कामै नगरी सकियो ठेक्का सम्झौताको म्याद- गण्डकी - कान्तिपुर समाचार

कामै नगरी सकियो ठेक्का सम्झौताको म्याद

लकडाउनका कारण र आवश्यक मजदुरसमेत पाउन नसक्दा काम अगाडि बढाउन नसकेको ठेकेदारको गुनासो
सम्झना रसाइली

तनहुँ — सडक कालोपत्र, नाला निर्माणलगायत काम गर्न भनी गरिएको ठेक्का सम्झौताबिना कुनै काम सकिएको छ । जिल्लाको भानु नगरपालिकाको भानु मोटर मार्गअन्तर्गत चन्द्रावती–पोखरीछाप ठूलोढुंगा खण्डको कालोपत्रे गर्ने काम अलपत्र परेको छ । सडकको १० किलोमिटर खण्ड कलोपत्रे गर्ने योजना थियो । 

२०७८ माघ १५ भित्र सडक कालोपत्रे, नाला निर्माण तथा ग्याबिन जाली भर्नेलगायत काम गर्न २०७६ कात्तिक ४ मा शंकरमाली कन्स्ट्रक्सन काठमाडौंले सम्झौता गरेको थियो । उक्त निर्माण कम्पनीले सडक निर्माणका लागि ठेक्का सम्झौता गरेपछि जम्मा १२ प्रतिशत भौतिक प्रगति गरेको पूर्वाधार विकास कार्यालयले जनाएको छ ।

कार्यालयका इन्जिनियर धनमाया मिश्रका अनुसार निर्माण कम्पनीले २३ करोड २ लाख ८० हजार रुपैयाँमा सम्झौता गरेको थियो । निर्माण पक्षले ६ करोड ९१ लाख ८५ हजार रुपैयाँ निकासा लिएको कार्यालयले जनाएको छ । ‘सडकको भौतिक प्रगति १२ प्रतिशत देखिएको छ भने ३० प्रतिशत वित्तीय प्रगति छ,’ इन्जिनियर मिश्रले भनिन्, ‘समयमा काम सम्पन्न नभएकाले आगामी असार मसान्तसम्म म्याद थपिएको छ ।’

२०४९ मा चन्द्रावतीबाट पोखरीछापसम्म सडक विस्तार गरी यातायातका साधन सञ्चालन हुँदै आएको भानु–१३ टुटेपानीका क्या. होमबहादुर गुरुङले बताए । उनले भने, ‘सडक सञ्चालनमा आएपछि हालसम्म यो सडकको स्तरोन्नति नहुँदा सास्ती बेहोर्दै आएका छौं ।’ वर्षामा हिलो र हिउँदमा धुलोको नियति झेल्दै आएको यो सडक खण्डमा सानो पानी पर्दा समेत सवारीसाधान सञ्चालन हुन सक्दैनन् । उनले भने, ‘सरोकारवालाहरूको ध्यान नजाँदा आजसम्म यो सडकको स्तोन्नति हुन सकेन ।’

प्रदेश सरकारअन्तर्गतको उक्त सडकका लागि चालु आर्थिक वर्ष ३ करोड ७० लाख रुपैयाँ बजेट विनियोजन भए पनि निर्माण पक्षको लापरबाहीका कारण हालसम्म सडक निर्माण कार्यले गति लिन नसकेको कार्यालयले जनाएको छ ।

यता शंकरमाली कन्स्ट्रक्सनले भने आफूले कामको सम्झौता लिएलगत्तै कोभिड–१९ संक्रमण फैलिपछि लकडाउनसँगै आवश्यक मजदुर नपाउँदा काम अगाडि बढाउन नसकेको बताउँदै आएको छ । बाँकी काम गर्न शंकर मालीले अहिले दोस्रो निर्माण व्यवसायीलाई जिम्मा दिएको छ । सडक निर्माणको काम निर्माण व्यवसायी संगम खड्कालाई जिम्मा दिएको भानु–१३ का वडाध्यक्ष रामबहादुर बानियाँले बताए ।

उनले भने, ‘अगाडि जेजस्तो भएर काममा ढिलाइ भए पनि अब तत्काल निर्माण कार्यलाई अगाडि बढाउने सहमति भएको छ ।’ बानियाँका अनुसार सडकको केही ठाउँमा ग्याबिन जाली भर्ने काम भएको देखिएको र अन्य काम भने शून्य अवस्थामै रहेको छ ।

अधुरो सडक खण्डको निर्माणको जिम्मा आफूले लिएको निर्माण व्यवसायी संगम खड्काले बताएका छन् । उनले भने, ‘सडक खण्ड कालोपत्रे, नाला निर्माणलगायतको काम गर्न सम्झौता गरेको शंकर माली कन्स्ट्रक्सनले समयमै काम अगाडि बढाउन नसकेको बताएकाले अहिले सुरुवाती चरणबाटै निर्माणको काम गर्ने प्रक्रियामा अगाडि बढेको छु ।’

