२१ वर्षदेखि फरार अभियुक्त मतदान गर्न आएपछि पक्राउ- गण्डकी - कान्तिपुर समाचार

२१ वर्षदेखि फरार अभियुक्त मतदान गर्न आएपछि पक्राउ

आश गुरुङ

लमजुङ — डाँकाचोरी मुद्दामा २१ वर्षदेखि फरार अभियुक्तलाई लमजुङ प्रहरीले पक्राउ गरेको छ । जिल्ला बाहिर बस्दै आएका उनी चुनावका बेला गाउँ आउँदा प्रहरी फन्दामा परेका हुन् ।

डाँकाचोरी मुद्दामा कैद भुक्तान नगरी विभिन्न ठाउँमा बस्दै आएका लमजुङको मध्यनेपाल नगरपालिका १ जिताका ५१ वर्षीय भुपेन्द्र पौडेल चुनावका बेला गाउँ आउँदा पक्राउ परेको प्रहरीले जनाएको छ । प्रहरी स्रोतका अनुसार २०५७ को अन्त्यतिर भएको डाँकाचोरी घटनामा उनले २०५८ वैशाखतिर करिब ३ साता प्रहरी हिरासतमा बसेका थिए । लमजुङ जिल्ला अदालतले साधारण तारेखमा छोडेका उनको मुद्दामा पुनरावेदन हुँदा साविक पुनरावेदन अदालत पोखराले २०६० फागुन ३ गते कैद र जरिवाना सुनाएका थिए ।

जिल्ला प्रहरी कार्यालयका डीएसपी कृष्णबहादुर कार्कीका अनुसार पुनरावेदन अदालतले डाँकाचोरी मुद्दामा ५ वर्ष ११ महिना ७ दिन कैद र ४७ लाख ८७ हजार २ सय ५० रुपैयाँ जरिवाना तोकेको रेकर्ड भेटिएको छ । उनलाई बुधबार पक्राउ गरी जिल्ला प्रहरी कार्यालय ल्याएको र बिहीबार कारागार चलान गरेको उनले बताए ।

प्रहरी स्रोतका अनुसार द्वन्द्वकालमा भएको घटना र मुद्दा भएकाले जिल्ला अदलतमा सुरुका सबैखाले कागजातपत्र भेटिएको छैन । पुनरावेदन अदालतका अनुसार प्रहरीको फरार सूचिमा राखेका पौडेललाई कानुन बमोजिम पक्राउ गरी अदालतमा बुझाएको डीएसपी कार्कीले बताए ।

हाल स्थानीय तहको निर्वाचनका लागि गाउँमा आएको विशेष सूचनाको आधारमा जिल्ला प्रहरी कार्यालय लमजुङको समन्वयमा प्रहरी चौकी सोती पसलबाट खटिएको प्रहरी टोलीले पौडेललाई पक्राउ गरेका जिल्ला प्रहरी कार्यालयका सूचना अधिकारी इन्सपेक्टर जगदिश रेग्मीले बताए । उनका अनुसार पौडेललाई बिहीबार लमजुङ जिल्ला अदालतमा पेस गरिएकोमा जरिवानासमेतको रकम दाखिला गर्न नसकेपछि कारागार चलान गरिएको छ ।

पौडेलले जरिवाना समेतको रकम दाखिला गर्न नसकेको र उक्त जरिवाना समेतको रकमलाई कैदमा निर्धारण गरी जिल्ला अदालतको आदेशले ९ वर्ष ११ महिना ६ दिन कैदमा राख्ने गरी कारागार कार्यालय, लमजुङमा चलान गरिएको प्रहरीले जनाएको छ ।

