पूर्वी नवलपरासी क्षेत्र २ मा अझै भएन पुन: मतगणना- गण्डकी - कान्तिपुर समाचार

पूर्वी नवलपरासी क्षेत्र २ मा अझै भएन पुन: मतगणना

नारायण शर्मा

पूर्वी नवलपरासी — पूर्वी नवलपरासी नेपाली कांग्रेस क्षेत्र नम्बर २ मा ३ दिन भइसक्दा पनि पुन: मतगणना हुन सकेको छैन । क्षेत्रीय सभापतिका २ उम्मेदवारको मत बराबर भएपछि पुन: मतगणना गर्ने सहमति भएको थियो ।

मतगणना सकिएको ३ दिन बितिसक्दा पनि उम्मेदवार र तिनका एजेन्ट मत गणनास्थल (कांग्रेस पार्टी कार्यालय कावासोती) मा नआएका कारण निर्वाचन समितिले गणना सुरु गर्न सकेको छैन ।

बुधबार बिहान ५ बजे क्षेत्रीय सभापतिका उम्मेदवार सूर्य गुरुङको ३९४ र जगत कार्कीको पनि ३९४ मत भएपछि उम्मेदवारकै सहमतिमा पुन: मतगणना गर्ने निधो भएको थियो । फेरि गन्न दुबैको सहमति भए पनि पार्टी कार्यालयमा कोही पनि उपस्थित नभएका कारण मत गन्न नसकिएको हो । कार्की कांग्रेस सभापति शेरबहादुर देउवा पक्षबाट र गुरुङ वरिष्ठ नेता पौडेल पक्षबाट उम्मेदवार बनेका थिए ।

मतपेटिका जिल्ला प्रहरी कार्यालय कावासोतीमा राखिएको छ । त्यो (क्षेत्र नम्बर २) क्षेत्रको मतदान चोरमाराको स्कुलमा भएको थियो । मतदान अधिकृत चुडामणि कँडेलले प्रतिनिधि आए पनि, नआएपनि शनिबार बिहान १० बजेबाट मतगणना गरी नतिजा सार्वजनिक गरिने जनाए ।

त्यहाँको मतगणना नभएको बहाना बनाउँदै नेताहरुले जिल्ला कार्यसमितिको निर्वाचन मंसिर १९ र २० गते गर्ने भएका छन् । '१९ गते मनोनयन हुन्छ, २० गते मतदान', निर्वाचन अधिकृत कँडेलले भने । उम्मेदवार सूर्य गुरुङले शनिबारको मतगणनामा आफूहरु उपस्थित हुने कान्तिपुरलाई जानकारी दिए ।


प्रकाशित : मंसिर १०, २०७८ २०:३१
प्रतिक्रिया
पठाउनुहोस्

एमाले महाधिवेशनसंगै चितवनमा सवारी अस्तव्यस्त

कान्तिपुर संवाददाता

काठमाडौँ — नेकपा एमालेको १०औं महाधिवेशनका कारण चितवनको विभिन्न स्थानका सडकमा सवारी जाम बढेको छ । दिउँसो नारायणी नदी किनारमा भएको महाधिवेशन उद्घाटन समारोहमा उपस्थित भएका कार्यकर्तासहित आम मानिसहरू साँझ घर फर्कनै लाग्दा विभिन्न सडकखण्डमा सवारी व्यवस्थापन अस्तव्यस्त बनेको हो ।

नेकपा एमालेको १०औं महाधिवेशनको उद्घाटन समारोह सकिएसंगै चितवनको विभिन्न स्थानका सडकमा सवारी जामले आवतजावतमा कठिनाइ भएको छ । जसले गर्दा हजारौं यात्रु प्रभावित बनेका छन् ।

दिउँसो नारायणी नदी किनारमा भएको महाधिवेशन उद्घाटन समारोहमा उपस्थित भएका कार्यकर्तासहित आम मानिसहरू साँझ घर फर्कनै लाग्दा विभिन्न सडकखण्डमा सवारी आवागमन अस्तव्यस्त बनेको हो ।

भरतपुर विमानस्थल हुँदै पूर्वी चितवनस्थित टिकौली जंगलसम्म सवारी जामका कारण आवतजावतमा कठिनाइ भएको छ । स्थानीयहरूका अनुसार नारायणगढदेखि गैंडाकोटसम्म सवारी चापका कारण घण्टौँसम्म सवारी गुड्नसमेत सकिरहेका छैनन् ।

उचित रुपमा ट्राफिक व्यवस्थापन हुन नसक्दा चितवनमा शुक्रबार साँझ सवारीको अवस्था अस्तव्यस्त बनेको हो । जसले गर्दा चितवनबाट मुग्लिनतर्फ जाने सडक खण्ड पनि प्रभावित बनेको छ । सवारी आवतजावतमा समस्या भएपछि थुप्रै सडकमा यात्रुहरू पैदल हिँडेरै गन्तब्यतर्फ जाँदै गरेका देखिन्छन् ।

यद्यपि एमाले महाधिवेशनलाई लक्षित गर्दै ट्राफिक प्रहरीले सवारी आवागमन व्यवस्थित बनाएको जनाएको थियो । एमालेका नेताहरूले भने महाधिवेशनस्थलबाटै लाखौं मानिसहरू कार्यक्रममा उपस्थित भएको दाबी गरेका थिए । साथै सडकको कठिनाइका कारण सबै मानिस कार्यक्रमस्थलमा समेत उपस्थित हुन नसकेको बताइएको थियो ।

महाधिवेशनमा मन्तब्य दिनका लागि काठमाडौंबाट चितवन गएका जनमोर्चाका अध्यक्ष चित्रबहादुर केसीले त गैंडाकोट पुगेको ३ घण्टापछि मात्रै कार्यक्रमस्थल पुग्न सम्भव भएको प्रतिक्रिया दिएका थिए ।

प्रकाशित : मंसिर १०, २०७८ १९:५४
पूरा पढ्नुहोस्
प्रतिक्रिया
पठाउनुहोस्
×