सडकले बर्सेनि सास्ती- गण्डकी - कान्तिपुर समाचार
कान्तिपुर वेबसाईट
AdvertisementAdvertisement

सडकले बर्सेनि सास्ती

हरिराम उप्रेती

गोरखा — लाप्राकबाट ३ घण्टाको पैदल यात्रापछि बारपाक पुगेर जिप चढी शिरबहादुर गुरुङ सदरमुकाम झरे । एक दिन खर्चेर गोरखा बजार आइपुगेका गुरुङलाई लाप्राक फर्कन अझै सास्ती छ । बारपाक सडक खण्डअन्तर्गत बालुवामा पक्की पुलसँगैको पहुँचमार्ग दरौंदीको भेलले भत्काएपछि आउजाउ सकस बनेको हो । 

बाह्रकिलो–बारपाक सडक खण्डअन्तर्गत चोरकाटेखण्ड । फाइल तस्बिर : कान्तिपुर

बारपाक–लाप्राक सडक पनि दुई सातायता अवरुद्ध छ । लाप्राकमा दैनिक उपभोग्य सामान ढुवानी हुन सकेको छैन भने बिरामी र विभिन्न कामले सदरमुकाम झरेकाहरू पनि समस्यामा परेका छन् । बारपाक सडक भएर लाप्राक र गुम्दाका स्थानीय आउजाउ गर्दै आएका थिए । बालुवा बजारसम्म पुगेका स्थानीय पैदल पुलबाट पारि तरेपछि बल्ल जिप चढेर यात्रा गर्छन् ।

‘जिप पाउने/नपाउने पनि ठेगान हुँदैन,’ उनले भने, ‘गाडी नपाए पैदल नै उकालो हिँडेर लाप्राक पुग्नुपर्छ, राङरुङबाटै हिँड्नुपरे लाप्राक पुग्न ६ घण्टा लाग्छ ।’ पुल र सडकसँग फलेक बिछ्याएर स्थानीयले जोखिमका साथ मोटरसाइकल तार्ने गरेका छन् । वर्षात्ले बारपाक–लाप्राक सडक खण्डमा असार १७ पछि सवारी सञ्चालन हुन सकेको छैन । ‘हिउँदमा बनाउँछन्, बर्खामा बगाउँछ,’ गुरुङले भने, ‘यसपटक मात्र होइन, बर्सेनि यस्तै समस्या हो ।’

बारपाक सडक खण्डअन्तर्गत अजिरकोट र बारपाक सुलिकोट गाउँपालिका जोड्ने दरौंदी नदीमाथिको पक्की पुल गत सोमबार पुनः भत्किएको छ । शुक्रबारबाट भेलले भत्काएको पुलसँगैको सडक मर्मतको काम सुरु भएको छ । असार दोस्रो साता पनि पुलसँगै भत्काए पनि सामान्य मर्मतपछि सवारी सञ्चालन हुँदै आएको थियो ।

बारपाक–लाप्राक सडक खण्डअन्तर्गत ठाउँ–ठाउँको पहिरो र कटानले अवरुद्ध बनेको धार्चे गाउँपालिका–४ लाप्राकका वडाध्यक्ष राज गुरुङले बताए । उक्त सडक खण्डअन्तर्गत वर्षात्ले प्यारीखर्क क्षेत्रमा सबैभन्दा बढी क्षति पुगेको छ । ‘बारपाकबाट ट्र्याक्टर, मोटरसाइकल पनि चलेको छैन,’ उनले भने, ‘दैनिक उपभोग्य सामग्री ढुवानी हुन सकेको छैन, भएको पनि सकिँदै छ । बाटोले समस्या पारेको छ ।’ गाउँमा कोही बिरामी परे पिठ्यूँमा बोकेर बारपाकसम्म ल्याउनुपर्ने बाध्यता थपिएको उनले बताए ।

बाह्रकिलो–बारपाकसम्म पनि बर्खाका बेला सवारी आउजाउमा समस्या रहेको स्थानीय बताउँछन् । बारपाकसम्मको ४६ किमिमध्ये ३३ किलोमिटर कालोपत्रका लागि ठेक्का आह्वान गरेर ११ किलो छेवेटार भालुस्वाँरा सडक कार्यालयले काम गरिरहेको छ । सडक कालोपत्रका लागि २०७१ बाट चार खण्डमा ठेक्का लागेको थियो । सम्झौताअनुसार बारपाकसम्मको सडक २०७५ असारसम्म कालोपत्र सकिनुपर्थ्यो । तर अझै १२ किलोमिटर सडक कालोपत्र बाँकी छ ।

