मनाङमा ३ दिनदेखि बेपत्ता कामदारको शव भेटियो
लमजुङ — मनाङको मनाङ ङिस्याङ गाउँपालिका ५, सब्जेको स्याउ फार्ममा कार्यरत गोरखाका ४३ वर्षीय क्षेत्रबहादुर गुरुङ हराएको ३ दिनपछि मृत भेटिएका छन् । डीएसपी सुवास खड्काका अनुसार मुङ्जे र सब्जेबीचको मर्स्याङ्दी नदीमाथि रहेको पुलबाट झण्डै २ किलोमिटर तल हुम्डे नजिकै ङोरुडाँडामुनी मर्स्याङ्दी नदी किनारमा मंगलबार शव फेला परेको हो ।
गोरखाको गण्डकी गाउँपालिका २, ताङ्लीचोकका गुरुङलाई २६ गते शनिबार राति मुङ्जेमा खाजा खाएर फर्किने क्रममा मर्स्याङ्दीले बगाएको थियो ।
घटनापछि हुम्डे सीमा प्रहरी चौकी र जिल्ला प्रहरी कार्यालय चामेबाट खटिएको प्रहरी टोलीले दिनदिनै खोजी गरेको र मंगलबार मध्यान्हतिर शव फेला परेको उनले बताए । घटनाबारे अनुसन्धान भइरहेको प्रहरीले जनाएको छ ।
शवलाई पोस्टमार्टमका लागि मनाङ जिल्ला अस्पताल चामेतर्फ ल्याउँदै गरेको उनले बताए ।
प्रकाशित : भाद्र २९, २०७८ १९:१९