गण्डकीका पूर्वपदाधिकारीलाई सेवासुविधा उपलब्ध गराउने तयारी- गण्डकी - कान्तिपुर समाचार
कान्तिपुर वेबसाईट
AdvertisementAdvertisement

गण्डकीका पूर्वपदाधिकारीलाई सेवासुविधा उपलब्ध गराउने तयारी

प्रतीक्षा काफ्ले

कास्की — गण्डकी प्रदेश सरकारले प्रदेशका पूर्वसभामुख, पूर्वमुख्यमन्त्री र पूर्वमन्त्रीलाई सेवासुविधा र सुरक्षा उपलब्ध गराउने तयारी थालेको छ ।


सेवासुविधा केकसरी दिन सकिन्छ भन्ने विषयमा अध्ययन गर्न प्रदेश सरकारको बुधबारको मन्त्रिपरिषद् बैठकले मुख्यमन्त्री तथा मन्त्रिपरिषद्को कार्यालयका सचिव अध्यक्ष रहने एउटा कार्यदल गठन गरेको छ । कार्यदलमा अर्थ, कानुन, सञ्चार तथा प्रदेशसभा मामिला मन्त्रालयका सचिव सदस्य रहेका छन् ।

सरकारका प्रवक्ता एवं भौतिक पूर्वाधार, शहरी विकास तथा यातायात व्यवस्थामन्त्री कुमार खड्काले शुक्रबार पत्रकार सम्मेलनमार्फत पूर्वपदाधिकारीलाई केकस्तो सुविधा उपलब्ध गराउन सकिन्छ भन्ने विषयका लागि कार्यदल गठन गरिएको बताए । कार्यदलले सेवा सुविधा उपलब्ध गराउने सम्बन्धमा उपयुक्त कानूनको मस्यौदा तयार गर्नेछ भने, संघीय र अन्य प्रदेश सरकारको पूर्वपदाधिकारीको सुविधा सम्बन्धमा व्यवस्था गरेको कानूनी प्रावधानलाई आधार बनाएर कानूनको मस्यौदा तयार गर्ने उनले बताए ।

‘यसअघिको सरकार पहिलो भएकाले यस विषयमा सोचेको थिएन’ खड्काले भने, ‘कांग्रेस नेतृत्वको सरकार गठन भएपछि संस्थापक मुख्यमन्त्रीको लागि के गर्ने भन्ने सल्लाह भएको थियो । सबैको विरोधपछि केही निर्णय भएन । सुविधाभन्दा पनि सुरक्षाको दृष्टिकोणले के गर्न सकिन्छ भन्ने हो ।’

पूर्वमुख्यमन्त्रीले अहिले प्रतिपक्षले पाउने सुविधा मात्र लिएका छन् । यस्तै, मन्त्रिपरिषद्को वैठकले जेठ २४ मा आगामी आर्थिक वर्ष २०७९/८० को नीति तथा कार्यक्रम सार्वजानिक गर्ने निर्णय गरेको छ ।

प्रकाशित : जेष्ठ १४, २०७९ ११:५८
प्रतिक्रिया
पठाउनुहोस्

खुला दौड प्रतियोगिताको उपाधि अजय र अनिषालाई

अमृता अनमोल

बुटवल — गणतन्त्र दिवस २०७९ को पूर्वसन्ध्यामा बुटवलमा आयोजित खुला दौड प्रतियोगिता (रोड रेस) को उपाधि कपिलवस्तुका अजय पाण्डे र घोराहीकी अनिषा चौधरीले पाएका छन् ।

लुम्बिनी प्रदेशको शिक्षा, विज्ञान, युवा तथा खेलकुद मन्त्रालय र लुम्बिनी प्रदेश खेलकुद परिषद्को संयुक्त आयोजनामा शनिबार पाँच किलोमिटर खुल्ला दौड प्रतियोगिता आयोजना भएको थियो ।

कपिलवस्तु वाणगंगा बहुमुखी क्याम्पसका पाण्डेले १६ मिनेट ३० सेकेन्डमा पाच किलोमिटरको दुरी पार गरेका थिए । प्रतियोगितामा नवीन औद्योगिक माविमा ११ कक्षामा अध्ययरत प्रशान्त थापा दोस्रो भए । उनले सो दुरी १७ मिनेट ४२ सेकेन्डमा पार गरेका थिए । कालिका मानवज्ञानका राजन बलाल थापा प्रतियोगितामा तेस्रो भए । उनले १८ मिनेट १२ सेकेन्डमा दुरी पार गरेका थिए ।

यसैगरी महिलातर्फ दाङको घोराहीकी अनिषा चौधरीले २२ मिनेट २७ सेकेन्डमा दुरी पार गरी प्रथम भएकी थिइन् । यसैगरी कालिका माविकी अन्जना पाण्डेले २९ मिनेट १३ सेकेन्डमा दुरी पार गर्दै दोस्रो भइन् । कालिकाकै सन्जना अधिकारी ३० मिनेटमा दुरी पार गदै प्रतियोगितामा तेस्रो भइन् ।

लुम्बिनी प्रदेशमा भौतिक पुर्वाधारसंगै खेलकुद गतिविधिलाई अगाडि बढाउन कार्यक्रम गरिएको परिषद्का सदस्य सचिव जयप्रकाश भट्टराईले बताए । प्रतियोगितामा प्रथम, दोस्रो र तेस्रो हुने खेलाडीले क्रमश नगद १० हजार, ८ हजार र ५ हजारसहित प्रमाणपत्र पाउनेछन् । उनीहरुलाई आइतबार हुने औपचारिक कार्यक्रममा पुरस्कृत गरिने छ ।

त्यसअघि कार्यक्रमको एक समारोहका बीच लुम्बिनी प्रदेशका मुख्यमन्त्री कुलप्रसाद केसीले उद्घाटन गर्दै खेलकुदको विकासमा प्रदेश सरकार लागेको बताएका थिए । दौड प्रतियोगितामा रुपन्देही, कपिलवस्तु, घोराही, पाल्पा, नवलपरासी, गुल्मी लगायतका एक सय बढी खेलाडीहरु सहभागी रहेका थिए ।

प्रकाशित : जेष्ठ १४, २०७९ १०:३९
पूरा पढ्नुहोस्
प्रतिक्रिया
पठाउनुहोस्
×