शिक्षक धर्नामा- गण्डकी - कान्तिपुर समाचार
कान्तिपुर वेबसाईट
AdvertisementAdvertisement

शिक्षक धर्नामा

कान्तिपुर संवाददाता

बागलुङ —  शिक्षकलाई निजामती कर्मचारीसरहको सेवा सुविधासहित ३४ बुँदे माग राखेर यहाँका शिक्षकले रिले अनशन तथा धर्ना दिएका छन् ।

नेपाल शिक्षक महासंघको नेतृत्वमा जिल्लाका १० वटै पालिका र शिक्षा विकास तथा समन्वय इकाइमा अनशन बसेका हुन् । माग पूरा नभए कडा संघर्षका कार्यक्रम ल्याउने महासंघ बागलुङका अध्यक्ष उमाकान्त पौडेलले बताए ।

उनीहरूले शिक्षक सेवा आयोगलाई संवैधानिक शिक्षा आयोग बनाइनुपर्ने, विद्यालय व्यवस्थापन समिति गठनबारे शिक्षा ऐनमा व्यवस्था हुनुपर्ने, शिक्षकलाई कोभिडविरुद्धको खोप, सामुदायिक विद्यालयमा कर्मचारीको दरबन्दी कायम गरिनुपर्ने माग राखेका छन् ।

‘शिक्षकका धेरै मागमा सरकारले आश्वासन मात्रै दिएको छ, पूरा गरेको छैन,’ धौलागिरि बहिरा माविका प्रअ रेशमबहादुर श्रीषले भने, ‘बिदा, ग्रेडलगायतका धेरै सेवाबाट शिक्षक ठगिएका छन्, त्यो पूरा हुनुपर्ने माग हो ।’

प्रकाशित : श्रावण १७, २०७८ १२:०१
प्रतिक्रिया
पठाउनुहोस्

खोप लगाउन अनलाइन दर्ता अनिवार्य

विदेश जाँदा खोप लगाएको प्रमाण चाहिएपछि अनलाइन रेकर्ड सहज हुने
घनश्याम खड्का

म्याग्दी — कोभिड–१९ विरुद्धको खोप कार्यक्रमलाई बेनी नगरपालिकाले पूर्ण विद्युतीय बनाउने भएको छ । अब खोप लगाउन चाहने १८ वर्ष उमेरमाथिका नागरिकले अनिवार्य अनलाइन दर्ता गरेको हुनुपर्नेछ । 

विश्व स्वास्थ्य संगठन/यूएनडीपीको प्राविधिक सहयोगमा स्वास्थ्य तथा जनसंख्या मन्त्रालयले गण्डकी प्रदेशमा नमुनाका रूपमा बेनीमा खोप कार्यक्रमलाई पूर्ण विद्युतीय बनाउन लागेको हो ।

‘खोपको रेकर्डिङ र रिपोर्टिङ सिस्टमलाई व्यवस्थित गर्न डिजिटलाइजेसन थालेका हौं’ स्वास्थ्य सेवा विभाग एकीकृत स्वास्थ्य तथा सूचना व्यवस्थापनका सदस्य सचिव दिवाकर सापकोटाले भने, ‘अहिले नमुनाका रूपमा महानगर, उपमहानगर, नगर र गाउँपालिका गरी सात प्रदेश समेटेर सात स्थानीय तहमा विद्युतीय बनाउन लागेका हौं । सबै स्थानीय तहमा लागू हुनेछ ।’

पूर्ण विद्युतीय गराउन हरेक स्वास्थ्य संस्थाका स्वास्थ्यकर्मी र स्वयंसेवक परिचालन गरी अनलाइन फारम भर्न लगाउने र नसक्नेको आफैंले अनलाइन फाराम भर्दिने व्यवस्था मिलाइएको छ । यसअघि खोप लगाइसकेकाको अभिलेख पनि खोपको विद्युतीय अभिलेखमा प्रविष्ट गराइने भएको छ । प्रिअनलाइन फाराम भरेपछि लाभग्राहीले एउटा कोड नम्बर पाउने छन् । सरकारले उमेर समूह अनुसार गराउने अभियानमा खोप लगाउन आउँदा सोही कोड नम्बर लिएर आउनुपर्छ । विश्वभरका देशले पर्यटक, कामदार– लाई अनिवार्य खोप लगाएको प्रमाण माग्न थालेपछि खोपको अनलाइन रेकर्डले अध्यागमनमा पनि सहज हुने स्वास्थ्य मन्त्रालयले जनाएको छ ।

‘खोप अभियानमा लक्षित समूहले भन्दा अन्यले खोप लगाउने गरेको गुनासा आएका छन् । खोपको दुरुपयोग भएकोले पनि खोपको रेकर्ड र रिपोर्टिङलाई पूर्ण विद्युतीय बनाउन बनाउन आवश्यक छ’ विश्व स्वास्थ्य संगठनका डा.रामु शर्माले भने, ‘पूर्ण विद्युतीयपछि विदेश जाँदा अध्यागमन र विश्वभर जहाँ गए पनि आफ्नो युनिक कोड नम्बर देखाए पनि सहज हुनेछ ।’

प्रकाशित : श्रावण १७, २०७८ १२:०१
पूरा पढ्नुहोस्
प्रतिक्रिया
पठाउनुहोस्
×