सडक कालोपत्रको जिम्मा लिएसँगै कामलाई तीव्र गतिमा अगाडि बढाउने तयारीमा रहेको उनले बताए । भानु मार्ग हुँदै नमुना सामुदायिक होमस्टेका रूपमा विकास भएको टुटेपानी सामुदायिक होमस्टे पुगिन्छ । सडकको स्तरोन्नति नहुँदा यस होमस्टेमा सहजै पाहुना पुग्न नसक्ने अवस्था भएकाले स्थानीयले सडक छिटो निर्माण गरिदिन हारगुहार गर्दै आएका छन् ।

‘सडक कालोपत्रे नहुँदा होमस्टेमा आएका कति पाहुना बीच बाटोबाटै फर्किएका छन्,’ होमस्टेका सचिव अमर गुरुङले भने, ‘पटकपटक सरोकारवाला निकायलाई सडकको स्थिति बुझाइ सडक निर्माणका लागि गुहार गर्‍यौं तर पनि अहिलेसम्म कुनै सुनवाइ हुन सकेको छैन ।’

प्रकाशित : माघ १५, २०७८ ११:५१
प्रतिक्रिया
पठाउनुहोस्

घरैपिच्छे रुघाखोकीका बिरामी

कोरोनाको डरले चेक गराउनै मान्दैनन् बिरामी 
 कोरोना भए सामाजिक रुपमा गाह्रो हुन्छ भन्ने सोच 
तृप्ति शाही, मेनुका ढुंगाना, भवानी भट्ट

बैतडी, अछाम, कञ्चनपुर — सातायता जिल्लामा घरघरै रुघाखोकीका बिरामी बढेका छन् । बालबालिकादेखि पाको उमेरसम्मका अधिकांशलाई रुघाखोकीले सताएको छ । केही दिनदेखि रुघाखोकीले परिवारलाई नै सताएको दशरथचन्द नगरपालिका–४ की पूजा बोगटीले बताइन् ।

उनले भनिन्, ‘एक हप्ता बढी भइसकेको छ । अझै सबै परिवारलाई सञ्चो भएको छैन ।’ रुघाखोकी भए पनि आफूहरूले कोरोना परीक्षण भने नगराएको र घरमै औषधि खाएर बसेको उनले बताइन् ।

जिल्लाका स्वास्थ्य संस्थाहरूमा पनि रुघाखोकी र ज्वरोका बिरामी बढिरहेका छन् । एक/दुई सातायता गाउँमा रुघाखोकी र ज्वरोका बिरामीको संख्या बढिरहेको डिलासैनी गाउँपालिकाको गोकुलेश्वर स्वास्थ्यचौकीकी इन्चार्ज निर्मला जोशीले बताइन् । ‘घरघरमा रुघाखोकी र ज्वरोका बिरामी बढेका छन्,’ उनले भनिन्, ‘गाउँमा घरैपिच्छे मानिसहरू सुतेका छन् । स्वास्थ्यचौकीमा उपचारका लागि आउनेको संख्या पनि बढेको छ ।’

अहिले दैनिक उपचारका लागि स्वास्थ्यचौकी आउने बिरामीमा ३५ प्रतिशत रुघाखोकी र ज्वरोकै बिरामी रहेका पञ्चेश्वर गाउँपालिका–३ को कुलाउ स्वास्थ्यचौकीका इन्चार्ज दिनेश तिवारी बताउँछन् । गाउँघरमा अझै धेरै यस्ता बिरामी भए पनि कोरोना परीक्षण गर्न स्वास्थ्य संस्थामा नआउने गरेको उनले बताए । ‘कोरोना देखिए गाउँमा हल्ला हुने र एक्लै बस्नुपर्छ भन्ने डरले परीक्षण गराउन हिचकिचाउने प्रवृत्ति छ,’ उनले भने, ‘हामीले स्वास्थ्यचौकीमा आउनेमध्ये लक्षण मिलेका केहीको परीक्षण गर्छौं । केहीमा पोजिटिभ पनि देखिन्छ । धेरैजसो उपचारका लागि नै आउँदैनन् ।’

कोरोना परीक्षणका लागि स्थानीय डराउने गरेको गोकुलेश्वर स्वास्थ्यचौकीकी इन्चार्ज जोशी बताउँछिन् । उनले भनिन्, ‘गाउँभरि बिरामी भए पनि कोरोनाको डरले चेक गराउनै मान्दैनन् । कोरोना भयो भने सामाजिक रूपमा घुलमिल गर्न गाह्रो हुन्छ भन्ने सोच गाउँघरतिर छ ।’

