पूर्वाधारमा सक्षम बन्दै स्थानीय तह- गण्डकी - कान्तिपुर समाचार

पूर्वाधारमा सक्षम बन्दै स्थानीय तह

पूर्वाधार निर्माणमा जोड दिएका पालिकाले मुख्य गरी भवन र सडकलाई प्राथमिकतामा राखेका छन्
अगन्धर तिवारी

पर्वत — मोदी गाउँपालिकाले गत बैसाखदेखि आफ्नै भवनबाट सेवा सुरु गरेको छ । फलेबास नगरपालिका, बिहादी र महाशिला गाउँपालिकाले पनि स्थायी संरचना निर्माण गरेर पालिकाको आर्थिक भार घटाउनतर्फ लागेका छन् ।

स्थानीय तह कार्यान्वयनमा आएदेखि नै भाडाका घरमा बस्दै आएका कुश्मा, जलजला र पैयुं गाउँपालिकाबाहेकका चार स्थानीय तहले चार वर्षमै आफ्नो कार्यालय बनाएका छन् । स्थानीय तहमध्ये मोदी गाउँपालिकाले सबै पालिकालाई उछिन्दै आफ्नै स्थायी संरचना निर्माण गरेर सेवा सुरु गरेको हो । मोदीका प्रमुख प्रशासकीय अधिकृत किसानबहादुर क्षेत्रीका अनुसार जनप्रतिनिधि र स्थानीयवासीको सक्रियतामा करिब एक वर्षको अवधिमै प्रशासकीय भवनको काम पूरा भएको हो ।

‘मुख्य भवन अझै निर्माणकै चरणमा छ । तीन महिनाभित्रै त्यो भवन बनेपछि सबै विषयगत कार्यालयले आफ्नै भवनबाट सेवा दिन्छन्,’ उनले भने, ‘यहि कार्यकालका जनप्रतिनिधिले केहि माहिना आफ्नै कार्यालयबाट सेवा दिने गरी काम अघि बढाइएको छ ।’ यसै वर्षभित्र स्थानीय तहको निर्वाचन भए पनि त्यस अगावै प्रशासकीय भवनको सबै काम सकिने उनले बताए । मोदीमा २ वर्षअघि स्थानीय रामचन्द्र तिमिल्सिना, देवराज गिरी, टिकराम पौडेल, डिल्लीराम पौडेल, धर्मप्रसाद पौडेल, नेत्रप्रसाद पौडेल, प्रेम पौडेललगायतको अगुवाइमा नगद संकलन सुरु गरिएको थियो ।

एक वर्षभित्रै गाउँपालिकाका लागि पर्याप्त जग्गा जुटाउने अभियानमा उनीहरूले ८ महिनामै ८० लाख नगद र १२ रोपनी जग्गा जुटाएका थिए । २०७७ वैशाखमै १२ रोपनी जग्गा र ८० लाख नगद जुटाएका स्थानीयले प्रशासकीय भवन निर्माण सुरु गरेका थिए । एक वर्षमै दुईतले प्रशासकीय भवन निर्माण गरेपछि पालिकाको मुख्य प्रशासनिक काम आफ्नै भवनबाट सुरु भएको हो । त्यसअघि पालिकाले मासिक करिव १ लाख रुपैयाँ भाडा तिर्दै आएको थियो ।

मासिक ४० हजार भाडा दिने गरी ९ कोठे भवन भाडामा लिएर सेवा दिइरहेको पैयुं गाउँपालिकालाई गतवर्ष स्थानीयले १२ रोपनी ५ आना जग्गा दिएका छन् । गाउँपालिको स्थायी भवन बनाउनका लागि पैयुं–४ शेरा भकुन्डेमा स्थानीयले करिव डेढ करोडभन्दा बढी मूल्यबराबरको जग्गा निःशुल्क दिएका हुन् । पैयुंका विभिन्न वडाका ३० जनाले आफ्नो जग्गा दिएको गाउँपालिका अध्यक्ष खगेन्द्रप्रसाद तिवारीले बताए । उनका अनुसार जग्गा प्राप्तीसंगै गाउँपालिकाले प्रशासकीय भवन निर्माण थालेको छ । करिब दुई वर्ष भाडामा बसेपछि स्थानीय सिँचाइको भवनमा अस्थायी संरचना बनाएर सेवा दिएको फलेबास नगरपालिकाले स्थायी प्रशासकीय भवन निर्माण सुरु गरिसकेको छ । नगरपालिकाको ५ नम्बर वडास्थित झकलकको टुटुङ्गाचौरमा प्रशासकीय भवन निर्माण थालेको पालिकाले एक वर्षभित्रै निर्माण सक्ने नगरप्रमुख पदमपाणि शर्माले बताए ।

