लुदिखोला घाटमा अनियन्त्रित उत्खनन‚ स्थानीयको विरोध
गोरखा — गोरखा नगरपालिकाले मृतकको अन्तिम दाहसंस्कारका लागि प्रयोग हुँदै आएको घाट मासिनेगरी नदीजन्य पदार्थ उत्खननको ठेक्का लगाएको छ । बिहीबार स्थानीयले गोरखा नगरपालिका-१२ र १३ मा पर्ने दरौदी नदीस्थित लुदिखोला घाट क्षेत्रमा अनियन्त्रित उत्खनन कार्य रोकेका छन् ।
२०४० सालदेखि मृतकको अन्तिम संस्कारका लागि प्रयोग हुँदै आएको हाँडिरह दोभानको घाट मासिने गरी नदीजन्य पदार्थ उत्खनन बढेपछि त्यसलाई रोक्न माग गर्दै स्थानीयबासी उत्खननको विरोधमा उत्रिएका हुन् । ‘यो परम्परागत घाट हो, यहाँबाट ढुङ्गा गिट्टी ननिकाल्न भनेर मेयरलाई फोन गर्यौं; ठेकेदारलाई भन्यौं; तर हाम्रा कुरा कसैले सुनेनन्,’ गोरखा नगरपालिका–१३ अवुवा कर्मसिं टोल विकास संस्थाका अध्यक्ष किसान उप्रतीले भने । बिहीबार यहाँका स्थानीयले दरौदी नदी किनार पुगेर उत्खनन रोकेका हुन् ।
नदीजन्य पदार्थको उत्खननको जिम्मा पाएको तनहुँको मनोकामना गुरुङ निर्माण सेवाले अनियन्त्रित रुपमा उत्खनन गरिरहेको छ । नगरपालिकाको ठेक्काको शर्तअनुसार नै उत्खनन भइरहेको निर्माण सेवाका प्रमुख गोपिलाल गुरुङले दाबी गरेका छन् ।
ढुंगा‚गिट्टी‚बालुवा उत्खनन बिक्री तथा व्यवस्थापनसम्बन्धी मापदण्ड-२०७७ मा उत्खनन गर्दा सडक, वन, खोलानालाको किनारा, घाटलाई कुनै हानी नोक्सानी गर्न नमिल्ने उल्लेख छ । तर दरौदी नदीको लुदी खोला घाट क्षेत्रमा भने नदी किनारमा भने जेसीभीको प्रयोगबाट घाट भएको क्षेत्र उत्खनन भइरहेको छ । दरौदी बहावको बिचमा निर्माण सामग्री थुपारिएको छ ।
कानुनविपरीत भइरहेको उत्खनन रोक्न नगरपालिकाले चासो नदिएको स्थानीयको आरोप छ । टेलिफोनमार्फत गरेको गुनासो सुनुवाइ नभएपछि लिखित रुपमै नगरपालिकालाई उत्खनन रोक्न आग्रह गर्ने स्थानीयले बताए । घाटमा भइरहेको उत्खनन तत्काल रोक्नुपर्ने गोरखा नगरपालिका-१३ की भिमकुमारी शाहले बताइन् ।
‘यतिका वर्ष संरक्षण गरेर राखेको घाट मासिने गरी किन ढुङ्गा गिट्टी झिक्नुपर्यो,’ उनले भनिन् ।
नियमअनुसार नै उक्त घाटमा ठेक्का लगाएको गोरखा नगरपालिकाका प्रमुख प्रशासकीय अधिकृत दिनेश राज पन्तले बताए । ‘गोरखा नगरपालिकाले ठेक्का लगाएको हो, दुई-तीन जनाले विरोध गर्दैमा उत्खनन रोकिँदैन‚’ उनले भने, ‘नगरपालिकाले ठेक्का लगाएको ठाउँमा काम गर्न नदिने भन्ने हुँदैन ।’ स्थानीयले रोक्न नमिल्ने भन्दै काम अघि बढ्ने उनले बताए ।
प्रकाशित : माघ ६, २०७८ १८:११