लथालिंग आइसोलेसन- गण्डकी - कान्तिपुर समाचार
कान्तिपुर वेबसाईट
AdvertisementAdvertisement

लथालिंग आइसोलेसन

आइसोलेसन र आईसीयू तयारी अवस्थामा राखेको भने पनि जनशक्ति नहुँदा अक्सिजन, भेन्टिलेटर अलपत्र अवस्थामा छन्
घनश्याम खड्का

म्याग्दी — कोरोना महामारीको तेस्रो लहर सुरु भइसक्दा पनि म्याग्दीमा भने यसका लागि कुनै तयारी गरिएको छैन । कोरोनाको पहिलो र दोस्रो लहरमा स्थापना गरिएको अक्सिजन जडित भेन्टिलेटर र आईसीयूसहितको आइसोलेसनका संरचना यतिबेला लथालिंग अवस्थामा छन् । संक्रमणको प्रभाव कमजोर भै लकडाउन हटेसँगै कोरोना परीक्षण तथा उपचारको तरिका परिवर्तन गरिएको थियो । 

म्याग्दीको सदरमुकामस्थित बेनी अस्पताल । उक्त अस्पतालमा न्यूनतम सेवा मापदण्ड (एमएसएन) अनुसारको भौतिक पूर्वाधार र दक्ष जनशक्ति व्यवस्थापन हुन नसक्दा कागजी अस्पतालमा सीमित भएको छ ।  तस्बिर : घनश्याम/कान्तिपुर

बेनी अस्पतालमा सञ्चालनमा ल्याइएको आइसोलेसनमा जनरल वार्ड राखिएको छ । आइसोलेसन भवनबाट मात्र होइन, पूरै सञ्चालन उपकरण, स्वास्थ्यकर्मीसहित प्रणाली नै भताभुंग भएको हो । जिल्ला कोभिड संकट व्यवस्थापन समितिका सदस्य सचिव एव स्वास्थ्य कार्यालय प्रमुख एकनारायण लम्साल कोरोना संक्रमणको तेस्रो भेरिएन्टको जोखिम सामना गर्न जिल्लामा तयारी थालेको दाबी गर्छन् । निष्क्रिय बनेका स्वास्थ्यकर्मीसहितको टिम, आइसोलेसन, आईसीयूहरू तयारी राख्न जुटेको उनले बताए । भने, ‘बेनी अस्पतालमा २० बेड र सबै ५ वटा पालिकामा रहेका कोभिड अस्पतालमा ५–५ बेडका आइसेलोसन तयारी हालतमा राखिएको छ ।’

आइसोलेसन र आईसीयू तयारी अवस्थामा राखेको भने पनि जनशक्ति नहुँदा अक्सिजन, भेन्टिलेटर अलपत्र अवस्थामा छन् । अन्नपूर्ण गाउँपालिकाको कोभिड अस्पतालमा डाक्टरसमेत छैनन् । स्वास्थ्य कार्यालय प्रमुख लम्सालका अनुसार साधारण संक्रमितलाई होम आइसोलेसनमा बस्न लगाउने, जटिल भएका बिरामी मात्र कोभिड अस्पताल ल्याउने तथा सदरमुकाम बेनी समेत बजार क्षेत्रमा घरमै आइसोलेसन/क्वारेन्टाइन बस्न नसक्ने (डेरामा बस्ने) संक्रमितलाई बेनीमा एक क्वारेन्टाइन बनाउने पनि निर्णय गरेको छ ।

गण्डकी प्रदेश सरकारले पठाएका ४ वटा भेन्टिलेटर मात्र बेनी अस्पतालमा रहेका छन् । बेनी अस्पतालमा मात्र होइन, स्थानीय तहमा सञ्चालित कोरोना अस्पतालमा पनि आईसीयू र भेन्टिलेटर छैनन् । बेनी अस्पतालमा भेन्टिलेटर भए पनि यी प्रयोगमा छैनन् । बेनी अस्पतालले ५ बेड क्षमताको आईसीयू र भेन्टिलेटर उपलब्ध भए पनि जनशक्ति अभाव हुँदा आईसीयू सञ्चालन गर्न नसकिने जनाएको छ । आईसीयू सञ्चालन गर्ने र बिरामीलाई भेन्टिलेटर चलाएपछि २४ सै घन्टा चल्नुपर्छ । त्यसका लागि कम्तीमा ३ जना मेडिकल डाक्टर र १२ जना स्टाफ नर्स आवश्यक पर्ने अस्पतालले जनाएको छ ।