कुश्मा नगरप्रमुख रामचन्द्र जोशीका अनुसार नगरपालिकाको नाममा रहेको कुश्मा–५ स्थीत बडागाउँमा भवन निर्माणको प्रकृया शुरु भएको छ । ‘अस्थायी टहरा हटाएर जग्गा सम्याइसकेका छौं,’ उनले भने, ‘अब कानुनी प्रक्रिया पूरा गरेर भवन निर्माण सुरु गर्छौं ।’ सुरुदेखि नै मासिक ३० हजार भाडा तिर्दै आएको बिहादी गाउँपालिकाले पनि गएको फागुनदेखि नै आफ्नै भवनबाट सेवा सुरु गरेको छ । पालिकाले आफ्नै स्रोत जुटाएर भवन निर्माण गरेको र अधिकांश विषयगत कार्यालय आफ्नै भवनबाट सञ्चालन गरेको अध्यक्ष कमल भुसालले बताए । महाशिलाका प्रवक्ता जीवन उचैठकुरीका अनुसार महाशिलाले वडा नम्बर ३ बालाकोटको तत्कालीन गाविस भवनलाई विस्तार गरेर आफ्नै भवनबाट सेवा दिइरहेको छ । जलजला गाउँपालिकाका अध्यक्ष यामबहादुर मल्लका अनुसार पालिकाको प्रशासकीय भवनका लागि जग्गाको खोजी भइरहेको छ । करिब दुई वर्ष स्थायी केन्द्रको टुंगो नलागेका कारण प्रशासकीय भवनको टुंगो नलागेको तर केन्द्रको टुंगो लागेपछि जग्गा प्राप्तिसँगै प्रक्रिया अघि बढाइएको उनले बताए ।

कुश्मा र मोदीका अधिकांश वडा कार्यालयको समेत भवन निर्माण सम्पन्न भइसकेको छ । केही निर्माणको चरणमा छन् । त्यति मात्रै होइन, स्थानीय तहले आफ्नो पालिकाभित्रका मुख्य सडक कालोपत्र तथा विस्तारका कामलाई तीव्रता दिएका छन् । पूर्वाधार निर्माणमा जोड दिएका पालिकाहरूले मुख्य गरी भवन र सडकलाई प्राथमिकता दिएका छन् ।

प्रकाशित : मंसिर १२, २०७८ ११:३९
प्रतिक्रिया
पठाउनुहोस्

कांग्रेस सुर्खेत सभापतिमा देउवा पक्षका पोखरेल निर्विरोध

चाँदनी कठायत

वीरेन्द्रनगर — नेपाली कांग्रेस सुर्खेतको सभापतिमा संस्थापन पक्षका खड्ग पोखरेल निर्विरोध निर्वाचित भएका छन् । नयाँ कार्यसमितिका लागि शनिबारदेखि सुरु भएको निर्वाचनमा प्रक्रियामा सभापतिमा पोखरेलबाहेक अन्य कसैको पनि उम्मेदवारी नपरेपछि उनी निर्विरोध निर्वाचित भएका हुन् ।



महाधिवेशन प्रतिनिधिमा रामचन्द्र पौडेल समूहबाट कुनै व्यक्ति व्यक्ति निर्वाचित नभएपछि पोखरेलको एकल उम्मेदवारी परेको थियो । निर्वाचन समितिले शनिबार राति सभापतिमा पोखरेललाई निर्विरोध निर्वाचित घोषणा गरेको हो ।

सिम्ता गाउँपालिका राकम घर भएका पोखरेल यसअघि दुई कार्यकाल कांग्रेसको क्षेत्र नं १ को क्षेत्रीय सभापतिसमेत बनेका थिए । उपसभापतिसहितका बाँकी पदहरूमा भने आइतबार निर्वाचन हुनेछ । सोही पक्षबाट उपसभापतिमा विष्णु खड्का र टोपबहादुर रावत, सचिवमा देवकुमार सुवेदी र बालदिप कँडेल सह–सचिवमा हरि विष्ट र प्रकाश डिसी चुनावी मैदानमा छन् ।

रामचन्द्र पौडेल पक्षबाट भने महाधिवेशन प्रतिनिधिमा पौडेल पक्षलाई संस्थापन पक्षले क्लिन स्वीप गरेपछि सभापति बाहेकका पदका लागि चुनावी मैदानमा छन् । उप सभापतिमा टेकबहादुर सिंह र शोभा शर्मा, सचिवमा अनन्त पौडेल र जनकबहादुर रावल तथा सहसचिवमा भिमबहादुर शाही र लोकबहादुर पन्त छन् । निर्वाचन बिहान ११ बजेबाट सुरु भएर साँझ ५ बजे मतदान गर्ने समय रहेको निर्वाचन अधिकृत मदन रेग्मीले जानकारी दिए ।

प्रकाशित : मंसिर १२, २०७८ ११:३६
पूरा पढ्नुहोस्
प्रतिक्रिया
पठाउनुहोस्
×