म्याग्दीका मोटरेबल पुलमा स्थानीयको हानथाप

बेनी–जोमसोम सडक खण्डमा गलेश्वर–पिप्ले जोड्ने राहुघाट खोला, तिप्ल्याङ र महभीर जोड्ने कालीगण्डकी तथा पोखरे र तातोपानी जोड्ने कालीगण्डकी नदीमाथि ११ मिटर चौडाइको मोटरेबल पुल निर्माण भएका छन् । जसले गर्दा राहुघाट खोलाको एक सय फिट लामो, तिप्ल्याङको १ सय ५० फिट लामो र पोखरेबगरको १ सय ६० फिट लामो बेलिब्रिज प्रयोगविहीन बनेका हुन् ।

२०५८ सालदेखि निर्माण सुरु गरी २०६५ मा बेनी–जोमसोम ७६ किमि पाइलट ट्र्याक सडक विभागलाई हस्तान्तरण गर्नुअघि ९ वटा बेलिब्रिज पनि समावेश थिए । कालीगण्डकी करिडोर बेनी–जोमसोम–कोरोला सडक आयोजनाले भने यहाँ प्रयोगहीन बनेको बेलिब्रिज झिकेर आयोजनाअन्तर्गतकै बेगखोला, रुप्से र खहरे खोलामा राख्न चाहे पनि विभागले यसबारे निर्णय दिइसकेको छैन ।

‘हामीले यहाँका बेलिब्रिज झिकेर आयोजनाअन्तर्गतकै बेगखोला, रुप्सेखोला र मुस्ताङको घाँसामुनिको खहरे खोलामा राख्न चाहेका छौं,’ बेनी–जोमसोम–कोरोला सडक आयोजना प्रमुख जगत प्रजापतिले भने, ‘बेगखोला र रुप्सेमा बेलिब्रिजसमेत नहुँदा बर्खायाममा यात्रुले सास्ती पाएका छन् । यातायात नै अवरुद्ध हुन्छ । तर हामी एक्लैले यी बेलिब्रिज कहाँ राख्ने निर्णय गर्न सक्दैनौं । विभागले निर्णय गर्नुपर्छ ।’

बेनी–जोमसोम सडकको म्याग्दी खण्डमा पर्ने राहुघाट र कालीगण्डकीमा प्रयोगहीन बनेका बेलिब्रिजलाई आ–आफ्नो क्षेत्रमा लैजान सत्तारूढ र प्रमुख प्रतिपक्षी दलका नेताबीच रस्साकसी सुरु भएको छ । राष्ट्रिय सभा अध्यक्ष गणेश तिमिल्सिनासहित स्थानीय कांग्रेस नेताहरू पर्वतको जलजला–२ बगरफाँट र र म्याग्दी सदरमुकाम बेनी जोड्ने कालीगण्डकी नदीमा बेलिब्रिज राख्न लबिइङ गरिरहेका छन् । म्याग्दीका नेताहरू भने पुल पश्चिम मंगला गापाअन्तर्गत म्याग्दी खोलामा लैजान चाहेका छन् ।

‘बेलिब्रिज धेरै स्थानमा आवश्यक छ । तर पहिलो प्राथमिकता बेनी–जोमसोम सडककै बेगखोला र रुप्सेलाई राखेर अर्को पुल आवश्यकताका आधारमा जिल्लाभित्र नै प्रयोग गर्नुपर्छ,’ रघुगंगा गाउँपालिका अध्यक्ष भवबहादुर भण्डारीले भने, ‘दुई वटा बेलिब्रिज रघुगंगा गापालाई जोड्ने भएकाले स्थानीय सरकारलाई बाइपास गरी अन्यत्र लैजानु उपयुक्त हुँदैन ।’