बेनी अस्पतालका प्रमुख सुपरिन्टेन्डेन्ट डाक्टर जीतेन्द्र कँडेलले अहिले बेनी अस्पतालमा २ बेडको अस्थायी प्रि–आइसोलेसन राखे पनि आइसोलेसन र आईसीयू सञ्चालन गर्ने जनशक्ति नहुँदा कार्यान्वयनमा नआएको बताए । भने, ‘आईसीयू सञ्चालन गर्ने र बिरामीलाई भेन्टिलेटरमा राखेपछि एकजना डाक्टर र स्टाफ नर्स २४ सै घन्टा स्ट्यान्डबाइ रहनुपर्छ । मनिटरिङ गर्न मुख्य समस्या हो । नियमित बिरामी परीक्षण र उपचारमै डाक्टर अभाव छ ।’

कोभिड फोकल पर्सन सुरत केसीका अनुसार बिहीबारसम्म बेनीमा ८ जना, अन्नपूर्णमा २ जना, रघुगंगामा ३ र धवलागिरी गापामा १ जना गरी जिल्लामा १४ जना सक्रिय संक्रमित होम आइसोलेसनमा छन् । पछिल्लो एक सातामा यी संक्रमित थपिएका हुन् । स्वास्थ्य कार्यालयका अनुसार जिल्लाका १८ वर्ष माथिका ५८ हजार बढी नागरिकले कोभिडविरुद्धको पूर्ण खोप पाएका छन् । थप १० हजार बढीले पहिलो मात्र खोप लगाएका छन् । त्यस्तै १२–१७ वर्ष उमेर समूहका ११ हजार २ सय ७८ जना बालबालिकाले कोरोनाविरुद्धको पहिलो मात्रा खोप लगाएका छन् । बालबालिकाको लक्षित संख्याको ९० प्रतिशत खोप समेटिएको हो ।

‘यो इस्टिमेटेड जनसंख्या हो । व्यवहारमा हेर्ने हो भने वयस्कहरूमा ७० प्रतिशत बढीले खोप पाएको र बालबालिकामा करिब सबैले पहिलो खोप पाएको स्वास्थ्यकर्मीको रिपोर्ट छ,’ स्वास्थ्य कार्यालय प्रमुख एकनारायण लम्सालले दाबी गरे ।

प्रकाशित : पुस ३०, २०७८ ०९:३८
प्रतिक्रिया
पठाउनुहोस्

९४ प्रतिशत संक्रमित घरमै

संक्रमण बढेपछि आइसोलेसन सञ्चालन गर्न समुदायस्तरबाट माग
सुवास विडारी

मकवानपुर — वाग्मती प्रदेशका करिब ९४ प्रतिशतभन्दा बढी कोरोना संक्रमित होम आइसोलेसन मै बसिरहेका छन् । स्वास्थ्यकर्मीका अनुसार प्रदेशका अधिकांश संक्रमितहरू सिटामोलको भरमा घरमै छन् ।

दैनिकजसो संक्रमित बढे पनि उपचारका लागि अस्पताल जाने वा संस्थागत आइसोलेसनमा बस्नेको संख्या न्यून रहेको वाग्मती प्रदेश स्वास्थ्य मन्त्रालयले जनाएको छ । मन्त्रालयका अनुसार बिहीबार साँझसम्म वाग्मती प्रदेशमा ९ हजार ९ सय २७ जना सक्रिय संक्रमित छन् । जसमध्ये ९४ प्रतिशत अर्थात् ९ हजार ३ सय ९४ जना होम आइसोलेसनमा छन् ।

