैक्षिकसत्र सुरु भएको र विद्यार्थीलाई आकर्षित गराउन आइतबार पनि विद्यालय सञ्चालन गरिएको बताइन् ।

‘नजिकैका बोर्डिङ खुलेका छन् । त्यसै त सरकारीमा पढाइ हुँदैन भन्छन् । शिक्षकहरूले सल्लाह गरेर आइतबार पनि विद्यालय चलाएका हौं,’ उनले भनिन् ।

सुन्दरबजार–२, परेवाडाँडास्थित महेन्द्रमन्दिर माविका प्रधानाध्यापक बृद्धिबहादुर खड्काले आइतबार विद्यालय सञ्चालन भएको बताए । ‘अभिभावकले पनि खुलाउनुपर्छ भन्न थाल्नुभो । वडाबाट पनि स्कुल खुलाउन आदेश जारी भयो,’ उनले भने । बेंसीसहर र सुन्दरबजार नगरपालिकाले भने विद्यालय खोल्ने निर्णय गरिसकेका छैनन् । सुन्दरबजार–२ वडा समितिले निर्णय गरेर वडाभित्रको विद्यालय आइतबार पनि सञ्चालन गर्न आदेश दिएको वडाअध्यक्ष नवीनकुमार श्रेष्ठले बताए ।

दोर्दी–५ छैलुङस्थित गणेशदेवी आधरभूत विद्यालयका प्रधानाध्यापक सरस्वती गुरुङले विद्यालयमा आइतबारका दिन पठनपाठन भएको बताइन् । पालिकाको शिक्षा शाखाबाट आइतबारका दिन पठनपाठन गर्न निर्देशन आएपछि पठनपाठन गरिएको उनले बताइन् । दोर्दी गाउँपालिकाले आइतबार पनि पठनपाठन थाल्ने निर्णय गरेको शिक्षा अधिकृत भीमप्रसाद लामिछानेले बताए । उनका अनुसार बर्खे बिदा कट्टा गर्ने गरी आइतबार सञ्चालन गरिएको बताए ।

राइनासका शिक्षा शाखा प्रमुख पूर्णबहादुर अछामीले नगरप्रमुखस्तरीय निर्णयबाट आइतबार पनि विद्यालय सञ्चालन गरिएको बताए । निजी तथा आवासीय विद्यालय अर्गनाइजेसन (प्याब्सन) लमजुङका अध्यक्ष मेनबहादुर घलेले प्याब्सन आबद्ध विद्यालयमा आइतबार पनि पठनपाठन भइरहेको बताए ।

शिक्षा विकास तथा समन्वय इकाइ प्रमुख वीरबहादुर गुरुङले दोर्दी गाउँपालिका र राइनास नगरपालिकामा आइतबार सार्वजनिक बिदाको दिन पनि विद्यालयमा पठनपाठन भएको सुन्नमा आएको बताए । तर, औपचारिक जानकारी भने नआएको उनले बताए । ‘दोर्दी र राइनासमा विद्यालय सञ्चालन भएको सुन्नमा आएको छ । अरू धेरै जानकारी आएको छैन,’ उनले भने । उनका अनुसार लमजुङमा ३ सय ३६ सामुदायिक विद्यालय छन् । ३३ वटा संस्थागत विद्यालय रहेको उनले बताए ।

प्रकाशित : जेष्ठ २३, २०७९ ०८:४८
प्रतिक्रिया
पठाउनुहोस्

पुस्तक नपुग्दा पढाइ प्रभावित

कान्तिपुर संवाददाता

रुकुम पूर्व — रुकुम पूर्वका विभिन्न विद्यालयमा पाठ्यपुस्तक नपुग्दा पढाइ प्रभावित भएको छ । स्थानीय तहको निर्वाचनलगत्तै विद्यालय खुले पनि आइतबारसम्म पाठ्यपुस्तक उपलब्ध नहुँदा पढाइ सुरु हुन नसकेको हो । जिल्लामा १ सय १६ वटा सामुदायिक विद्यालय छन् । कक्षा १ देखि ३ सम्मका पाठ्यपुस्तक रुकुमकोट आइपुगेको बताइएको छ । तर, ती पनि विद्यालयसम्म पुग्न सकेका छैनन् ।

शिक्षा विकास तथा समन्वय इकाइ प्रमुख तिलक गौतमले जिल्लामा पुगेका पाठ्यपुस्तक अर्को सातासम्म यहाँका सबै विद्यालयमा पुर्‍याइसक्ने बताए । उनका अनुसार कक्षा ४ देखि १० सम्मको पाठ्यपुस्तक अपुरो आएको छ । जिल्लामा २० हजार बढी विद्यार्थी विद्यालयमा भर्ना भएका छन् । कतिपय विद्यालयमा विद्यार्थी भर्ना हुने क्रम जारी छ । ‘विद्यालयहरूले किताब नपुग्दा पढाइ प्रभावित भइरहेको जनाएका छन् ।

जिल्लामै किताब नपुगेकाले समस्या भइरहेको हो,’ सिस्ने गाउँपालिकाका शिक्षा, युवा तथा खेलकुद शाखा प्रमुख मंगलसिं बुढाले भने, ‘सकेसम्म छिट्टै वितरण गर्ने गरी किताब पुर्‍याउन जिल्लास्थित डिलरहरूलाई भनिएको छ ।’ यस शैक्षिक सत्रदेखि कक्षा ४, ७ र ९ को पाठ्यपुस्तक परिवर्तन भएको छ । पाठ्यपुस्तक परिवर्तन भएकाले पुरानाबाट पठनपाठन गर्न मिलिरहेको छैन । ‘किताब छैनन् । त्यसैले पढाइ पनि अन्योलमा छ,’ सिस्ने गाउँपालिका–१ को पाखापानी माविका शिक्षक भीमसेन खत्रीले भने ।

भूमे गाउँपालिकामा भने पुरानै किताबबाट पठनपाठन थालिएको बताइएको छ । शिक्षा, युवा तथा खेलकुद शाखका टेकबहादुर बुढाथोकीले ४, ७ र ९ बाहेक अरू कक्षाको पठनपाठन पुरानै पाठ्यपुस्तकबाट थाल्न विद्यालयहरूलाई निर्देशन दिएको बताए ।

प्रकाशित : जेष्ठ २३, २०७९ ०८:४८
पूरा पढ्नुहोस्
प्रतिक्रिया
पठाउनुहोस्
×