प्रधानन्यायाधीशलाई मन्त्रीको कोटा दिने हल्ला निराधार  : नेकपा (एस)- गण्डकी - कान्तिपुर समाचार

प्रधानन्यायाधीशलाई मन्त्रीको कोटा दिने हल्ला निराधार  : नेकपा (एस)

नारायण शर्मा

नवलपुर — नेकपा एकीकृत समाजवादी पार्टीका उपाध्यक्ष केशवलाल श्रेष्ठले प्रधानन्यायाधीशलाई मन्त्रीको कोटा दिने भन्ने समाचार निराधार रहेको बताएका छन् । 

‘५ दलीय गठबन्धनमा आजसम्म त्यस्तो विषयले प्रवेश पनि पाएको छैन । त्यो कसले मिडियाबाजी गर्‍यो उसैलाई थाहा होला । संविधानमा व्यवस्था भएको बाहेक कसैलाई मन्त्री दिने भन्ने नै हँुदैन,’ उनले भने । यस्तो विषय ५ दलीय गठबन्धनलाई जानकारी समेत नरहेको उनको दाबी थियो ।

कावासोतीमा सोमबार नेकपा (एस)को पार्टी कार्यालय भवन उद्घाटनका लागि आएका उपाध्यक्ष श्रेष्ठले केही संवैधानिक निर्णयहरु परिपक्व हुन समय लागेकाले मन्त्रिपरिषद् विस्तारमा ढिलाइ भएको बताए ।

‘मन्त्रिमण्डल गठनमा केही ढिलाइ भएको ५ दलीय सहमतिमै हो,’ उनले भने ।दल विभाजनसम्बन्धी अध्यादेशका कारण केही ढिलाइ भएको र अब तीन दिनभित्र मन्त्रिमण्डलले पूर्णता पाउने दाबी गरे । ओलीको अहंकार र आफै ‘राज्य हूँ’ भन्ने गलत चिन्तनको सर्मथन गर्न नसेका कारण अध्यादेशबाट नेकपा (एस) जन्मिएको उनको भनाइ थियो ।

सम्बन्धित समाचार

सर्वोच्च बारका पदाधिकारीसँग प्रधानन्यायाधीशले भने- 'मैले मन्त्रीमा भाग मागेँ भन्ने समाचार झूटो हो'

गठबन्धनमा प्रधानन्यायाधीश पनि ?

प्रकाशित : आश्विन १८, २०७८ १४:०६
प्रतिक्रिया
पठाउनुहोस्

आफूखुसी भाडा लिन नपाएपछि यातायात व्यवसायी आन्दोलित [तस्बिरहरु]

तस्बिर : अंगद ढकाल, तस्बिर : कविन अधिकारी

काठमाडौँ — यातायात व्यवसायीले स्थानीय रुटमा चल्ने सवारीको भाडा बढाउनुपर्ने माग राख्दै सोमबार चक्रपथमा सांकेतिक रुपमा गाडी तेर्साएर आन्दोलन गरेका छन् । महानगरीय ट्राफिक प्रहरी महाशाखाका प्रवक्ता एसपी सञ्जीव शर्मा दासका अनुसार बिहान ७ बजेदेखि १० बजेसम्म चक्रपथको सुकेधारा, चाबहिल, गौशाला, कोटेश्वर, सातदोबाटो, कलंकीलगायत स्थानमा लाइन गाएर गाडी थन्क्याई व्यवसायी आन्दोलनमा उत्रिएका हुन् ।

यातायात व्यवस्था विभागले सूचना जारी गरेर असार २९ गतेबाट लामा तथा मध्यम दूरीमा चल्ने सवारीमा साविकको भाडामा २८ प्रतिशत वृद्धि गरेको भए पनि प्रदेशअन्तर्गतका जिल्लामा भने बढाएको छैन । ती जिल्लामा भाडा बढाउन प्रदेश सरकारले निर्णय गर्नुपर्ने छ । वाग्मती प्रदेशअन्तर्गत भौतिक पूर्वाधार विकास मन्त्रालयका प्रवक्ता नवीनकुमार सिंहले भने स्थानीय रुटमा चल्ने सवारीमा भाडा बढाउनेबारे कुनै निर्णय नभएकाले साविकको भन्दा बढी भाडा नतिर्न यात्रुलाई आग्रह गरेका छन् ।

यता विभिन्न यातायातसम्बद्ध समितिहरुले भाडा बढेको भन्दै केही दिनदेखि यात्रुसँग जबरजस्ती बढी भाडा उठाइरहेका छन् । व्यवसायीले सरकारले असोज १५ गतेदेखि भाडा बढाएको भन्दै गाडीमा नयाँ भाडासूची टाँसेको छ । तर सरकारले अहिलेसम्म प्रदेशअन्तर्गतका जिल्लामा भाडा बढाउने कुनै निर्णय नभएको जनाएको छ । ट्राफिक प्रहरीका अनुसार व्यवसायीले केही दिनयता यात्रुसँग आफूखुसी बढाएर भाडा लिने गरेको पाइएको छ । सोमबार बिहान मात्र बढी भाडा लिने ८२ वटा सवारीलाई नियन्त्रणमा लिइएको ट्राफिक प्रहरीले जनाएको छ । आफूहरुले बढाएको भाडा लिन पाउनुपर्ने जिकिर व्यवसायीको छ ।

प्रकाशित : आश्विन १८, २०७८ १३:५७
पूरा पढ्नुहोस्
प्रतिक्रिया
पठाउनुहोस्
×