मन्त्रालयको तथ्यांकअनुसार १ सय ७७ जना संस्थागत आइसोलेसनमा र ३ सय ५६ जना अस्पतालमा उपचाररत छन् । मन्त्रालयका प्रवक्ता वसन्त अधिकारीका अनुसार संक्रमितको स्वाब परीक्षण गर्ने र उपचार गर्ने जिम्मेवारी जिल्ला अस्पतालाई दिइएको छ । ‘हामीले जिल्ला अस्पतालमा संक्रमितको उपचार गर्ने व्यवस्था मिलाएका छौं । उनीहरूसँग समन्वय गर्ने जिम्मेवारी जिल्ला स्वास्थ्य कार्यालयलाई तोकेका छौं,’ उनले भने ।

हेटौंडा उपमहानगरका जनस्वास्थ्य अधिकृत भोला चौलागाईंले संक्रमण दर बढेपछि आइसोलेसन सञ्चालन गर्ने माग समुदायस्तरबाट आएको बताए । तर ठोस निर्णय नभइसकेको उनले बताए । ‘कोरोनाको पहिलो र दोस्रो लहरमा हामी जसरी सक्रिय भएका थियौं अहिले छैनौं,’ चौलागाईंले भने । उनले संक्रमित बढेपछि अब कसरी अगाडि बढ्ने भनेर स्थानीय तहबीच समन्वय हुन बाँकी रहेको बताए ।

संक्रमितको पहिचान गरी आवश्यक उपचार गर्न प्रदेशको १३ जिल्लामध्ये रसुवाबाहेक सवैमा स्वाब परीक्षण गर्न पीसीआर ल्याब स्थापना गरिएको मन्त्रालयको दाबी छ । रसुवामा पीसीआर ल्याबको आवश्यकता नदेखिएका कारण स्थापना नगरेको मन्त्रालयले जनाएको छ ।

मन्त्रालयले अक्सिजनको अभाव नहोस् भनेर १२ वटा जिल्ला अस्पतालमा अक्सिजन प्लान्टको स्थापना गरिसकेको उनले बताए । ‘धादिङमा दुईवटा अक्सिजन प्लान्ट रहेका छन् । जसमध्ये एउटा रसुवामा जोड्ने तयारी भइरहेको छ,’ प्रवक्ता अधिकारीले भने । उनका अनुसार रसुवामा संक्रमितको संख्या ज्यादै न्यून रहेको र अक्सिजनको माग पनि नभएका कारण प्लान्ट स्थापना गर्न ढिलाइ गरिएको हो ।

बालबालिकाले खोप पाएनन्

सिन्धुली जिल्लामा १२ देखि १७ वर्ष उमेर समूहका विद्यार्थीले अझै कोरोनाविरुद्धको खोप लगाउने सुनिश्चतता पाएका छैनन् । खोप नआएकाले लगाउने टुंगो नभएको स्वास्थ्य कार्यालयले जनाएको छ । नयाँ भेरिएन्ट ओमिक्रोनको सम्भावित जोखिम रोक्न र १८ वर्षमुनिकालाई खोप लगाउन सरकारले माघ १५ गतेसम्म विद्यालय बन्द गरेको छ ।

१२ देखि १७ वर्ष उमेर समूहका विद्यार्थीलाई नजिकको स्वास्थ्य संस्थामा खोप लगाउन निर्देशन दिए पनि सिन्धुलीमा खोप अझै नआएकाले समस्या भएको स्वास्थ्य कार्यालय प्रमुख जितेन्द्र साहले बताए । पहिलो चरणमा खोप लगाउने उक्त उमेर समूहका विद्यार्थीको संख्या जिल्लामा ४० हजार ७ सय रहेको आंकलन छ । जिल्लाभरका सरकारी तथा निजी विद्यालयबाट तथ्यांक संकलन गरी सबै तयारी पूरा भए पनि खोपको मात्रा नै नभएपछि अन्योल भएको स्वास्थ्य कार्यालयले जनाएको छ ।

प्रकाशित : पुस ३०, २०७८ ०९:३३
पूरा पढ्नुहोस्
प्रतिक्रिया
पठाउनुहोस्
×