जिल्ला अस्पताल बैतडीमा पनि अहिले रुघाखोकी र ज्वरोका बिरामीहरू दैनिक आउने गरेका छन् । २० जना जति रुघाखोकीका बिरामी मात्र आउने गरेका अस्पतालले जनाएको छ । उनीहरू सबैलाई कोरोना परीक्षण अनिवार्य गरिएको अस्पतालका सूचना अधिकारी हरिश पन्त बताउँछन् । उनीहरूमा केहीलाई कोरोना पनि देखिने गरेको उनले बताए ।

जिल्ला अस्पतालकै १३ जना स्वास्थ्यकर्मी संक्रमित भएका छन् । ३ डाक्टर, ५ स्टाफ नर्स र अन्य ५ जना गरी १३ जना संक्रमित छन् । अन्य पालिकाका स्वास्थ्यकर्मीहरू पनि संक्रमित भएका छन् । मेलौलीमा रहेको केशरपुर प्राथमिक स्वास्थ्य केन्द्रका स्वास्थ्यकर्मीहरूलाई कोरोना देखिएपछि इमर्जेन्सीबाहेकका सेवा बन्द गरिएको छ । ७ स्वास्थ्यकर्मीलाई कोरोना देखिएपछि इमर्जेन्सीबाहेकका सेवा बन्द गरिएको स्वास्थ्य केन्द्रका निमित्त प्रमुख मुकेशकान्त दयालले बताए ।

पालिकामा परीक्षण छैन

गाउँघरमा रुघाखोकीका बिरामी बढे पनि पालिकाले परीक्षणमा चासो दिएका छैनन् । जिल्लामा नेपाल—भारत सिमानाका झुलाघाट र जिल्ला अस्पतालमा मात्र दैनिक परीक्षण भइरहेको छ ।

पालिकाका स्वास्थ्य संस्थाहरूमा स्थानीय पनि जाँचका लागि नपुग्ने र पालिकाले पनि चासो नदेखाउँदा परीक्षणको काम भएको छैन ।केही दिनअघि पालिकामा परीक्षण गरिए पनि आजभोलि नभएको सिगास गाउँपालिकाका स्वास्थ्य संयोजक घनश्याम बोहराले बताए । अहिले पालिकामा एन्टिजेन किट नभएकाले पनि परीक्षण रोकिएको र जिल्लाबाट किट आए सुरु गर्ने योजना बनाएको उनले बताए । दोगडाकेदार गाउँपालिकामा पनि एन्टिजेन किट नभएको स्वास्थ्य संयोजक नरेन्द्र नाथले बताए । किट नभएकाले परीक्षण हुन नसकेको उनको भनाइ थियो । तर स्वास्थ्य कार्यालय, बैतडीका निमित्त प्रमुख जयबहादुर कुँवरले जिल्लामा किट मौज्दात भएको बताए । ‘पालिकाहरूमा पठाइरहेका छौं र माग फेरि आएका तत्काल पठाउने छौं,’ उनले भने ।

अछाममा बुस्टर डोज सुरु

अछाममा कोरोनाविरुद्धको तेस्रो चरणको खोप लगाउन सुरु भएको छ । कोभिसिल्ड र भेरोसेल खोप लगाएर ६ महिना पूरा भएका फ्रन्ट लाइनमा खटिनेहरूका लागि बुस्टर डोज लगाउन सुरु गरिएको छ ।

स्वास्थ्य कार्यालय अछामका फ्रन्ट लाइनमा खट्ने स्वास्थ्यकर्मी, सुरक्षाकर्मी, निजामती कर्मचारी, स्वास्थ्यकर्मी, एम्बुलेन्सकर्मी, सफाइकर्मी, सञ्चारकर्मीलाई अहिले बुस्टर डोज लगाउन थालिएको छ । हालसम्म २ हजार १ सय ६ जनाले बुस्टर डोज खोप लगाएको स्वास्थ्य कार्यालय अछामका प्रमुख झनक ढुंगानाले बताए ।

उनका अनुसार १८ वर्ष र सोभन्दा माथिका व्यक्तिहरूलाई कोभिसिल्ड, एस्ट्राजेनेका, भेरो सेल–साइनोफार्म र जोन्सन नामक खोप दिइएको छ भने १२ वर्षदेखि १७ वर्षभन्दा माथिका व्यक्तिहरूलाई फाइजर–बायोएनटेक र मोडर्ना खोप दिन थालिएको छ । अछाम १२ वर्षदेखि १७ वर्षसम्मका ३३ हजार ८ सय २४ जनालाई मोडर्ना खोप दिइएको उनले बताए ।

