सवारी उल्लंघनमा दुईपांग्रे बढी- गण्डकी - कान्तिपुर समाचार
कान्तिपुर वेबसाईट
AdvertisementAdvertisement

सवारी उल्लंघनमा दुईपांग्रे बढी

कान्तिपुर संवाददाता

गोरखा — मादक पदार्थ सेवन गरेका कारण आर्थिक वर्ष २०७७/७८ मा ५२ सवारी चालक कारबाहीमा परेका छन् । तीमध्ये सवैभन्दा धेरै ४१ जना मोटरसाइकल चालक छन् ।

८ जना कार र ३ जना ट्र्याक्टर चालक पनि मादक पदार्थ सेवन (मापसे) गरी सवारी चलाएको आरोपमा कारबाहीमा परेका थिए ।

पछिल्लो ३ आर्थिक वर्षमा मादक पदार्थ सेवन गरेर २ सय ९ जना कारबाहीमा पर्दा सबैभन्दा बढी १ सय ५९ जना दुईपांग्रे चालक छन् । मापसे गरेर सवारी चलाउनेलाई ट्राफिक प्रहरीले १ हजार रुपैयाँ जरिवाना गर्दै आएको छ । ‘यसअघिका आर्थिक वर्षमा मापसे गर्नेलाई १ हजार रुपैयाँ जरिवाना गरी लाइसेन्स प्वाल पाथ्यौँ,’ जिल्ला ट्राफिक प्रहरी कार्यालयका प्रमुख मित्रलाल ढकालले भने, ‘अहिले धेरैको स्मार्ट लाइसेन्स छ, एक हजार जरिवाना गरेर यातायात व्यवस्था विभागलाई कारबाहीका बारेमा जानकारी गराउँछौँ ।’

दुईपांग्रे सवारी चालकलाई नियम पालनामा कडाइ गर्न सडकमा ट्राफिकले सचेतनामूलक कार्यक्रम पनि सञ्चालन गरेको थियो । ट्रक, टिपर र ट्र्याक्टरका चालक पनि सवारी नियम उल्लंघनमा अगाडि छन् । यस्तै जथाभावी पार्किङ गर्ने सवारीलाई ‘ह्वील लक’ लगाएर कारबाही थालेको ढकालले बताए । बिहीबारबाट सुरु गरिएको उक्त अभियानअन्तर्गत जथाभावी पार्किङ गर्ने ७ सवारी कारबाहीमा परेकोमा ५ वटा मोटरसाइकल छन् ।

प्रकाशित : श्रावण ११, २०७८ १०:०७
प्रतिक्रिया
पठाउनुहोस्

‘भ्याक्सिन’ मा भनसुन

जनप्रतिनिधि र कर्मचारी नै लुकाउँछन् खोप 
दीपक परियार

पोखरा — ५५ वर्षमाथिकालाई कोरोनाविरुद्धको खोप लगाउन असार ३० मा पोखरा–६ बैदाममा ६ सय डोज भेरोसेल खोप पुग्यो । खोप लगाउन नाम टिपाउनेको संख्या ५ सय २७ थियो । तर १०–१२ जनाले खोप नै लगाउन पाएनन् । झन्डै ८० खोप गायब भयो ।

फाइल तस्बिर : रोयटर्स

हराएको ८० खोप जनप्रतिनिधि र कर्मचारीले लक्षित समूहबाहेकका आफन्तलाई लगाएको उजुरी जिल्ला प्रशासन कार्यालय कास्कीमा पर्‍यो । पोखराका १ देखि १७ नम्बर वडामा त्यसै दिन खोप लगाइयो । केही वडामा भनसुनका आधारमा जनप्रतिनिधिका आफन्तलाई खोप लगाइएको भन्दै विरोध भयो । भोलिपल्ट १८ देखि ३३ नम्बर वडामा ५५ वर्षमाथिकालाई जोन्सन एन्ड जोन्सनको जान्सिन खोप लगाउने भनिएकोमा १० बजे स्थगित भयो । खोप बोकेर स्वास्थ्यकर्मी फिर्ता भए ।