प्रकाशित : जेष्ठ ५, २०७९ २०:३५
प्रतिक्रिया
पठाउनुहोस्

जो प्रधानपञ्चदेखि मेयरसम्म बने

आश गुरुङ

लमजुङ — पहिलो पटक जनप्रतिनिधि हुँदा बेंसीसहरका गुमानसिंह अर्याल ३० वर्षका थिए । पञ्चायतकालमा जनपक्षीय उम्मेदवार बनेका उनी २०४३ सालमा बेंसीसहर गाउँ पञ्चायतको प्रधानपञ्च बने । त्यतिबेलाका चर्चित व्यक्तित्वहरू रणबहादुर अधिकारी, गणेशबहादुर रावल, बमबहादुर अर्याल, केन्द्रबहादुर सिलवाल, कमलबहादुर पौडेललगायत ७ उम्मेदवारलाई हराउँदै उनी प्रधानपञ्च बनेका थिए । उनीसँगै जिल्लाभर ४ जना जनपक्षीय उम्मेदवारले चुनाव जितेका थिए । 

०४९ को स्थानीय निकायको निर्वाचनमा नेकपा एमालेले बालकृष्ण बराललाई गाविस अध्यक्षमा र अर्याललाई वडा नम्बर ८ को अध्यक्षको उम्मेदवार बनायो । नेपाली कांग्रेसका रणबहादुर अधिकारीसँग चुनाव लडेका बालकृष्ण बराल पराजित भए । भीमबहादुर कुँवरलाई पराजित गर्दै अर्याल वडाध्यक्षमा निर्वाचित भए । ०५४ मा भएको स्थानीय निर्वाचनमा एमालेले अर्याललाई फेरि बेंसीसहर गाविसको अध्यक्षमा उठायो । मोहनबहादुर थापालाई उपाध्यक्षको टिकट दियो । कांग्रेस उम्मेदवार बेंसीसहरका तिलकबहादुर पौडेललाई हराउँदै अर्याल गाविस अध्यक्षमा निर्वाचित भए । थापाले पनि जिते ।

०७४ को निर्वाचनमा पनि अर्याल कांग्रेसका भेषबहादुर पौडेललाई हराउँदै नगर प्रमुख बने । त्यतिबेला एमाले–माओवादी केन्द्र चुनावी एकताबाट बेंसीसहर नगर प्रमुखको उम्मेदवार बनेका थिए । यसपटक पनि एमालेका उम्मेदवार अर्याल गठबन्धनका उम्मेदवारलाई हराउँदै नगर प्रमुखमा निर्वाचित भएका छन् । उनले कांग्रेस उम्मेदवार श्रीकान्त घिमिरेलाई २ हजार ८ मतले हराए । कानुन व्यवसायमा ०३७ सालदेखि लागेका अर्याल वरिष्ठ अधिवक्ता हुन् । बार इकाईमा उनी अध्यक्ष पनि भए । एमाले गण्डकी प्रदेश कमिटी सचिवालय सदस्य रहेका अर्यालले जिल्ला कमिटी लमजुङको २ कार्यकाल उपाध्यक्ष र पटकपटक कमिटीमा बसेर काम गरेका छन् ।

०४३ देखि हालसम्म भएका ५ वटा चुनावमा उनले विजय हासिल गरेका छन् । झन्डै ४ दशक जनप्रतिनिधि भएर काम गरेका ६५ वर्षीय अर्यालले नगरपालिकालाई समानुपातिक ढंगले विकसित बनाउने बताए । ‘म अख्तियारको दुरुपयोग गर्दिनँ र गर्न पनि दिन्नँ । आर्थिक अपचलन पनि गर्दिनँ र गर्न पनि दिन्नँ । सबैलाई समेटेर समावेशी सिद्धान्तअनुसार नागरिकको सम्मान गर्दै अघि बढ्छु,’ उनले भने । उनले जनताको निःस्वार्थ सेवाको परिणामले आफू लगातार जनप्रतिनिधि बन्न सफल बनेको दाबी गरे ।

प्रकाशित : जेष्ठ ५, २०७९ १२:३४
पूरा पढ्नुहोस्
प्रतिक्रिया
पठाउनुहोस्
×