हत्याका फरार अभियुक्त १९ वर्षपछि पक्राउ
स्याङ्जा — छिमेकीको हत्या गरी फरार भएका स्याङ्जाका पोतबहादुर रोकाहा १९ वर्षपछि पक्राउ परेका छन् । अर्जुनचौपारी गाउँपालिका-२ बस्ने ५२ वर्षीय रोकाहालाई शनिबार प्रहरीले घरैबाट पक्राउ गरेको जनाएको छ ।
उनले सोही गाउँपालिका-२ बस्ने झलक बहादुर रोकाहालाई २०५९ पुस १७ गते कर्तव्य गरी मारेको आरोप लागेको थियो । त्यसयता उनी फरार थिए । प्रहरीका अनुसार उनी घटनापछि फरार भई भारतमा लुकिछिपी बस्दैआएका थिए ।
यो दसैंमा लुकिछिपी घर आएको मौका छोपी प्रहरीले उनलार्इ घरैबाट पक्राउ गरेको जनाएको छ । यस घटनाबारे थप अनुसन्धान भइरहेको प्रहरीले जनाएको छ ।
प्रकाशित : कार्तिक १, २०७८ २०:२४