गोरखामा जिप दुर्घटना, १४ घाइते, ३ को अवस्था गम्भीर- गण्डकी - कान्तिपुर समाचार

गोरखामा जिप दुर्घटना, १४ घाइते, ३ को अवस्था गम्भीर

हरिराम उप्रेती

गोरखा — गण्डकी गाउँपालिका–८ मलेओडारमा जिप दुर्घटना हुँदा १४ जना घाइते भएका छन् । घाइतेमध्ये ३ को अवस्था गम्भीर रहेको प्रहरीले जनाएको छ ।

मंगलबार वेनिघाटबाट माझीटार जाँदै गरेको बा २० च ४४०० नम्बरको जिप अनियन्त्रित भइ सडकबाट करिब ५० मिटर भीरमा खसेको जिल्ला प्रहरी कार्यालय गोरखाका डिएसपी प्रकाश दाहालले बताए । घाइतेमध्ये ७ जनालाई स्थानीय स्वास्थ्य संस्थामा सामान्य उपचारपश्चात् थप उपचारका लागि चितवन मेडिकल कलेज भरतपुर रेफर गरिएको छ । प्रहरीका अनुसार घाइतेमध्ये धादिङ ज्वालामुखी गाउँपालिका–१ माझिटारकी २० वर्षीया संगिता माझी, २१ वर्षिय रमण कुमाल र गोरखाको गण्डकी गाउँपालिका–८ घ्याल्चोकका ३६ वर्षीया सन्जु पुलामीको अवस्था गम्भीर रहेको छ ।

धादिङ ज्वालामुखी गाउँपालिका–१ माझीटार बस्ने ४८ वर्षीय सुब्बा माझी, २८ वर्षीय बलबहादुर कुमाल, २१ वर्षीय रमण कुमाल, गण्डकी गाउँपालिका–६ भुम्लिचोकका ५० वर्षीय होमबहादुर कुमाल र ५० वर्षीय बृन्दा कुमाललाई उपचारका लागि चितवन मेडिकल कलेज पठाइएको दाहालले बताए ।

चालकसहित सामान्य अवस्थाका थप ७ घाइतेको भने मलेखुस्थित राजमार्ग सामुदायिक अस्पतालमा उपचार भइरहेको प्रहरीले जनाएको छ । सवारी चालक २२ वर्षीय मनोज माझीको अवस्था सामान्य रहेको र प्रहरी निगरानीमा उपचार भइरहेको उनले बताए । दुर्घटनाबारे थप अनुसन्धान भइरहेको प्रहरीले जनाएको छ ।


प्रकाशित : आश्विन २६, २०७८ १७:२७
प्रतिक्रिया
पठाउनुहोस्

अंश विवादमा भाइद्वारा दाइको हत्या

काशीराम डाँगीे

रोल्पा — रोल्पा नगरपालिका–६ दारबोट कोटगाउँमा सोमबार एक बृद्धको घाँटी रेटेर हत्या भएको छ । प्रहरीले ५६ वर्षका बृद्ध आफ्नै घरमा मृत अवस्थामा भेटिएपछि हत्या भएको आशंकामा अनुसन्धान थालेको थियो । बुढाको हत्या अभियोगमा प्रहरीले उनकै भाई अमराज बुढालाई पक्राउ गरिएको प्रहरी नायब उपरीक्षक नरेशराज सुवेदीले बताए । घटना लगत्तै गरिएको अनुसन्धानका क्रममा अभियोग स्वीकार गरेपनि थप प्रमाण जुटाउन प्रहरीले बाँकेबाट तालिम प्राप्त कुकुर झिकाएको थियो । मंगलबार दिउँसोसम्म घटनास्थलको अनुसन्धान सकिएको प्रनाउ सुवेदीले बताए ।

सुरुमा मृतक पूर्णबहादुर कांग्रेसका क्षेत्रीय प्रतिनिधि निर्वाचित भएकाले राजनीतिक प्रतिसोधबाट घटना भएको हुन सक्ने आशंका गरिएको थियो ।

तर प्रहरीकाअनुसार हत्या अभियोग स्वीकार गर्दै मृतकका भाई अमराजले घरायसी अंशबन्डाको विवादका कारण हत्या गरेको बताएका छन् । अंश बाँडफाँडको विषयमा विवाद भएको र लामो समयदेखि सुल्झन नसकेकाले आगेवमा हत्या गरेको सहोदार भाई अमराजले स्वीकार गरेको प्रनाउ सुवेदीले बताए ।

करिब १४ वर्षअघि श्रीमतीको मृत्यु भइसकेको अवस्थामा मृतक पूर्णबहादुर एक्लै घरमा बस्दै आएका थिए । उनका दुई वटी श्रीमतीबाटका दुई छोरा विदेश छन् भने एक छोरा काठमाडौमा छन् । दुई वटी छोरीको विवाह भइसकेको छ ।

हत्या अभियोगमा पक्राउ परेको मृतका भाई अमराजका दुई वटी छोरी मात्रै छन् । मृतक दाई पूर्णले छोरी मात्रै भएकाले अंश आवश्यक नपर्ने तर्क गर्दै आएका थिए भने भाई अमराजले आफ्नो भागको अंश माग गर्दै आएका थिए ।

स्थानीयकाअनुसार दाजुभाई बीच उक्त विषयमा भएको विवाद बढेर हत्याको घटनासम्म पुगेको हुन सक्ने संभावना छ । स्थानीयका अनुसार मृतक दाजुले भाईलाई अंश नदिई बिक्री गरेर दाङ बसाई सराई गर्ने तयारी भएको विषयमा थप विवाद भएको थियो ।

प्रहरीले मृतक बुढालाई आफ्नै घरमा सोमबार विहान ११ बजे एक्लै मृत अवस्था फेला पारेको थियो । विहान उठेर ढोका नखालेकाले स्थानीयले नजिकै रहेको प्रहरीलाई खबर गरेका थिए । घटनापछि प्रहरीले ढोका फोडेर पूर्णलाई घाँटी रेटिएको अवस्थामा फेला पारेको थियो । घटना स्थलमा प्रनाउ सुवेदी र प्रहरी निरीक्षक सन्तोष केसीको अनुसन्धान टोली खटिएको थियो । घटनाबारे थप अनुसन्धान गर्न र थप प्रमाण जुटाउन तालिम प्राप्त कुकुरले लामो बाटो पच्छ्याएर मृतकको भाइको घर पुगेर संकेत गरेको थियो ।

मृतकको शव मंगलबार रोल्पा अस्पतालमा पोष्टमार्टमका लागि ल्याइएको छ । पक्राउ गरिएका अमराजबारे थप अनुसन्धान भइरहेको र कानुनी कारवाही अघि बढाउने तयारी भएको प्रहरीले जनाएको छ ।


प्रकाशित : आश्विन २६, २०७८ १७:२३
पूरा पढ्नुहोस्
प्रतिक्रिया
पठाउनुहोस्
×