तनहुँ जिप दुर्घटना : दुई दिनपछि मृतकका आफन्तले बुझे शव- गण्डकी - कान्तिपुर समाचार
कान्तिपुर वेबसाईट
AdvertisementAdvertisement

तनहुँ जिप दुर्घटना : दुई दिनपछि मृतकका आफन्तले बुझे शव

रासस

तनहुँ — शुक्रबार राति करिब ८ बजेको समयमा जिप दुर्घटनामा परी मृत्यु भएका छ जनामध्ये आइतबार साँझ चार जनाको शव आफन्तले बुझेका छन् । पीडित पक्ष, पीडक र प्रशासन प्रहरीबीच भएको त्रिपक्षीय छलफलमा सहमति जुटेपछि आफन्तजनले शव बुझेका हुन् ।

मृतकका परिवारलाई बीमाबापतको ५ लाख रुपैयाँका दरले क्षतिपूर्ति दिने र घाइतेको जिपका धनीले उपचार खर्च बेहोर्ने सम्झौता भएको हो । मृतकका परिवारलाई काजकिरीयाबापत ५० हजार रुपैयाँका दरले आजै प्रदान गरी बाँकी चार लाख ५० हजार रुपैयाँ २५ दिनभित्र बुझाउने सहमतिअनुरुप आफन्तजनले शव बुझेका हुन् ।

बन्दीपुर–६ का ५३ वर्षीय हरि न्यौपाने र ४८ वर्षीया सुशीलादेवी न्यौपानेबाहेकको शव आफन्तले बुझेको सामाजिक अभियानकर्मी सिद्धान्त थापामगरले जानकारी दिए । मृतक न्यौपानेद्वय श्रीमान्–श्रीमती हुन् । निजका छोरा रोजगारीको सिलसिलामा विदेशमा रहेकाले छोरा आएपछि शव बुझ्ने बताइएको छ ।

दुर्घटनामा परी मृत्यु भएका सोही स्थानका २४ वर्षीय रोशन गुरुङ, नौ महिनाकी आरुबी थापा, ४८ वर्षीय सन्तबहादुर गुरुङ र ५० वर्षीया बिमाया गुरुङको आइतबार परिवारले शव बुझी लगेका छन् । साराङघाटबाट बन्दीपुरतर्फ जाँदै गरेको ग१ज ६५५५ नंको जिप बन्दीपुर–६ धरमपानीमा दुर्घटना हुँदा छ जनाको मृत्यु भएको थियो भने सात सख्त घाइते भएका छन् ।

दुर्घटनामा परी घाइते भएका अन्य आठमध्ये दुई जना डिस्चार्च भई घर फर्किएको जिल्ला प्रहरी कार्यालय तनहुँका प्रहरी नायब उपरीक्षक युवराज खड्काले जानकारी दिए । अन्यको भरतपुर शिक्षण अस्पताल चितवनमा उपचार भइरहेको उनले बताए ।

प्रकाशित : माघ २, २०७८ १९:४६
प्रतिक्रिया
पठाउनुहोस्

अफगानिस्तानलाई सहयोग हस्तान्तरणपछि नेपाली टोली फिर्ता

कान्तिपुर संवाददाता

काठमाडौँ — मानवीय संकटमा फसेको अफगानिस्तानलाई नेपाल सरकारले सहयोग सामग्री हस्तान्तरण गरेको छ । सहयोग हस्तान्तरणपछि नेपाली टोली आइतबार नै स्वदेश फर्किएको छ ।


आइतबार बिहान नेपाल एयरलाइन्सको जहाजमा सहायता सामग्री लिएर अफगानिस्तान पुगेको नेपाली टोलीले कावुल अन्तर्राष्ट्रिय विमानस्थलस्थित संयुक्त राष्ट्र संघका महासचिवका उपविशेष प्रतिनिधि तथा अफगानिस्तानका लागि मानवीय तथा विकास संयोजक रामिज अलकबरोबलाई सो सहयोग हस्तान्तरण गरेको हो ।

आइतबार परराष्ट्र मन्त्रालयकी सहसचिव सेवा लम्सालको नेतृत्वमा अफगान जनतालाई आवश्यक औषधि, घरायसी सामग्री र लत्ता कपडा बोकेर नेपाली टोली अफगानिस्तान प्रस्थान गरेको थियो भने साँझ सो सहायता हस्तान्तरण गरेर नेपाल फर्किएको छ ।

सहयोग हस्तान्तरणपछि परराष्ट्र मन्त्रालयकी प्रवक्ता लम्सालले अफगान जनताका लागि सहायता सामग्री हस्तान्तरण गर्न पाउनु नेपालको लागि गोरवको विषय भएको प्रतिक्रिया दिएकी छन् । प्रवक्ता लम्सालका अनुसार उक्त सहायता उपलब्ध गराउने काम परराष्ट्रमन्त्री डा. नारायण खड्काको पहलबाट सम्भव भएको थियो। मन्त्री खड्काको नेतृत्वमा नेपाली टोली अफगानिस्तान गएको थियो ।

प्रकाशित : माघ २, २०७८ १९:३३
पूरा पढ्नुहोस्
प्रतिक्रिया
पठाउनुहोस्
×