अन्ततः बन्द गरिए पर्वतका विद्यालय- गण्डकी - कान्तिपुर समाचार

अन्ततः बन्द गरिए पर्वतका विद्यालय

यसअघि सरकारले आदेश दिए पनि कोरोनाको जोखिम नरहेको भन्दै विद्यालय पूर्ण रुपमा बन्द भएका थिएनन्
अगन्धर तिवारी

पर्वत — कोरोनाको जोखिममा पनि विद्यालय सञ्चालन गर्न जिल्लाका स्थानीय तहले गरेको निर्णय दुई दिन पनि टिकेन । कुश्मा नगरपालिकासहित जलजला, पैयुँ गाउँपालिका लगायतले विद्यालयमा नियमित पढाइ सञ्चालन गर्ने निर्णय गरेको भए पनि मंगलबारको प्रशासनको निर्णयका कारण विद्यालय बन्द गर्न बाध्य हुनुपरेको पालिकाहरूले जनाएका छन् ।

सरकारले आदेश दिए पनि विद्यालय पूर्ण रूपमा बन्द भएका थिएनन् । मंगलबार जिल्ला कोभिड संकट व्यवस्थापन समितिको बैठकले विद्यालयसहित सार्वजनिक स्थानका लागि जारी गरेको निषेधाज्ञालगत्तै कुश्मा नगरपालिकाले सबै विद्यालय बुधबारदेखि बन्द गर्ने निर्णय गरेको प्रमुख प्रशासकीय अधिकृत कुमानसिंह गुरुङले बताए । जिल्ला कोभिड संकट व्यवस्थापन समितिले विद्यालय बन्द गर्न सूचित गरेपछि कुश्मा नगरपालिकाको आकस्मिक बैठक बसेर विद्यालय बन्द गर्ने निर्णय गरेको गुरुङले बताए ।

भौतिक उपस्थितिमा हुने पठनपाठन बन्द भए पनि वैकल्पिक विधिमार्फत नियमित पठनपाठन गराउन अनुरोध गरिएको नगरप्रमुख रामचन्द्र जोशीले बताए । ‘पहिला पनि अनलाइनबाट लामो समय पढाइ भएकै थियो,’ जोशीले भने, ‘अब सोही प्रविधि अवलम्बन गरेर पठनपाठन गर्न भनेका छौं । भौतिक उपस्थिति नहुँदा पनि खासै समस्या हुँदैन ।’ पैयुँ गाउँपालिकाले पनि मंगलबार एक सूचना जारी गरी सबै विद्यालय बन्द गर्न आग्रह गरेको छ ।

कोरोना संक्रमण बढ्न नदिन स्वास्थ्यका मापदण्ड पालना गर्न र गराउन अनुरोध गरिएको गाउँपालिकाका अध्यक्ष खगेन्द्रप्रसाद तिवारीले बताए । जलजलाका प्रमुख प्रशासकीय अधिकृत राजेन्द्रबहादुर क्षेत्रीले प्रशासन र अन्य पालिकाले पनि बन्द गर्ने निर्णय गरेकाले प्रशासनको निर्णय मान्नैपर्ने बताए ।

फलेवास नगरपालिकाले भने अहिलेसम्म विद्यालय बन्द गर्ने निर्णय गरेको छैन । पुस ३० मा विद्यालयहरूको बैठक बसेर विद्यालय खुल्ला राख्ने निर्णय गरेको र समस्या देखिएका वडामा मात्रै बन्द गर्ने र समस्या नभएको खण्डमा यथावत् विद्यालयको पठनपाठन जारी रहने प्रमुख प्रशासकीय अधिकृत कृष्णप्रसाद श्रेष्ठले बताएका थिए । उनका अनुसार सम्बन्धित वडाध्यक्षको सल्लाहमा विद्यालय बन्द वा खुल्ला हुन्छ ।

विहादी गाउँपालिकाले देशभरिका विद्यालयलाई गरेको परिपत्रअनुसार विद्यालय बन्द गरेको अध्यक्ष कमलप्रसाद भुसालले बताए । मोदी र महाशिला गाउँपालिकाले यस विषयमा कुनै प्रतिक्रिया सार्वजनिक गरेका छैनन् ।

नेपाल सरकारले विद्यालय बन्द गर्ने परिपत्र गरे पनि जोखिम नहुन्जेलसम्म भन्दै स्थानीय तहले विद्यालय बन्द नगर्ने निर्णय गरेका थिए । नेपाल सरकारको परिपत्र अनुसार जिल्ला शिक्षा समन्वय इकाइले यसअघि विद्यालयको पठनपाठन रोक्न भन्दै सूचित गराइसकेको थियो ।

प्रकाशित : माघ ६, २०७८ ०८:२४
प्रतिक्रिया
पठाउनुहोस्

बालबालिकामा पनि बढ्दै संक्रमण

संक्रमित बालबालिकाको संख्या उच्च रहे पनि उनीहरूको स्वास्थ्यमा धेरै जटिलता भने छैन ।
अतुल मिश्र

काठमाडौँ — कोभिडको तेस्रो लहर सुरु भएसँगै बालबालिकामा अत्यधिक मात्रामा संक्रमण देखिन थालेको छ । खोपको दायराभन्दा बााहिर रहेका १२ वर्षमुनिका बालबालिकामा संक्रमणको जोखिम बढी देखिएको छ ।

