कांग्रेस गण्डकीमा पौडेल समूहका शर्मा विजयी- गण्डकी - कान्तिपुर समाचार
कान्तिपुर वेबसाईट
AdvertisementAdvertisement

कांग्रेस गण्डकीमा पौडेल समूहका शर्मा विजयी

लालप्रसाद शर्मा

पोखरा — कांग्रेस गण्डकी प्रदेशको प्रथम अधिवेशनबाट वरिष्ठ नेता रामचन्द्र पौडेल समूहका शुक्रराज शर्मा विजयी भएका छन् । उनले संस्थापन देउवा पक्षका अर्जुनप्रसाद जोशीलाई ८४ मतले पराजित गरे । विजयी शर्माले ६ सय १२ मत पाए भने जोशीले ५ सय २८ मत पाए ।

यसैगरी एक उपसभापतिमा बाहेक अन्य पदाधिकारीमा शर्मा प्यानलका विजयी बने । संस्थापन पक्षका मेखलाल श्रेष्ठलेमात्र उपसभापतिमा जिते । शर्मा प्यानलकी कल्पना तिवारीले उपसभापतिमा जितिन् । महामन्त्रीमा शर्मा प्यानलकै विष्णुप्रसाद लामिछाने र किरणबाबु श्रेष्ठले बाजी मारे । यसैगरी ३ सहमहामन्त्रीमा शर्मा प्यानलका कोपीला रानाभाट, रामचन्द्र जोशी र रमेशकुमार पाण्डेले विजयी हासिल गरेका छन् ।

पौडेल समूहबाट सभापतिमा आकांक्षी बढी भएपछि पार्टी महामन्त्री शशांक कोइरालासमेतको छलफलपछि शर्मालाई एकल उम्मेदवार बनाइएको थियो । अन्यत्र जस्तै गण्डकीमा पनि संस्थापन देउवा पक्ष र इतरको पौडेल पक्षधर प्यानल बनाएर निर्वाचनमा होमिएका थिए ।

शनिबार भएको मतदानको आइतबार बिहान मतगणना सकिएको थियो । एक हजार एक सय ६५ मतदातामध्ये एक हजार एक सय ४६ मत खसेको थियो । सभापतिमा निर्वाचित शर्मा २०४५ देखि २०६१ सम्म कास्की कांग्रेसको सभापति थिए । २०४८, २०५१ र २०७४ को आम निर्वाचनमा प्रतिनिधिसभा सदस्यको उम्मेदवारी भए पनि उनी पराजित बनेका थिए । राष्ट्रिय सभा सदस्यसमेत भएका उनी कांग्रेसको आमन्त्रित केन्द्रीय सदस्य पनि भएका थिए ।

प्रकाशित : मंसिर १९, २०७८ ०७:२५
प्रतिक्रिया
पठाउनुहोस्

सिटी पहिलो पल्ट शीर्षमा

एजेन्सी

लन्डन — इंग्लिस प्रिमियर लिगमा म्यानचेस्टर सिटीले शनिबार वाटफोर्डलाई २–१ ले हराएर यो सिजन पहिलो पल्ट शीर्ष स्थानमा उक्लेको छ । यस जितमा सिटीका लागि रहिम स्टर्लिङ र बर्नार्डो सिल्भाले गोल गरे ।

वाटफोर्डका लागि कुचो हर्नान्डेजले एक गोल फर्काए । यो नतिजापछि सिटीको ३५ अंक भएको छ । लिभरपुल दोस्रो स्थानमा छ र उसको ३४ अंक छ । लिभरपुलले अर्को खेलमा उल्भ्सलाई १–० ले हरायो ।

यसअघि शीर्ष स्थानमा रहेको चेल्सी वेस्ट ह्यामसँग ३–२ ले पराजित रह्यो र तेस्रो स्थानमा झर्‍यो । दिनका अन्य खेलमा न्युकासलले बर्नलीलाई १–० ले हरायो भने साउथह्याम्पटन र ब्राइटनले १–१ को बराबरी खेले ।

प्रकाशित : मंसिर १९, २०७८ ०७:२२
पूरा पढ्नुहोस्
प्रतिक्रिया
पठाउनुहोस्
×