कास्की स्वास्थ्य कार्यालय प्रमुख बाबुराम आचार्य अत्यावश्यक सेवामा संलग्न र ५५ वर्षमाथिकालाई एकै स्थानमा खोप लगाउँदा अव्यवस्थित भएको स्विकार्छन् । व्यवस्थापकीय त्रुटि हुँदा केही मात्रामा लक्षित समूहभन्दा बाहेककाले खोप लगाएको हुन सक्ने उनले बताए । असार ३१ मा भने स्वास्थ्य मन्त्रालय निर्देशनअनुसार स्थगित गर्नुपरेको उनले बताए । ‘हामीसँग जान्सिन खोप भएकाले ५५ वर्षमाथिकालाई लगाउने भन्ने थियो,’ उनले भने, ‘मन्त्रालयको नीति ५० देखि ५४ वर्षसम्मकालाई मात्रै लगाउने भएकोले स्थगित भयो ।’ कास्कीको रूपा, मादी, माछापुच्छ्रे र अन्नपूर्ण गाउँपालिकामा ५० वर्षमाथिकाले खोप लगाइसकेका छन् ।

पोखरा महानगरमा स्थगित खोप अभियान सोमबारबाट पुनः सुरु हुँदै छ । चीनबाट १७ हजार ५ सय डोज भेरोसेल खोप आएकाले अभियानलाई निरन्तरता दिने पोखरा महानगर स्वास्थ्य महाशाखा प्रमुख हेमन्त शर्मा पौडेलले बताए । उनका अनुसार सोमबार १८ देखि ३३ नम्बर वडाका ५५ वर्षमाथि उमेर समूहका नागरिक र शिक्षकले भेरोसेल खोप लगाउन पाउने छन् । यसपल्ट शिक्षकका लागि ग्रामीण क्षेत्रमा सम्बन्धित खोप केन्द्र र सहरमा लेखनाथका जनप्रकाश मावि, भण्डारढिक र लक्ष्मी मावि, शिशुवामा तोकिएको छ ।

१८ देखि ३३ नम्बर वडामा ५२ देखि ५४ वर्ष उमेर समूहकालाई जान्सिन खोप लगाइने छ । १ देखि १७ नम्बर वडामा ५२ देखि ५४ वर्षसम्म उमेर समूहका साउन १४ बाट खोप दिइने छ । सार्वजनिक यातायातका मजदुर, बैंकका कर्मचारीलगायत लक्षित समूहलाई भने अर्को मिति तोकिने पौडेलले बताए । जनप्रतिनिधिबाट खोप कार्यक्रमको अनुगमन मात्रै गर्नुपर्नेमा हस्तक्षेप नै भएको उनी बताउँछन् । महानगरकै एक स्वास्थ्यकर्मीले जिल्ला प्रशासन कार्यालयबाट सिफारिस लिएर आउनेलाई खोप लगाउँदा तोकिएको समूहलाई नपुग्ने गरेको बताए ।

‘पहुँच हुनेहरूले प्रशासनबाटै सिफारिस लिएर आउँछन्,’ उनले भने, ‘सिफारिस लिएर आएपछि हामीले लगाउँदैनौं भन्न मिल्दैन ।’ कास्कीका प्रमुख जिल्ला अधिकारी थानेश्वर गौतम विगतका त्रुटि दोहोरिन नदिन उमेर समूह र शिक्षकलाई खोप लगाउने स्थान छुट्टाछुट्टै तोकिएको बताए । दुरुपयोग हुन नदिन नागरिक स्वयं आत्मानुशासनमा बस्नुपर्ने उनले बताए । ‘खोप केन्द्रमा सुरक्षा र अनुगमन दुवै बढाउँछौं,’ उनले भने, ‘अत्यावश्यक सेवा क्षेत्रबाहेककालाई कुनै सिफारिस प्रशासनबाट गएको छैन ।’

प्रकाशित : श्रावण ११, २०७८ १०:०५
पूरा पढ्नुहोस्
प्रतिक्रिया
पठाउनुहोस्
x
×