म्याग्दीमा जिप पल्टँदा एकको मृत्यु, आठ जना घाइते
म्याग्दी — धवलागिरि गाउँपालिका–७ धारापानीनजिक वादिकाको भिरमा यात्रुवाहक जिप पल्टँदा एक जनाको मृत्यु भएको छ । ताकमबाट सदरमुकाम बेनीतर्फ गइरहेको ग१ज ६८०५ नम्बरको जिप शुक्रबार बिहान ११ बजे सडकबाट खसेको हो ।
दुर्घटनामा ताकमकै २७ वर्षीय विशाल सुनारको मृत्यु भएको प्रहरीले जनाएको छ । प्रहरीका अनुसार दुर्घटनामा घाइते चालकसमेत ८ जनाको मालिका गाउँपालिकाको केन्द्र दरवाङस्थित प्राथमिक स्वास्थ्य चौकीमा उपचार भइरहेको छ ।
‘घाइतेको थप विवरण आउन बाँकी छ,’ जिल्ला प्रहरी प्रमुख प्रहरी नायब उपरीक्षक श्यामकुमार राईले भने, ‘ओरालो सडकबाट भिरतर्फ गुल्टेको गाडी संयोगले सल्लाको रुखमा अड्केकाले थप मानवीय क्षति भएन ।’
प्रकाशित : श्रावण १५, २०७८ १३:१६