तनहुँमा खोलाले बगाएका ६ जनाको सकुशल उद्धार
तनहुँ — भिमाद नगरपालिका–६ स्थित मालेबगरमा शुक्रबार खोलाले बगाएका ६ जनालाई सकुशल उद्धार गरिएको छ । घिरिङबाट भिमादतर्फ आउँदै गरेको ग १ च ५१९० नम्बरको बोलेरो जिपलाई खोला तर्ने क्रममा बगाएपछि सबैलाई प्रहरीले उद्धार गरेको थियो ।
जिपमा सवार एक महिला, चार पुरुष र एक बालकलाई उद्धार गरिएको जिल्ला प्रहरी कार्यालयका प्रहरी नायब उपरीक्षक युवराज तिमिल्सिनाका बताए । उनले भने, ‘घटनामा मानवीय क्षति नभए पनि जिप भने खोलामा डुबेको अवस्थामा छ ।’
बिहीबार रातिदेखि पानी परेकाले खोला बढेको अवस्थामा जिप पार हुन लाग्दा बगाएको खबर पाएपछि भिमादस्थित इलाका प्रहरी कार्यालयका प्रहरी नायब निरीक्षक सुरज सदाशङ्करको नेतृत्वमा सात प्रहरी टोली घटनास्थल पुगेको थियो ।
प्रकाशित : भाद्र १८, २०७८ १३:४२