राम्दी बजार पहिरोको उच्च जोखिममा- गण्डकी - कान्तिपुर समाचार
कान्तिपुर वेबसाईट
AdvertisementAdvertisement

राम्दी बजार पहिरोको उच्च जोखिममा

गण्डकी प्रदेशभरी जताततै पहिरो
प्रतीक्षा काफ्ले

कास्की — अविरल वर्षासँगै स्याङ्जाको राम्दी बजार पहिरोको उच्च जोखिममा रहेको छ । भदौ १३ मा गल्याङ नगरपालिका–१ राम्दीमा सिदार्थ राजमार्ग माथिबाट पहिरो खसेको थियो । पहिरोमा वालिङ नगरपालिका–१४ की धनमाया उम्रा मगरको मृत्यु भएको थियो । पहिरोमा परी ४ जना घाइते भएका थिए भने ४ वटा घर पुरिएका थिए ।

पहिरोले सिदार्थ राजमार्गको राम्दी सडकखण्ड अझैपनि पूर्णरुपमा सुचारु हुन नसकेका प्रहरीले जनाएको छ । सो पहिरोका कारण अहिले सिंगो बजार नै जोखिममा रहेको जिल्ला प्रहरी प्रमुख एसपी होविन्द्र बोगटीले बताए । ‘पहिरोले सडकमाथिको सिंगै डाँडो चिराचिरा परेको छ,’ उनले भने, ‘यहाँ करिब ५० घर छन् । ती सबै घर पहिरोको जोखिममा छन् । रातभरी पानी पर्दा स्थानीय घरमा बस्ने अवस्था छैन ।’ पहिरोले प्रहरी चौकी, मन्दिर र स्थानीयका घर बढी जोखिममा छन् । कालीगण्डकी नदीको वहाव बढेकाले पनि किनार वरिपरीका बस्ती समेत उच्च जोखिममा छन् । स्याङजा र पाल्पा दुई जिल्ला जोड्ने सडक पुल पनि जोखिममा रहेको स्थानीयले बताएका छन् ।

प्रहरीका अनुसार सीमानापारी पाल्पाखण्ड विगतदेखि पहिरोको उच्च जोखिमा रहेपनि स्याङजा खण्ड भने सुरक्षित थियो । केहीदिन अघि आएको पहिरोका कारण स्याङ्जा खण्ड पनि उच्च जोखिम भएको एसपी बोगटीले बताए । ‘राम्दी स्थानीय बजार पनि हो,’ उनले थपे, ‘दुई जिल्लाको नाका पनि हो । यसतर्फ बेलैमा सोच्न सकिएन भने पछि केही भन्न सकिँदैन ।’ उनले राम्दीको सिंगो डाँडै जोखिम भएकाले कतिबेला के हुन्छ भन्न नसकिने बताए ।

यसैगरी गल्याङ–३ मा रहेको बसपार्क पनि पहिरोको उच्च जोखिममा रहेको प्रहरीले जनाएको छ । जथाभावी खनिएका भित्री सडकका कारण सिदार्थ राजमार्ग समेत बिग्रिदै गएको स्थानीय कृष्ण बस्यालले बताए । ‘अहिले राजमार्गमा पनि उस्तै जोखिम छ,’ बस्यालले भने, ‘जिल्लाभर पहिरोको जोखिम छ । राजमार्ग होस् या गाउँमा जथाभावी डोजर मात्र लगाउने, सडक खन्ने गरिएको छ । जसले गर्दा पहिरो नै पहिरो भएको छ । सुरक्षित भन्ने कुनै स्थान भएन ।’

गल्याङ नगरप्रमुख भुपराज अधिकारीले पहिरोको जोखिम बढ्दै गएकाले नयाँ ट्रयाक नखोल्ने, भइरहेकै पुराना सडकको मर्मत सम्भार गर्ने योजना नगरपालिकाको रहेको बताए । ‘नसोचेको स्थानमा पनि पहिरो गएको छ,’ उनले भने, ‘यसतर्फ नगरपालिकाको ध्यान गएको छ । जोखिम बस्ती बचाउनका लागि हामीले तारजाली लगाउने या सुरक्षित स्थानमा लगेर राख्ने काम भइरहेको छ ।’ स्याङजा सबै स्थानीय तहमा पहिरोको उस्तै जोखिम छ ।

