अब पर्वतमै स्नातकोत्तर पढाइ- गण्डकी - कान्तिपुर समाचार
कान्तिपुर वेबसाईट
AdvertisementAdvertisement

अब पर्वतमै स्नातकोत्तर पढाइ

अगन्धर तिवारी

पर्वत — पहिलो पटक अब जिल्लाभित्रै स्नातकोत्तर तहको शिक्षा अध्यापन हुने भएको छ । सदरमुकामस्थित गुप्तेश्वर क्याम्पसमा व्यवस्थापनतर्फ स्नातकोत्तर तहको पढाइ सुरु हुन लागेको हो । 

पर्वतको गुप्तेश्वर क्याम्पसको व्यवस्थापन संकायमा स्नातक अध्ययनरत विद्यार्थी । फाइल तस्बिर: अगन्धर तिवारी/कान्तिपुर ।

त्रिभुवन विश्वविद्यालयको कार्यकारी परिषद्को असार २८ को बैठकले देशभरका २३ क्याम्पसलाई कक्षा सञ्चालनको अनुमति दिएको हो । त्रिविले शैक्षिक वर्ष २०७८/७९ देखि एमबीएस कार्यक्रम सञ्चालन गर्न स्वीकृति दिने निर्णय भएकाले साउन १० गतेभित्र त्रिविको डिन कार्यालयमा २ लाख ५० हजार रुपैयाँ सम्बन्धन शुल्क बुझाउन भनेको छ ।

स्नातकोत्तर कक्षा सञ्चालन हुने खबरसँगै विद्यार्थी उत्साहित छन् । ‘हाम्रो अबको पढाइ कता हुने भन्ने चिन्ता थियो,’ स्नातक सकेर बसेकी उमा सिलवालले भनिन्, ‘अब जिल्लामै पढ्न पाइने भयो । खुसी लागेको छ ।’ व्यवस्थापन संकायमा स्नातक गरेर बसेका करिब डेढ सय जना विद्यार्थी उत्साहित भएको उनले बताइन् । क्याम्पस स्थापनाको ३० वर्षपछि स्नातकोत्तरको कक्षा सञ्चालन हुने भएपछि उत्साहित भएको पहिलो ब्याचका विद्यार्थी गोविन्द पहाडीले सामाजिक सञ्जालमा लेखेका छन् । कुस्माकै अर्जुन पौडेलले आफूले अध्ययन गरेको क्याम्पसमा स्नातकोत्तर पढाइ हुने कुराले एकदमै खुसी भएको उल्लेख गरेका छन् ।

क्याम्पस सञ्चालक समितिका अध्यक्ष वसन्त कर्माचार्यका अनुसार सेमेस्टर प्रणालीमा सञ्चालन हुने कक्षा सन्ध्याकालीन समयमा चलाउने तयारी गरिएको छ । पहिलो वर्ष कम्तीमा ८० विद्यार्थी भर्ना हुन आउने अनुमान गरिएको कर्माचार्यले जनाए । क्याम्पस प्रमुख सुभाष पन्तले लामो समयदेखिको पहल सार्थक भएको बताए । उनले भने, ‘हामीले मानविकी र शिक्षाशास्त्रमा पनि माग गरेका छौं । विस्तारै होला ।’

पूर्वाधार र जनशक्तिलगायत संरचना बनाएपछि त्रिविको अध्ययन टोलीले गरेको स्थलगत अध्ययनका आधारमा सम्बन्धन पाएको उनले बताए ।

प्रकाशित : श्रावण ७, २०७८ ०८:३४
प्रतिक्रिया
पठाउनुहोस्

सन् २०३२ को ओलम्पिक ब्रिसवेनमा

एएफपी

टोकियो — सन् २०३२ को ओलम्पिक अस्ट्रेलियाली सहर ब्रिसवेनमा हुने भएको छ । मेलबर्न र सिड्नीपछि ग्रीष्मकालीन ओलम्पिक आयोजना गर्ने अस्ट्रेलियाको ब्रिसवेन तेस्रो सहर हुनेछ ।

फाइल तस्बिर : रोयटर्स

यसको घोषणालगत्तै सहरले आतिसबाजी गरेर खुसीयाली मनाएको छ । अन्तर्राष्ट्रिय ओलम्पिक कमिटीका अध्यक्ष थोमस बाखले ब्रिसवेनको पक्षमा भएको निर्णय सुनाएका थिए । अन्तर्राष्ट्रिय ओलम्पिक कमिटीको विशेष अधिवेशनमा भएको मतदानले यो निर्णय गरेको थियो ।

ब्रिसवेन नै ओलम्पिक आयोजना गर्ने सहरको होडमा एक्लै सबैभन्दा अगाडि थियो र उसको पक्षमा आएको निर्णय अपेक्षित मानिएको छ । बाखले भनेका छन्, ‘३५ औं गृष्मकालीन ओलम्पिक ब्रिसवेनमा हुने घोषणा गर्दा अन्तर्राष्ट्रिय ओलम्पिक कमिटी गर्व महसुस गर्छ ।’ यस घोषणालगत्तै टोकियोमा रहेका ब्रिसवेनका प्रतिनिधिले तत्काल खुसीयाली मनाए । टोकियोबाट हजारौं माइल टाढा रहेको सहर ब्रिसवेनमा पनि खुसीयाली छाएको थियो ।

अन्तर्राष्ट्रिय ओलम्पिक कमिटीको १५ सदस्यीय कार्यकारी समितिले ब्रिसवेनलाई एकमात्र प्रत्याशीका रूपमा अगाडि सारेको थियो । अस्ट्रेलियाली प्रधानमन्त्री स्कट मोरिसनले यसलाई ऐतिहासिक उपलब्धि भएको दाबी गरेका छन् । उनले भनेका छन्, ‘यो ब्रिसवेन र क्विन्सल्यान्डका लागि मात्र होइन, पूरा अस्ट्रेलियाका लागि खुसीको उपलब्धि हो । विश्वका उन्नत सहरले मात्र ओलम्पिक आयोजना गर्ने अवसर प्राप्त गर्ने गर्छ । ब्रिसवेन यस्तै विकसित सहर हो र यसले ओलम्पिक आयोजना गर्ने क्रममा आफ्नो वास्तविक परिचय प्रस्तुत गर्नेछ ।’

अस्ट्रेलियाले यसअघि दुईपल्ट ओलम्पक आयोजना गरिसकेको छ । सन् १९५६ मा मेलबर्न र २००० मा सिड्नीले ओलम्पिक आयोजना गरेका थिए । त्यसमध्ये सिड्नी ओलम्पिकलाई यसको इतिहासकै सबैभन्दा सफल प्रतियोगितामध्ये एक मानिन्छ । अन्तर्राष्ट्रिय ओलम्पिक कमिटीको घोषणा सुन्न ब्रिसवेनको साउथब्यान्क रिभरसाइडमा हजारौं खेलप्रेमीको उपस्थिति थियो ।

प्रकाशित : श्रावण ७, २०७८ ०८:३०
पूरा पढ्नुहोस्
प्रतिक्रिया
पठाउनुहोस्
×