गठबन्धन टुटे बिचराहरू धुलोपिठो हुन्छन् : ओली- गण्डकी - कान्तिपुर समाचार
कान्तिपुर वेबसाईट
AdvertisementAdvertisement

गठबन्धन टुटे बिचराहरू धुलोपिठो हुन्छन् : ओली

कान्तिपुर संवाददाता

पोखरा — एमाले अध्यक्ष केपी शर्मा ओलीले गठबन्धन टुटेमा सबै धुलोपिठो हुने भएकाले गबठन्धन नटुट्ने बताएका छन । ‘गठबन्धन टुट्न पनि हुँदैन’ उनले भने, ‘टुटिहालेमा बिचराहरू धुलोपिठो हुन्छन् ।’

शुक्रबार पोखरामा आयोजित पार्टी अगुवा कार्यकर्ता भेला तथा पार्टी प्रवेश कार्यक्रममा ओलीले यस्तो बताएका हुन् । यस क्रममा उनले सरकारमा बस्नेहरूले सडकमा आफूलाई ढुंगा हान्न लगाएको पनि दाबी गरे ।

'एमसीसी ल्याइपाउँ भनेर निवेदन दिने झलनाथ खनाल, तत्काल पारित गरौं भन्ने बाबुराम भट्टराई र कांग्रेसलाई ढुंगा नहान्ने तर आफूमाथि भने प्रहार हुने' भन्दै उनले प्रश्न गरेका थिए, ‘संसदमा एमसीसी टेबुल गर्ने सभामुखलाई पनि ढुंगा नहानी ताली बजाउँछन् । यो के भइरहेको छ भन्ने हामीलाई थाहा छैन र ?’

यस क्रममा उनले पुतली र मान्छेको कथा हाल्दै उनले पुष्पकमल दाहाललाई पुतली कि मान्छे भनेर छुट्टाउन नसकिएको बताए । जसलाई जतिबेला चाहियो त्यतिबेला फोरेर काम चलाउने जस्तो एमाले पैसा जम्मा गर्ने खुत्रुके नभएको उनले बताए । उनले नेता कार्यकर्तालाई आगामी स्थानीय तहको निर्वाचनमा लाग्न निर्देशन पनि दिएका थिए ।

प्रकाशित : फाल्गुन १३, २०७८ १५:४८
प्रतिक्रिया
पठाउनुहोस्

डेढ महिनामा जम्मा दुई लाख लाइसेन्स प्रिन्ट

कान्तिपुर संवाददाता

काठमाडौँ — यातायात व्यवस्था विभागले डेढ महिनामा बल्ल दुई लाख चालक अनुमति पत्र (लाइसेन्स) प्रिन्ट गरेको छ । पुस दोश्रो साताबाट प्रिन्ट थालिए पनि अझै सबै लाइसेन्स प्रिन्ट भइसकेको छैन ।

विभागका सूचना अधिकारी लोकनाथ भुसालका अनुसार अझै करिब ५ लाख लाइसेन्स प्रिन्ट गर्न बाँकी छ । ‘अहिले दैनिक ६ हजार लाइसेन्स प्रिन्ट भइरहेको छ,’ भुसालले भने, ‘प्रिन्ट भएको लाइसेन्स सम्बन्धित कार्यालयमा पठाउने काम पनि जारी छ ।’ सन् २०२१ भित्र जारी गरिएका लाइसेन्स प्रिन्ट गरेर सकिसकेको विभागको दाबी छ ।

उपत्यका बाहिर झापा, सुनसरी, जनकपुर र सगरमाथामा लाइसेन्स प्रिन्ट गरेर पठाउने काम भइरहेको विभागले जनाएको छ । अहिले तीन सिफ्टमा नियमित लाइसेन्स प्रिन्ट हुने गरेको छ । दिउँसोको सिफ्टमा अति जरुरी कार्ड प्रिन्ट गर्ने गरिएको छ । बिहान ७ देखि ११ बजेसम्म नियमित कार्ड छापिन्छ । र, त्यसपछि ११ देखि ३ बजेसम्म अति जरुरी भएका कार्ड छाप्ने गरिएको विभागले जनाएको छ । बेलुका १० बजेसम्म र त्यसपछि भोलिपल्ट बिहान ७ बजेसम्म नियमित कार्ड छाप्ने गरिएको छ ।

काठमाडौंका ४ वटा यातायात व्यवस्था कार्यालयमा प्रिन्ट भएको लाइसेन्स पठाइसकिएको छ । फ्रेन्च कम्पनी सेल्पले १४ करोड ८६ लाख रुपैयाँमा कार्ड सप्लाइको ठेक्का लिए पनि कार्ड सप्लाईमा ढिलाई गर्दा सेवाग्राही लामोसमयदेखि लाइसेन्सको पर्खाइमा छन् । विभागले २०७२ सालबाट स्मार्ट लाइसेन्स वितरण थालेको हो ।

१ वर्षपहिले नै आवेदन दिएकाहरूको बल्ल परीक्षा दिने पालो आएको छ । हाल अनलाइन फारमको नयाँ डिजाइन भइरहेको विभागले जनायो । एक वर्षअघि अनलाईन आवेदन दिएकाहरूले बल्ल लाइसेन्स परीक्षा दिन थालेका छन् । सहज रूपमा लाइसेन्स पाउन अझै एक वर्ष लाग्ने विभागले जनाएको छ ।

प्रकाशित : फाल्गुन १३, २०७८ १५:३६
पूरा पढ्नुहोस्
प्रतिक्रिया
पठाउनुहोस्
x
×