लमजुङ कांग्रेसको महासमिति सदस्य निर्वाचन अनिश्चित- गण्डकी - कान्तिपुर समाचार
कांग्रेस महाधिवेशन

लमजुङ कांग्रेसको महासमिति सदस्य निर्वाचन अनिश्चित

कान्तिपुर संवाददाता

लमजुङ — कांग्रेस लमजुङको महासमिति सदस्य निर्वाचन अनिश्चित बनेको छ । मंसिर ८ मा जिल्ला कार्यसमिति र महाधिवेशन प्रतिनिधि निर्वाचनको मतपरिणाम सार्वजनिक भइसके पनि महासमिति निर्वाचनको छनक छैन ।

जिल्ला अधिवेशनसँगै महाधिवेशन प्रतिनिधि छानिएपछि तत्कालै अगाडि बढाउनुपर्ने महासमिति निर्वाचन प्रक्रिया हालसम्म पनि अघि बढेको छैन । प्रक्रिया अघि बढाएमा निर्वाचन गर्नुपर्ने अवस्था आउने र सकेसम्म सहमतिको आधारबाट महासमिति सदस्य छान्ने गरी छलफल अघि बढाइएको नेताले बताएका छन् ।

कांग्रेसको विधानअनुसार केन्द्रीय महाधिवेशन प्रतिनिधिमध्येबाट २ महिलासहित ७ प्रत्यक्ष र महिला, दलित, आदिवासी जनजाति, खसआर्य, मधेसी, थारू, मुस्लिम, पिछडिएको क्षेत्रबाट ४ जना प्रतिनिधिसभा क्षेत्रको जनसंख्याको बनोटअनुसार समानुपातिक आधारमा केन्द्रीय महासमिति सदस्य निर्वाचित गर्नेछ । विधानअनुसार २७ महाधिवेशन प्रतिनिधिबाट ११ जना महासमितिमा छानिनेछन् । सर्वसम्मत हुन नसकेमा निर्वाचनका लागि प्रतिनिधि छानिएकाले पुनः मतदान गर्नुपर्ने हुन्छ । यो झन्झटबाट मुक्त हुन कांग्रेसले सहमतिको आधारमा महासमिति छान्न छलफल अघि बढाएको जनाएको छ । २७ जना महाधिवेशन प्रतिनिधिमा १० जना संस्थापन अर्थात् देउवा पक्ष र १७ जना संस्थापनइतर वरिष्ठ नेता रामचन्द्र पौडेल र कोइराला पक्षधरलगायत छन् ।

महासमिति सदस्य छान्ने काम तुरुन्तै बढाउनुपर्ने भए पनि निर्वाचन प्रक्रियामा थाकिएकाले सहमतिको आधार तयार गर्न स्थगित गरिएको कांग्रेस निर्वाचन अधिकृत थानेश्वर दवाडीले बताए । ‘यसअघिका सभापति र नवनिर्वाचित सभापतिसँग छलफल गर्दा एकपटक सहमतिको प्रयास गर्ने र सफल भए घोषणा गर्ने, नभए चुनावी प्रक्रियामा अघि बढ्ने भन्नुभयो । त्यहीअनुसार छलफलको जिम्मा उहाँहरूलाई दिएको छु,’ उनले भने ।

नवनिर्वाचित सभपाति डा. टकराज गुरुङले जिल्ला अधिवेशन सकिएलगत्तै महासमिति सदस्य चुनिहाल्नुपर्ने भए पनि महाधिवेशन प्रतिनिधि सबै काठमाडौं गइसकेको र प्रदेश अधिवेशनपछि छलफल अघि बढाइने बताए । महाधिवेशन प्रतिनिधिबाट महासमिति सदस्य छान्नुपर्ने भएकाले यो कार्य जटिल भएको र महाधिवेशन प्रतिनिधिबीच नै छलफल गरेर सकेसम्म सहमतिबाट महासमिति सदस्य छानिने उनले बताए ।

प्रकाशित : मंसिर १३, २०७८ १२:१४
प्रतिक्रिया
पठाउनुहोस्

मनोनयन शुल्क चर्को

कान्तिपुर संवाददाता

नेपालगन्ज — नेपाली कांग्रेसले १४ औं महाधिवेशनका लागि बाँकेका अधिकांश वडा तथा नगर/ गाउँपालिकास्तरीय अधिवेशन सम्पन्न गरेको छ । केही वडा तथा पालिकाका अधिवेशन विवादकै कारण ढिलो गरी सकियो ।

महासमिति सदस्य तथा जिल्ला सभापतिका लागि निर्वाचन हुन बाँकी छ । कांग्रेस बाँके अधिवेशनमा देखिएको गुट/उपगुटको चर्चासँगै मनोनयनका लागि तोकिएको शुल्कसमेत चर्चाको विषय बनेको छ । वडादेखि नगर क्षेत्रको उम्मेदवारीका लागि १ हजार ५ सयदेखि ८ हजार रुपैयाँसम्म मनोनयन शुल्क तोकिएको थियो । ‘कमजोर आर्थिक अवस्था भएकालाई उम्मेदवार बन्ने बाटो नै रोकेको छ ।

यसपटकको मनोनयन शुल्कले पैसावालमात्र उम्मेदवार बन्न सक्ने अवस्था आयो,’ कांग्रेस नेता तप्त पौडेलले भने, ‘शुल्क निकै चर्को भयो ।’

निर्वाचन समितिले दिएको जानकारी अनुसार एउटै वडाबाट ४० हजार रुपैयाँसम्म उठेको छ । ‘जिल्ला सभापतिको निर्वाचनपछि आर्थिक हिसाब गर्छौं,’ निर्वाचन समिति आर्थिक व्यवस्थापक अधिकारी अधिवक्ता मेयर सिंह खत्रीले भने, ‘निर्वाचनबाट उठेको सबै रकम मतदानमा खटिएका कर्मचारी, व्यवस्थापन र पारिश्रमिकमा खर्च गर्छौं ।’ उनका अनुसार बाँकेमा मात्रै कांग्रेस निर्वाचनबाट १५ लाख रुपैयाँसम्म उठ्ने अनुमान छ ।

प्रकाशित : मंसिर १३, २०७८ १२:०९
पूरा पढ्नुहोस्
प्रतिक्रिया
पठाउनुहोस्
×