गोरखामा निषेधाज्ञा खुकुलो, विद्यालय खोल्ने अधिकार स्थानीय तहलाई- गण्डकी - कान्तिपुर समाचार

गोरखामा निषेधाज्ञा खुकुलो, विद्यालय खोल्ने अधिकार स्थानीय तहलाई

हरिराम उप्रेती

गोरखा — केही प्रावधान खुकुलो बनाउँदै गोरखामा जारी निषेधाज्ञा असोज २ गतेसम्म थप गरिएको छ । नयाँ भेरियन्टसहितको कोरोना भाइरस संक्रमणको अवस्थालाई मध्यनजर गर्दै संक्रमण रोकथाम नियन्त्रण र व्यवस्थापनका लागि विद्यमान संक्रमण दर, प्रवृत्ति र मृत्युदरको विश्लेषणको आधारमा निषेधाज्ञा थप गरिएको प्रशासनका अधिकृत हर्क रोकाले जानकारी दिए ।

यसअघि शुक्रबार राति १२ बजेसम्म निषेधाज्ञा जारी भएको थियो ।

अब निजी तथा सार्वजनिक यातायातलाई स्वास्थ्य सुरक्षा मापदण्ड पालना गरी सवारी संचालन गर्न पाउने छन् । सरकारले जारी गरेको स्मार्ट लकडाउनको प्रावधानभित्र रही स्थानीय तहहरुले जिल्ला कोभिड १९ संकट व्यवस्थापन केन्द्रसँग समन्वय गरी विद्यालयहरु संचालन गर्न सक्ने निर्णय भएको छ ।

यस्तै सबै सरकारी तथा गैरसरकारी कार्यालयहरुलाई स्वास्थ्य सुरक्षाको मापदण्ड पालना गरी पूर्ववत रुपमा सेवा संचालन गर्न भनिएको छ । त्यस्तै होटल व्यवासायबाहेक सबै व्यवसायहरु स्वास्थ्य सुरक्षा मापदण्ड पूर्ण पालना गरी बिहान ५ देखि बेलुकी ७ बजेसम्म संचालन हुनेछन् । होटल व्यवसाय भने बेलुकी ८ बजेसम्म संचालन गर्न पाउने छन् ।

निषेधाज्ञा खुकुलो पारिएसँगै प्रसिद्ध धार्मिक स्थल मनकामना मन्दिर दर्शनार्थीका लागि खुल्ला गर्ने तयारी गरिएको छ । कोभिड नियन्त्रणको योजना बनाउन सहिद लखन गाउँपालिका–२ का वडाअध्यक्ष तथा सदस्यहरु, मनकामना क्षेत्र विकास समितिका पदाधिकारी एवं वडा अध्यक्षले तोकेका अन्य विक्ति सम्मिलित समिति गठन भएको छ ।

बिहीबारको जिल्ला कोभिड व्यवस्थापन समिति बैठकले मन्दिर खुल्ला गर्दा कोभिड रोकथाम नियन्त्रण र व्यवस्थापनको योजना बनाएर एक हप्ताभित्र पेस गर्न भनेको छ । समितिले मन्दिरमा पूजा व्यवस्थापनको योजना बनाएर पेस गरेपछि अन्तिम निर्णय प्रशासनले गर्ने सहायक प्रमुख जिल्ला अधिकारी कमलाराज भण्डारीले बताए ।

कोभिड जोखिम बढेसँगै मनकामना मन्दिरमा नित्यबाहेक भक्तजनका लागि प्रवेशमा रोक लगाइएको छ । व्यापार व्यवसाय चौपट बनेको भन्दै स्थानीयले मन्दिर खुल्ला गर्न माग गर्दै आएका थिए ।

प्रकाशित : भाद्र १७, २०७८ १६:२४
प्रतिक्रिया
पठाउनुहोस्

घरेलु मैदानमा नेपालको भारतसँग पहिलो अन्तर्राष्ट्रिय मैत्रीपूर्ण खेल

नेपालको ५० औं अन्तर्राष्ट्रिय खेल
कान्तिपुर संवाददाता

काठमाडौँ — नेपालले घरेलु मैदानमै पहिलोपटक अन्तर्राष्ट्रिय मैत्रीपूर्ण खेलमा बिहीबार भारतसँग खेल्दै। त्यसका धेरै आयाम हुनेछन्। यसै कारण पनि यो खेलको रौनकता बेग्लै हुनेछ। नेपाल र भारत छिमेकीमात्र होइनन्, एक आपसमा फुटबलका सबैभन्दा ठूलो प्रतिद्वन्द्वी टिम हुन्।

