अजिरकोटमा कांग्रेस र माओवादीका कार्यकर्ताबीच झडप- गण्डकी - कान्तिपुर समाचार

अजिरकोटमा कांग्रेस र माओवादीका कार्यकर्ताबीच झडप

माओवादीका दुई जना घाइते
हरिराम उप्रेती

गोरखा — अजिरकोट गाउँपालिका–१ घ्याच्चोकमा बुधबार राति कांग्रेस र माओवादीका कार्यकर्ताबीच झडप भएको छ । झडपमा नेकपा माओवादी केन्द्रका दुई कार्यकर्ता घाइते भएका छन्  । कुटपिटबाट ३४ वर्षीय बेलबहादुर गुरुङ र ३० वर्षीय विष्णु भुजेल घाइते भएको प्रहरीले जनाएको छ । 

बुधबार दिउँसो सर्वदलीय बैठकका बेलादेखि नै दुई पक्षबीच विवाद भएको र राति भनाभनपछि कुटपिट भएको जिल्ला प्रहरी कार्यलय गोरखाका डिएसपी लिलाराज लामिछानेले बताए ।

बिना कारण आफ्ना कार्यकर्तामाथि कुटपिट भएको भन्दै नेकपा माओवादी केन्द्रका अजिरकोट गाउँपालिका अध्यक्ष सनिल परियारले दाबी गरे । ‘उम्मेदवार सहितको हाम्रो टिम खाना बनाएर खान लाग्दा कुटपिट भएछ, एक्कासि कुटपिट भएको हो,’ उनले भने ।

कांग्रेसले भने बुधबार दिउँसै देखि नै माओवादी कार्यकर्ताले आतंकित बनाउने काम गरेको बताएको छ । ‘दिउँसोदेखि घरमा ढुङ्गा हान्ने, आतंकित बनाउने काम गरे,’ कांग्रेसको तर्फबाट अजिरकोट गाउँपालिका अध्यक्षका उम्मेदवार गोविन्द गुरुङले भने, ‘राति पनि सोही क्रम दोहोरियो हाम्रा दुईतीन जना कार्यकर्ता पनि घाइते छन् ।’

प्रकाशित : वैशाख २९, २०७९ ११:४६
प्रतिक्रिया
पठाउनुहोस्

जग्गाको विषयलाई लिएर महोत्तरीको औरहीमा झडप, ५ जना घाइते

सुनिता बराल

महोत्तरी — महोत्तरीको औरही नगरपालिका–२ मा जग्गाको विषयलाई लिएर भएको झडपमा ५ जना घाइते भएका छन् । घाइतेमध्ये केहीको अवस्था गम्भीर भएको  महोत्तरी प्रहरीले जनाएको छ । 

चन्देश्वर साह र रामजीवन यादवबीच भएको जग्गा विवादको विषयले उग्र रूप लिएपछि दुई पक्षबीच झडप भएको हो । झडपमा चन्देश्वर साहकी ६५ वर्षीया श्रीमती राजकुमारीदेवी साह र उनका छोरा ३५ वर्षका सामसिकिल साह गम्भीर घाइते भएका छन् । त्यस्तै घाइते हुनेमा ५५ वर्षका रामजीवन यादव, उनका भाइ ५० वर्षका रामचन्द्र यादव र २१ वर्षका विजय कुमार छन् ।

लामो समयदेखिको जग्गा विवादका कारण झडप भएको इलाका प्रहरी कार्यालय गौशालाका प्रहरी निरीक्षक रञ्जन मिश्रले जानकारी दिए । झडपमा दुवै पक्षका व्यक्ति घाइते भएका र एक जनाको टाउकोमा गम्भीर चोट लागेको र अर्को व्यक्तिको हातमा चोट लागेको मिश्रले जानकारी दिए ।

राजकुमारीदेवी साह र उनका छोरा ३५ वर्षका सामसिकिल साहलाई भने औरहिमा सामान्य उपचारपछि थप उपचारका लागि धरान पठाइएको पारिवारिक स्रोतले जनाएको छ । अन्य घाइतेको औरहीको राधाकृष्ण क्लिनिकमा उपचार भइरहेको बताइएको छ ।

प्रकाशित : वैशाख २९, २०७९ ११:३४
पूरा पढ्नुहोस्
प्रतिक्रिया
पठाउनुहोस्
×