बाँकी १२ किलोमिटर सडक चालु आर्थिक वर्ष कालोपत्र सक्ने लक्ष्य रहेको ११ किलो छेवेटार भालुस्वाँरा सडक कार्यालयका इन्जिनियर राजेश यादवले बताए । राङरुङदेखि मान्द्रेसम्मको सडकमा पहिरोले समस्या पारेको उनले बताए । ‘राङरुङ–मान्द्रे सडक खण्डमा दुई किलोमिटर ढलान पनि भएको छ, त्यही खण्डमा पहिरो धेरै छन् क्लियर गर्नुपर्नेछ,’ उनले भने ।

बालुवास्थित पक्की पुलसँगैको सडक शुक्रबारबाट मर्मत सुरु भएको उनले बताए । ‘स्थानीयले खोला डाइभर्ट गर्न दिएनन्, बालुवातर्फ नदीको बहाव सोझिएकाले जाली राख्न पनि समस्या भइरहेको छ,’ उनले भने, ‘पुल जोगाएर गाडी हिँड्न मिल्ने बनाउन काम सुरु गरेका छौं ।’ राङरुङ–मान्द्रे सडकमा साना सवारी सञ्चालन भएको उनले बताए । मान्द्रेमा भत्किएको ५० मिटर सडक बर्खापछि मर्मत गर्ने योजना रहेको उनले बताए ।

प्रकाशित : श्रावण ९, २०७८ १३:५३
प्रतिक्रिया
पठाउनुहोस्

गोरखामा साउन २४ गतेसम्म थपियो निषेधाज्ञा

हरिराम उप्रेती

गोरखा — गोरखामा जारी निषेधाज्ञा साउन २४ गतेसम्म थपिएको छ । शुक्रबार बसेको जिल्ला कोभिड संकट व्यवस्थापन केन्द्रको सिफारिसमा प्रमुख जिल्ला अधिकारी शालिग्राम शर्मा पौडेलले थप १५ दिन निषेधाज्ञा जारी गरेका हुन् । यसअघि साउन ९ गते(शनिबार) राति १२ बजेसम्म निषेधाज्ञा जारी भएको थियो ।

जिल्लामा नयाँ भेरियन्टसहितको कोरोना भाइरस संक्रमणको अवस्थालाई मध्यनजर लिँदै संक्रमण रोकथाम, नियन्त्रण र व्यवस्थापनको लागि निषेधाज्ञालाई निरन्तरता दिने निर्णय भएको प्रशासनका अधिकृत हर्क रोकाले बताए ।

निषेधाज्ञाको अवधिमा सबै प्रकारको सभा सम्मेलन, गोष्ठी, तालिम, सेमिनार, भेला, जात्रा, महोत्सव गर्न निषेध गरिएको छ । जिल्लाभित्र निजी तथा सार्वजनिक सवारी साधान भने यसअघि नै सञ्चालनमा छ । विश्वविद्यालय, क्याम्पस एवं माध्यमिक विद्यालयहरुको पूर्वनिर्धारित परीक्षाहरु स्वास्थ्य सावधानी अपनाएर भौतिक दूरी कायम गरी सञ्चालन गर्न पाइने भएको छ । क्याम्पस विद्यालय लगायतका सबै शैक्षिक संस्था, तालिम प्रशिक्षक केन्द्रबाट भौतिक रुपमा उपस्थित भइ हुने पठनपाठन लगायतका शैक्षिक गतिविधिहरु सञ्चालनमा भने रोक लगाइएको छ ।

दैनिक उपभोग्य खाद्यान्न, तरकारी, फलफूल लगायतका पसलहरु बिहान ५ बजेदेखि साँझ ७ बजेसम्म खुल्ला रहेनछन् । यसअघि बिहान ५ बजेबाट साँझ ५ बजेसम्म मात्र खाद्यान्न पसल खुल्दै आएका थिए । होटल–लज सञ्चालनका सम्बन्धमा जनस्वास्थ्यका निर्धारित मापदण्ड पालना गरी कुल कोठा संख्याको ५० प्रतिशत नबढ्ने गरी सञ्चालन गर्न पाइने र कोठाहरु प्रत्येक दिन अनिवार्य निसंक्रमण गर्नुपर्ने रोकाले बताए ।

प्रकाशित : श्रावण ८, २०७८ १६:४७
पूरा पढ्नुहोस्
प्रतिक्रिया
पठाउनुहोस्
×