केही दिनदेखि परेको वर्षाका कारण बाढी पहिरोले पर्वत, कास्कीका विभिन्न स्थानमा पनि ठूलो क्षति पुर्‍याएको छ । असारयता मात्रै गण्डकी प्रदेशमा बाढी पहिरोमा परी ३४ जनाले ज्यान गुमाएका छन् ।

प्रकाशित : भाद्र २०, २०७८ १०:०६
प्रतिक्रिया
पठाउनुहोस्

बिरामीको मृत्यु बाटोमै

कान्तिपुर संवाददाता

रौतहट — उच्च रक्तचापले बेहोस भएका चन्द्रपुर नगरपालिका–३ गैंडाटारका ४० वर्षीय हर्कबहादुर वाइबालाई अस्पताल लैजाने क्रममा शुक्रबार चाँदी नदीको बाढीका कारण समयमा अस्पताल पुर्‍याउन नसक्दा मृत्यु भयो । उनलाई अस्पताल लैजान एम्बुलेन्स बोलाएको थियो । तर, बाढीले एम्बुलेन्स जान सकेन । वाइबालाई बोकेरै नदी तारेर अस्पताल लैजाँदा ढिला भएको थियो । ढिला भएकाले उनको मृत्यु भयो । 

नदीमा सहज होस् भनेर त्यहाँ पुल बन्न लागेको थियो । तर, समयमा निर्माण सम्पन्न नहुँदा बिरामीले ज्यान गुमाउनुपरेको छ । लगातारको वर्षापछि चाँदी नदीमा बाढी आएको छ । मानिसहरू पैदलसमेत वारपार गर्न सकेका थिएनन् । यस्तोमा एम्बुलेन्स आउन सक्ने अवस्था नरहेको र समयमा अस्पताल पुर्‍याउन नसकेकाले वाइबाको मृत्यु भएको गैंडाटारका स्थानीय उपेन्द्र गोलेले बताए ।

‘बाढीकै कारण उनको ज्यान गयो । समयमा अस्पताल पुर्‍याउन पाएको भए ज्यान जोगिन्थ्यो,’ उनले भने, ‘चाँदीमा निर्माणाधीन पुल चाँडो बनाउन ठेकेदारलाई दबाब दिँदै आएका हौं । तर बेवास्ता गरेको छ । पुल बनाएको भए यसरी मानिसको ज्यान जाँदैनथ्यो होला ।’ बिरामीको घरसम्म एम्बुलेन्स आउन नसकेपछि स्थानीय र आफन्तले उनलाई पिठ्युँमा बोक्दै नदी तारेर अस्पताल लगेका थिए । अस्पताल पुर्‍याउन ढिला भएपछि उनको मृत्यु भएको हो ।

वर्षाका बेला गैंडाटारका स्थानीयलाई चन्द्रपुर आउजाउ गर्न चाँदी नदीमा २०७४ मै ठेकेदारले पुल निर्माणको काम सुरु गरेका थिए । गत वर्ष असारमा बाढीमै तर्न लाग्दा एक युवक बग्नबाट जोगिए । त्यसको लगत्तै एउटा मोटरसाइकल दुर्घटना हुनबाट जोगिएको थियो । समयमा पुल बनाएको भए यस्ता दुर्घटना नहुने वडाध्यक्ष रवि देवकोटाले बताए । ‘बिरामीलाई समयमा अस्पताल पुर्‍याउन सकिँदैन । यही कारण हामीलाई समयमा पुल बनाइदिनुस् भनेका हौं,’ उनले भने, ‘ठेकेदारले आलटाल गर्दै आएको छ । वर्षामा नदी तर्न स्थानीयले सास्ती भोग्नुपरेको छ ।’ चुरे क्षेत्रमा सामान्य पानी परेको बेला पनि चाँदीमा बाढी आउँछ । त्यसपछि आवतजावत नै ठप्प हुने गरेको वडाध्यक्ष देवकोटाले सुनाए । उनले ठेकेदारलाई दबाब दिन आन्दोलनको तयारी थालेको जानकारी दिए ।

