श्रीमानको हत्या आरोपमा पक्राउ- गण्डकी - कान्तिपुर समाचार

श्रीमानको हत्या आरोपमा पक्राउ

हरिराम उप्रेती

गोरखा — श्रीमानको घाँटी थिचेर हत्या गरेको आरोपमा गोरखा नगरपालिका–७ पौवाखेतबाट ५५ वर्षिय माइली कामीलाई प्रहरीले पक्राउ गरेको छ ।

मंगलबार बिहान ५६ वर्षीय आइतबहादुर कामी सुतिरहेको अवस्थामा मृत भेटिएका थिए । अनुसन्धानको क्रममा मृतक आइतबहादुरलाई आफ्नै श्रीमती माइलीले घाँटी थिचेर हत्या गरेको खुल्न आएको जिल्ला प्रहरी कार्यालय गोरखाका डीएसपी प्रकाश दाहालले बताए ।

मृतक आइतबहादुरको स्थायी ठेगाना धार्चे गाउँपालिका–२ केरौँजा हो । २०७२ को भूकम्पपछि प्राप्त अनुदानले सदरमुकामस्थित पौवाखेतमा घर बनाएर उनीहरु बस्दै आएका छन् ।

पक्राउ परेकी माइलीलाई बुधबार जिल्ला अदालतमा कर्तव्य ज्यान शिर्षकमा मुद्दा दर्ता गरी थप अनुसन्धान भइरहेको डीएसपी दाहालले बताए ।

आइतबहादुरले दिनहुँ जसो मदिरा सेवन गर्ने र श्रीमन–श्रीमतीबीच बारम्बार झैझगडा र कुटपिट हुने गरेको प्रहरीले जनाएको छ । श्रीमानले आफ्नो चरित्रमाथि बारम्बार शंका गर्ने, दैनिक जसो मदिरा सेवन गरी गालीगलौज तथा कुटपिट गर्ने कारणबाट आजित भई घाँटी थिची हत्या गरेको आरोपितले प्रहरी समक्ष बयान दिएको डीएसपी दाहालले बताए । ‘घटनाको प्रकृति, घटनास्थलको अवस्थालाई मध्यनजर गरि सुक्ष्म ढंगले अनुसन्धान गर्दा हत्या भएको खुल्न आयो,’ दाहालले भने ।

घटना भएको दिन सोमबार राति पनि आइतबहादुरले माइलीलाई चोटपटक लाग्ने गरी कुटपिट गरेको अनुसन्धानबाट खुलेको प्रहरीले जनाएको छ ।

प्रकाशित : आश्विन ६, २०७८ १४:५४
प्रतिक्रिया
पठाउनुहोस्

राजनीतिक दलका कार्यकर्ता भएकै आधारमा राजदूत नियुक्त गर्नु हुँदैन : परराष्ट्रमन्त्री खड्का

‘टेबलमा खाना खाँदा काँटाचम्चा चलाउनेदेखि लिएर ड्रेस कोड बुझेको, धेरै धेरै कुराहरु जानेको मान्छे हुनुपर्छ’
कान्तिपुर संवाददाता

काठमाडौँ — परराष्ट्रमन्त्री नारायण खड्काले कुनै राजनीतिक दलको नेता कार्यकर्ता भएकै आधारमा राजदूत नियुक्त गर्न नहुने बताएका छन् । उनले देशको प्रतिनिधित्व गर्ने र मुलुकको राष्ट्रिय हितमा हुने गरी राजदूतको नियुक्ति गर्नुपर्नेमा जोड दिए । 

‘राजदूत भनेको दलीय हिसाबमा कुनै खास विशेष आधारमा नियुक्त गरेर पठाउने होइन । कुनै देशमा हामी राजदूत पठाउँछौँ भने त्यो देशको संस्कृति, संस्कार जानेको, अन्तर्राष्ट्रिय भाषाको ज्ञान चाहियो नै ! र, कूटनीतिक अवस्थालाई थाहा पाएर नेपालको हितलाई प्रवर्द्धन गर्न सक्ने विश्वास र क्षमता भएको साथी हो । त्यस्तो खालका साथीहरुलाई राजदूत बनाउँदा हुन्छ, ’ मन्त्री खड्काले भने ।

राजदूत छनोट गर्दा धेरै कुराहरु ध्यान दिनुपर्ने उनले बताए । ‘टेबलमा खाना खाँदा काँटाचम्चा चलाउनेदेखि लिएर ड्रेस कोड बुझेको, धेरै धेरै कुराहरु जानेको मान्छे हुनुपर्छ, ’ उनले भने, ‘कतिपय ठाउँमा लबी गर्नुपर्ने हुन्छ, डिप्लोमेटिक मेटिङहरुमा जानुपर्ने हुन्छ । यी सबै सीप भएका व्यक्तिहरुलाई सिफारिस गर्दा राम्रो हुन्छ भन्ने मेरो विचार हो ।’

उनले आफू फर्किएपछि मात्रै राजदूत नियुक्तिका विषयमा छलफल हुने बताए । ‘म फर्किएर आइसकेपछि कुन देशमा कसलाई पठाउने ? कसलाई पठाउँदा उपयुक्त हुन्छ ? त्यो देशमा हाम्रो साझा हितका विषयहरु के के छन् ? यी सबै कुराहरुलाई ध्यान दिएर छनोट गर्नुपर्ने हुन्छ, ’ उनले भने ।

मन्त्री खड्का पदभार ग्रहण गरकै दिन अर्थात् बुधबार नै संयुक्त राष्ट्रसंघको महासंघमा भाग लिन अमेरिका प्रस्थान गर्दैछन् ।

प्रकाशित : आश्विन ६, २०७८ १४:४७
पूरा पढ्नुहोस्
प्रतिक्रिया
पठाउनुहोस्
×