तर, संयोग कस्तो भने भारत पहिलोपल्ट अन्तर्राष्ट्रिय मैत्रीपूर्ण खेलका लागि काठमाडौंमा ओर्लिएको हो। अहिलेसम्म नेपाल र भारतबीच यस्ता तीन खेलमात्र भएका छन्। यी तीनै खेल भारतमै भएका थिए।

त्यसमध्ये सन् २०१३ मा पहिलोपल्ट सिलिगुढीमा खेल भएको थियो। त्यसपछि सन् २०१५ मा पुना र २०१७ मा मुम्बईमा खेल भएको थियो। यस्तोमा अब चौथोपल्ट नेपाल आफ्नै भूमिमा भारतसँग मैत्रीपूर्ण भिडन्त गर्दै छ।

नेपालका मुख्य प्रशिक्षक अब्दुल्लाह अल्मुताइरीका लागि यो खेल विशेष हुनेछ, किनभने उनी दशरथ रंगशालामा डेब्यु गर्दै छन्। उनको नेतृत्वमा नेपालले अहिलेसम्म ४ खेल खेलेको छ। त्यसमध्ये नेपालले इराकविरुद्ध यसै वर्ष बासरामा पहिलोपल्ट खेलेको थियो। त्यसपछि नेपालले विश्वकप छनोटका तीन खेल कुवेतमा खेलेको हो। अल्मुताइरीको प्रशिक्षणमा अब नेपालले दशरथ रंगशालामा पहिलोपल्ट खेल्ने छ।

कप्तान किरण चेम्जोङका लागि यो उत्तिकै विशेष हुनेछ, किनभने यस अन्तर्राष्ट्रिय मैत्रीपूर्ण खेलसँगै उनले नेपालका लागि सर्वाधिक खेल खेलेको कीर्तिमानको बराबरी गर्नेछन्। नेपालका लागि उनले अहिलेसम्म ७२ खेल खेलेका छन्। अहिले उनी सर्वाधिक ‘क्याप’ जित्ने खेलाडी सूचीको दोस्रो स्थानमा छन्।

भारतविरुद्ध नेपालको पहिलो खेलको सबैभन्दा ठूलो महत्त्व के अर्थमा हुनेछ भने यो राष्ट्रिय पुरुष टिमले काठमाडौंमा खेलेको ५० औं खेल हो। नेपालले सन् १९८४ को सेप्टेम्बर १८ मा माल्दिभ्सको सामना गरेको थियो। अवसर थियो, पहिलो दक्षिण एसियाली खेलकुद। यो नै नेपालले काठमाडौंमा खेलेको पहिलो अन्तर्राष्ट्रिय खेल हो। अब नेपालले भारतविरुद्ध खेल्ने खेल ऐतिहासिक रूपमा ५० औं खेल हुनेछ। काठमाडौंमा खेलेका खेलमध्ये नेपालले सबैभन्दा बढी दशरथ रंगशालामा खेलेको छ।

नेपालले अहिलेसम्म कूल १७ अन्तर्राष्ट्रिय मैत्रीपूर्ण खेलेको छ। त्यसमध्ये तीन खेलमात्र दशरथ रंशगालामा भएको थियो, सन् २०१२ मा बंगलादेशविरुद्ध एक र २०१३ मा पाकिस्तानविरुद्ध दुई। अब भारतविरुद्ध हुने पहिलो खेल नेपालले काठमाडौंमा खेल्ने लागेको चौथो अन्तर्राष्ट्रिय मैत्रीपूर्ण मात्र हुनेछ।


प्रकाशित : भाद्र १७, २०७८ १६:१६
पूरा पढ्नुहोस्
प्रतिक्रिया
पठाउनुहोस्
×