संक्रमित बालबालिकाको संख्या उच्च रहे पनि उनीहरूको स्वास्थ्यमा धेरै जटिलता भने छैन । तर, दोस्रो लहरका बेला जस्तै कोभिडबाट निको भइसकेका धेरै बालबालिकामा एक–डेढ महिनापछि ‘पोस्ट कोभिड सिन्ड्रोम’ लक्षण देखिन सक्ने विज्ञहरूले बताएका छन् । उनीहरूका अनुसार विशेष गरी १२ वर्षमुनिका बालबालिकामा त्यस्तो जोखिम बढी देखिन्छ । किनकि यो उमेर समूहले खोपसमेत लगाएको छैन ।

सरकारले करिब दुई महिनाअघि मात्र १२ देखि १७ वर्ष उमेर समूहलाई फाइजर खोप दिइएको छ । चिकित्सकहरूका १२ वर्षमुनिका धेरैजसोमा अत्यधिक जीउ दुखाइ, ज्वरो, रुघाखोकी, घाँटी दुख्ने, खसखस गर्ने, कसै–कसैमा टाउको दुखाइ, हल्का बान्ता हुने र पखालालगायतका लक्षण देखिएको छ ।

बीपी कोइराला स्वास्थ्य विज्ञान प्रतिष्ठान धरानका बाल रोग विभाग प्रमुख डा. प्रकाश पौडेलले बालबालिकामा संक्रमण अत्यधिक देखिएको र ज्यानै जोखिममा नपरे पनि उनीहरूलाई शारीरिक पीडा भएको बताए । पौडेलका अनुसार प्रतिष्ठानको बहिरंग विभागमा आउने लक्षण भएका ११ वर्षमुनिका बालबालिकाको परीक्षण गर्दा करिब ८० प्रतिशतभन्दा बढीमा कोभिड देखिएको छ । परीक्षणको दायरा बढाउने हो भने संक्रमण पाँच गुणा बढी देखिने उनी बताउँछन् ।

परिवारमा वयस्क सदस्य संक्रमित भएको अवस्थामा बालबालिकालाई बेग्लै राख्न सम्भव नहुने हुँदा वास्तविक संक्रमित निकै धेरै हुन सक्ने डा. पौडेलको भनाइ छ । बालबालिकाले आफ्नो समस्या प्रस्टसँग भन्न नसक्ने हुँदा स्वास्थ्यमा जटिलता देखिने जोखिम अत्यधिक रहन्छ । अघिल्ला लहरमा जस्तो यस पटक गम्भीर समस्या विरलै देखिएकाले पनि परीक्षण कम भइरहेको हुन सक्ने डा. पौडेलको आकलन छ । ‘हामीले भने पनि परीक्षण धेरैजसोले गराउँदैनन्, यसपालि निमोनिया जस्तो धेरै गम्भीर अवस्था नदेखिएकाले परीक्षण नगराएका हुन् कि ?’ उनले भने ।

मुलुकको एक मात्र केन्द्रीयस्तरको कान्ति बाल अस्पतालमा समेत डेढ सातादेखि कोभिड जस्तो लक्षण लिएर आउने बालबालिकाको संख्यामा वृद्घि भएको छ । हाल कोभिड संक्रमित १२ बालबालिकाको उपचार भइरहेको कान्तिका निर्देशक डा. अजित रायमाझीले बताए । ‘तेस्रो लहरमा हालसम्म एक जना पनि भेन्टिलेटरमा छैनन् तर पछिल्लो दिनमा कोभिड संक्रमित बालबालिकाको संख्यामा वृद्धि भएको छ,’ उनले भने ।

धनगढीस्थित सेती प्रादेशिक अस्पतालका मेडिसिन विभाग प्रमुख डा. शेरबहादुर कमर दोस्रो लहरको दाँजोमा अहिले बालबालिकामा पनि संक्रमण बढेको बताउँछन् । ‘लक्षण देखिएका बालबालिकाको परीक्षण गर्दा धेरैमा संक्रमण देखिएको छ,’ उनले भने । शुक्रराज ट्रपिकल तथा सरुवा रोग अस्पताल टेकुका डा. शेरबहादुर पुनका अनुसार कोभिडले १२ वर्षमुनिका बालबालिकामा हनहन्ती ज्वरो आउने, जीउ र घाँटी दुख्ने, पखालालगायतका लक्षण देखिएको छ । ‘१२ वर्षमुनिका बालबालिकाले खोप नपाएकाले अलि बढी पीडादायक संक्रमण देखिएको हो,’ उनले भने ।

कोभिडको लक्षण लिएर पुग्ने बिरामीको संख्या बढे पनि गम्भीर अवस्थाका नरहेको कान्ति बाल अस्पतालका डा. रामहरि चापागाईंले बताए । ‘भर्ना हुनेहरूमा दोस्रो लहर जस्तो श्वासप्रश्वासमा समस्या हुने, निमोनिया देखिने, अक्सिजन दिनुपर्ने, भेन्टिलेटरमा राख्नुपर्ने अवस्था धेरैमा छैन,’ उनले भने । तर, उनी संक्रमितको संख्याभन्दा पनि दोस्रो लहरमा जस्तै पोस्ट कोभिड सिन्ड्रोम देखिने हो कि भनेर बढी सचेत रहनुपर्ने बताउँछन् ।

प्रकाशित : माघ ६, २०७८ ०८:१५
पूरा पढ्नुहोस्
प्रतिक्रिया
पठाउनुहोस्
×