गण्डकीका मन्त्री डोवाटेले लिए पद तथा गोपनीयताको शपथ- गण्डकी - कान्तिपुर समाचार

गण्डकीका मन्त्री डोवाटेले लिए पद तथा गोपनीयताको शपथ

प्रतीक्षा काफ्ले

कास्की — नवनियुक्त मन्त्री डोवाटे विश्वकर्माले पद तथा गोपनीयताको शपथ लिएका छन् । सोमबार बिहान मात्रै विना विभागीय मन्त्रीमा नियुक्त भएका विश्वकर्माले साँझ प्रदेश प्रमुख पृथ्वीमान गुरुङबाट शपथ लिएका हुन् । 


उनलाई कुन मन्त्रालय दिने भन्ने टुंगो नलागिसकेको मुख्यमन्त्रीका प्रेस संयोजक भरत कोइरालाले जनाए । उनी कांग्रेसका समानुपातिक सांसद हुन् । विश्वकर्मा यसभन्दा अघि पनि मन्त्रीको चर्चामा थिए ।

उनलाई मन्त्री नबनाएको भन्दै चौतर्फी विरोध भएपछि मुख्यमन्त्री कृष्णचन्द्र नेपालीले प्रदेशसभा अन्तर्गत विधायन समितिको सभापति बनाउन प्रस्ताव गरेका थिए ।

तर विश्वकर्माले उक्त प्रस्ताव असन्तुष्टि जनाउँदै अस्वीकार गरेका थिए । विश्वकर्माले अहिले पार्टीलाई आवश्यकता परेको र पहिला अन्याय गरेको महसुस भएकाले आफूलाई मन्त्री बनाएको बताएका छन् ।

मुख्यमन्त्रीले गठबन्धनसँग सल्लाह नगरी मन्त्री नियुक्त गरेकोप्रति असन्तुष्टि जनाउँदै शपथ कार्यक्रममा माओवादी केन्द्र र जनता समाजवादीका मन्त्रीहरु सहभागी भएनन् ।

प्रकाशित : आश्विन २५, २०७८ १८:००
प्रतिक्रिया
पठाउनुहोस्

६० हजार नगदसहित पर्वतमा ४ जुवाडे पक्राउ

अगन्धर तिवारी

पर्वत — जलजला गाउँपालिका–३ वारीबेनीबाट ६० हजार एक सय ८५ रुपैयाँसहित चार जना जुवाडे पक्राउ परेका छन् । पर्वत प्रहरीका अनुसार हार-जित हुनेगरी जुवा खेलिरहेका उनीहरुलाई विशेष सुराकीका आधारमा सोमबार दिउँसो पक्राउ गरिएको हो ।

पक्राउ पर्नेमा धनकुटाको सहिदभूमि गाउँपालिका–४ का महेश राई, तेह्रथुमको लालिगुराँस गाउँपालिका–६ का सरोज थापामगर, पर्वतकै जलजला–३ का रामबहादुर पुन र विकास श्रेष्ठ छन् । चाडबाडको बेला जुवातास खेलेर सामाजिक रीतिरिवाजमा दख्खल पुर्‍याएको भन्दै उनीहरुलाई पक्राउ गरिएको प्रहरीले जनाएको छ।

उनीहरुलाई तासमा हार-जितको खेल खेलिरहेको अवस्थामा पक्राउ गरिएको प्रहरीले जनाएको छ । स्थानीयवासीले दिएको विशेष सुराकीको आधारमा सूचना प्रहरी निरीक्षक राजेन्द्र अधिकारीको नेतृत्वमा खटिएको प्रहरी टोलीले पक्राउ गरेको हो । उनीहरुलाई सोमबार नै जुवा खेल्न वा सट्टेबाजी गर्न नहुने शिर्षकमा जिल्ला प्रशासन कार्यालयबाट पहिलोपटक ५ दिनको मिति थपेर अनुसन्धान थालिएको प्रहरी निरीक्षक एवं सूचना अधिकारी राजेन्द्र श्रेष्ठले जानकारी दिए ।

प्रकाशित : आश्विन २५, २०७८ १७:५९
पूरा पढ्नुहोस्
प्रतिक्रिया
पठाउनुहोस्
×