पप्पु र शिवशंकर निर्माण सेवाले २०७४ असार ३१ गते ठेक्का सम्झौता गरेको थियो । सम्झौता अनुसार २०७६ असार ३१ गते सक्नुपर्नेमा अहिलेसम्म ५० प्रतिशतमात्र काम भएको छ । जेभीले २५ करोड ३६ लाखमा २४ हजारमा सकार गरेको हो । स्थानीयले आन्दोलनको तयारी र ज्ञापनपत्र बुझाएपछि पुल चाँडै बनाउन सडक डिभिजन कार्यालय प्रमुख नरेशप्रसाद केशरी, इन्जिनियर यादव सुवेदी, ठेकेदार दयारामप्रसाद साहसँग गैंडाटारका स्थानीयले छलफल गरेका थिए ।

चाँडै निर्माण सामग्रीहरू निर्माणस्थलमा उपलब्ध गराउने र कात्तिक ३० गतेभित्र २ स्पान ढलान सकेर बाँकी ४ स्पानलाई सामग्रीहरू व्यवस्था गर्ने सहमति भएको छ । सहमतिअनुसार काम नगरे मंसिर १ गतेबाट ठेकेदारले ठेक्का रद्द गर्न निवेदन दिने संघर्ष समितिका सदस्य राजु धामीले बताए ।

यसअघि स्थानीयले पुल निर्माणको काम सक्न सडक डिभिजनमा ज्ञापनपत्र बुझाएका थिए । गैंडाटारका स्थानीयलाई चाँदी नदी छलेर चन्द्रनिगाहपुर आउन कठिन हुन थालेपछि त्यहाँ पुल निर्माणको ठेक्का लागेको हो । ठेकेदारले पुल बनाउन छाडेपछि त्यस भेगका स्थानीयले पुल निर्माण दबाब संघर्ष समिति गठन गरेका हुन् ।

सम्झौताअनुसार निर्माण काम नसकिएपछि पहिलो पटक साधारण खरिद नियमावली (नवौं संशोधन) अनुसार डेढ वर्षका लागि म्याद थपिएको थियो । थपिएको म्यादअनुसार २०७७ पुष १४ मा निर्माण कार्य सक्नुपर्नेमा ठेकेदारले कोरोना, लकडाउनलगायत विभिन्न बहाना गर्दै काम सकेनन् । दोस्रो पटक नेपाल सरकारको २०७७ माघ ११ को निर्णयअनुसार कोभिड–१९ को कारण देखाई ६ महिना म्याद थप गरिएको छ । ठेकेदारले २०७८ असार १३ गतेसम्म निमार्ण सक्नुपर्ने थियो । तर सम्पन्न हुन नसकेको सडक डिभिजनले जनायो ।

पुलको काम अझै ४० प्रतिशत बाँकी छ । सडक डिभिजन प्रमुख केशरीले चाँदी नदीको पुल जति सक्दो चाँडो सम्पन्न गर्ने विषयमा निर्माण कम्पनीलाई राखेर छलफल चलाइएको बताए । ‘अब ढिला नगरी काम चाँडै सक्न भनेका छौं,’ उनले भने, ‘बाढीका बेला स्थानीयलाई धेरै समस्या भयो ।’ ठेकेदार साहले बजेट, वर्षा, निर्माण सामग्रीको अभाव तथा विभिन्न कारणको बहाना बनाउँदै आएका छन् । ‘प्राविधिक कारणले ढिला हुन गएको हो,’ उनले भने, ‘काम गर्दै छु । अब चाँडै सक्छु ।’

ठेकेदारले सम्झौता गरेर समयमा निर्माणको काम सम्पन्न नगरे पछि जिल्लाभित्रका झन्डै एक दर्जन पुलको भविष्य अन्योल बनेको सडक डिभिजनले जनायो । कामै नगरी छाडेको थुप्रै पुलहरू अलपत्र छन् ।

प्रकाशित : भाद्र २०, २०७८ ०९:५६
पूरा पढ्नुहोस्
प्रतिक्रिया
पठाउनुहोस्
×