३२ हजार ८ सय ८७ लाई लगाउने लक्ष्य भए पनि धेरै समेट्न सकिएको उनको भनाइ छ । १८ वर्षभन्दा माथिका ५२ प्रतिशत जनताले दोस्रो डोज लगाइसकेको उनले बताए । स्वास्थ्य कार्यालयको तथ्यांकअनुसार अछाममा पहिलो डोज लगाउने १ लाख २४ हजार ९ सय ६६ , दोस्रो डोज लगाउने ९९ हजार २ सय ७३ जना छन् ।

अगामी दिनमा १२ वर्षमाथिका सबैलाई खोप दिने तयारी भएको ढुंगानाले बताए । ढुंगानाका अनुसार निश्चित स्वास्थ्य संस्थाहरूबाट नियमित खोप सेवा प्रदान गर्ने कार्यनीति बनाइएको छ ।

उक्त नीतिमा प्रदेश र स्थानीय तहको नेतृत्वमा निश्चित स्थानमा अभियानका रूपमा खोप सेवा सञ्चालनका लागि योजना बनाउन थालिएको छ । छुटेका स्थान र समूहको पहिचान गरी कारण पत्ता लगाएर तिनीहरूलाई खोप प्रदान गरिनेछ । र कोभिड–१९ खोप सेवा सञ्चालनका कार्यनीतिअनुरूप निश्चित प्रकारको सूचना सम्प्रेषण, प्रवाहका लागि तयार पारिएको उनले बताए ।

कोरोनाविरुद्धको खोप सञ्चालनका क्रममा चुनौतीहरू भएको ढुंगानाले बताए । ‘सुरुवाती चरणमा खोपको बारेमा अफबाह फैलाएकाले सर्वसाधारणमा डर पैदा भयो,’ उनले भने, ‘सबैलाई खोप लगाउन सचेत गर्‍यौं अहिले कोभिड–१९ रोगविरुद्धको खोप लगाउन केही सर्वसाधारणले अझै मानिरहेका छैनन् ।’ उनका अनुसार अहिले पनि ढुवानीमा कठिनाइ, सीमित भ्याक्सिन र उमेर समूहको बाध्यता छ ।

कञ्चनपुरमा ६ हजारले लगाए बुस्टर डोज

कञ्चनपुरमा ६ हजार बढीले बुस्टर डोजको खोप लगाएका छन् । जिल्ला स्वास्थ्य कार्यालयका अनुसार भेरोसेल र कोभिसिल्डको गरी ६ हजार ३ सय ६१ ले बुस्टर डोजको खोप लगाएका हुन् । स्वास्थ्य कार्यालयका अधिकृत जनक कुँवरका अनुसार कोभिसिल्डको खोप ५ हजार १ सय ४५ र भेरोसेलको खोप १ हजार २ सय १६ जनाले लगाएका हुन् । बुस्टर डोजको खोपका लागि २० हजार डोज कोभिसिल्डको खोप प्राप्त भएको छ । यसैगरी भेरोसेलको पनि केही मात्रा बाँकी रहेको कुँवरले बताए । अहिले जिल्लाका सबै स्वास्थ्य चौकीमा बुस्टर डोजको खोप दिइएको छ ।

कोरोना रोकथामका लागि अग्रपंक्तिमा खटिने स्वास्थ्यकर्मी, सुरक्षाकर्मी, सञ्चारकर्मी र जनप्रतिनिधिलगायतलाई सरकारले माघ पहिलो साताबाट बुस्टर डोजको खोप दिन सुरु गरेको थियो । कञ्चनपुरमा भने खोप अभावका कारण केही दिन ढिलो गरी बुस्टर डोज खोप दिन सुरु गरिएको हो ।

जिल्लामा हालसम्म पहिलो डोज खोप पाउनेको संख्या करिब ८८ प्रतिशत पुगेको छ । खोप लगाउनुपर्ने ३ लाख ५२ हजार ९ सय ६२ मध्ये ३ लाख ९ हजार ४ सय २० ले पहिलो मात्रा खोप लगाएका छन् । यसैगरी खोप दिनुपर्ने लक्षितमध्ये ७२ प्रतिशतले दोस्रो मात्राको खोप पाएका छन् । दोस्रो मात्रा खोप पाउनेको संख्या २ लाख ५३ हजार २ सय ७६ छ ।

‘सरकारले तोकेको लक्ष्यभन्दा बढी नै खोप दिन सफल भएका छौं,’ जिल्ला स्वास्थ्य कार्यालय कञ्चनपुरका वरिष्ठ जनस्वास्थ्य अधिकृत शिवराज सुनारले भने, ‘अहिले पनि जिल्लामा निरन्तर खोप अभियान चलिरहेको छ ।’

प्रकाशित : माघ १५, २०७८ ११:४९
पूरा पढ्नुहोस्
प्रतिक्रिया
पठाउनुहोस्
×