यातायात खुले, सडक खुलेनन्- गण्डकी - कान्तिपुर समाचार
कान्तिपुर वेबसाईट
AdvertisementAdvertisement

यातायात खुले, सडक खुलेनन्

कान्तिपुर संवाददाता

म्याग्दी — कोरोना संक्रमणको दोस्रो लहर फैलिएसँगै जारी निषेधाज्ञा खुकुलो भएपछि बन्द यातायात सेवा शुक्रबारदेखि सञ्चालनमा आएको छ । डीसीसीएमसीले वैशाख २२ देखिको निषेधाज्ञा खुकुलो गरी सार्वजनिक यातायात खुलाउने निर्णय गरे पनि जिल्लाका अधिकांश मुख्य तथा ग्रामीण सडक पहिरोले अवरुद्ध छन् । 

‘बेनी–बरंजा, बेनी–पुलाचौर र बेनी–झीं सडकमा जिप चल्नेबाहेक जिल्लाका अन्य सबै सडकमा पहिरोले यातायात अवरुद्ध छ,’ म्याग्दी यातायात व्यवसायी कम्पनीका अध्यक्ष सुमन श्रेष्ठले भने । बेनी–जोमसोम र बेनी–दरबाङ सडकमा दैनिक पहिरो पन्छ्याएर यातायात सञ्चालन हुन्छ । तर पहिरो झर्ने क्रम नरोकिएकाले सडक प्रायः अवरुद्ध भइरहेको छ । यातायात व्यवसायीका अनुसार पहिरोले पुर्दा र भासिँदा सडक साँघुरो भएपछि साना जिप, भ्यान मात्र चल्न सक्ने अवस्था छ । तर ठूला बस सञ्चालन हुने सम्भावना छैन ।

बेनी–जोमसोम–कोरोला सडकको गलेश्वरमा पहिरोका कारण सातादेखि यातायात अवरुद्ध छ । ‘वारपार गर्नैपर्ने गाडी डोजर र ट्र्याक्टरको सहयोगमा पास गराइएको छ,’ प्रहरी निरीक्षक वीरेन्द्रकुमार श्रेष्ठले भने, ‘म्याग्दी खण्डमा केही दिनदेखि ३ ठाउँमा पहिरो पन्छ्याउने प्रयास जारी छ । ग्रामीण सडक पनि धेरै समयदेखि बन्द छन् ।’ घार, शिख हुँदै घोडेपानी पुग्ने सडक, गलेश्वर–बेग, महभीर–घराम्दी, बाबियाचौर–अर्मन, दरबाङ–रुम, देवीस्थान–मराङलगायत जिल्लाका अधिकांश ग्रामीण सडकमा यातायात ठप्प छ ।

प्रकाशित : श्रावण ६, २०७८ १३:३०
प्रतिक्रिया
पठाउनुहोस्

लगातारको पहिरोले सास्ती

अस्थिर धरातल, मर्स्याङ्दीको कटान, माथिल्लो क्षेत्रमा रोपाइँ गरिनुलगायत कारणले पहिरो खस्ने गरेको हो 
आश गुरुङ

लमजुङ — उत्तिसै उत्तिसको रूख भएकाले ठाउँको नाम उत्तिसघारी । त्यही उत्तिसघारीमा पहिरो चल्यो । तल मर्स्याङ्दी नदी बगेको छ । मर्स्याङ्दीमा मिसिने गरी खरखर बग्ने पहिरो भएकाले बेंसीसहर नगरपालिका–६ चनौटे नजिकैको पहिरोलाई खरखरे पहिरो भनिन्छ । पहिरो यतिबेला दिनदिनै बगेको छ ।

लमजुङको बेंसीसहर–चामे सडकअन्तर्गत उत्तीसघारी खरखरेमा सडक फराकिलो बनाइँदै। तस्बिर : कान्तिपुर

दिनदिनै लोडरले पन्छाइन्छ । यो हिमाली जिल्ला मनाङ र लमजुङको मर्स्याङ्दी गाउँपालिका जाने–आउने एक मात्र सडक हो । उक्त सडक बेंसीसहरदेखि ३ किलोमिटरको दूरीमा पर्छ ।

स्थानीय शंकर रिमालका अनुसार अहिले बाटो हिँडिसाध्यै छैन । ‘अहिलेसम्म मानवीय क्षति भएको छैन,’ उनले भने । बेंसीसहर नगरपालिकाका कार्यक्रम अधिकृत मेघेन्द्र पोखरेलका अनुसार बाटो कहिले बन्द हुन्छ, थाहा हुँदैन । ‘बाटो खुला होला भनेर आयो, बन्द भइरहेको हुन्छ । फर्केर बगैंचाको झोलुंगे पुल हुँदै पारि तरेर बेलौती बिसौनाको झोलुंगे पुल तरेर चनौटे हुँदै आउजाउ गर्नुपरेको छ,’ उनले भने । बेंसीसहर–चामे सडक सरोकार, समन्वय तथा संघर्ष समितिका संयोजक एवं खुदी उद्योग वाणिज्य संघका अध्यक्ष सूर्यप्रकाश कतिलाका अनुसार अहिले खाद्यान्न आपूर्ति ठप्प छ । ‘बाटो खुलेपछि बेंसीसहरमा सामान लिन जान्छौं । आउँदा बन्द भइसकेको हुन्छ,’ उनले भने ।

मर्स्याङ्दी गाउँपालिका अध्यक्ष अर्जुन गुरुङले बेंसीसहर–चामे सडकको खुदी–बेंसीसहर खण्डमा खरखरे पहिरोले रुवाउने गरेको बताए । ‘काम परेर बेंसीसहर जाँदा र फर्किंदा खरखरेले रोक्छ,’ उनले भने । उनका अनुसार खरखरेको पहिरो रोक्ने दीर्घकालीन समाधानको प्रक्रिया अघि बढेको बताए । बेंसीसहर–६ का अध्यक्ष भोजबहादुर रिमालले पहिरोले माथिल्लो क्षेत्रका गाउँ नै जोखिममा परेको बताए । उनका अनुसार भिरालो जमिन, कमजोर धरातल, मर्स्याङ्दी नदीको कटान, पहिरोमा मूल फुट्नु, माथिल्लो क्षेत्रमा धान रोपाइँ गरिनु लगायत कारणले पहिरो खस्ने गरेको हो । पहिरो खसेपछि आउजाउ ठप्प हुँदा सबैभन्दा बढी बालबालिका र वृद्धवृद्धा समस्यामा पर्ने गरेको उनले बताए ।

प्रमुख जिल्ला अधिकारी होमप्रसाद लुइँटेलले खरखरेमा झरेको पहिरो पन्छाउने काम दिनदिनै भइरहेको बताए । ‘पहिरो पन्छायो, पानी परेपछि फेरि पहिरो खस्छ । यसले समस्या भएको छ,’ उनले भने, ‘बर्खायाम जसोतसो चलाउनुपर्ला । हिउँदबाट समस्या समाधानको दीर्घकालीन कार्य सुरु हुन्छ ।’

डुम्रे–बेंसीसहर–चामे सडक योजनाका प्रमुख डिभिजन इन्जिनियर अमितकुमार श्रेष्ठका अनुसार आगामी आर्थिक वर्षदेखि खरखरेको पहिरोलाई हटाएर नयाँ बाटो बनाउने काम सुरु हुन्छ । अहिले पहिरो खस्ने समस्या भएकाले एउटा लोडर खरखरेकै लागि राखिएको उनले बताए । उनका अनुसार खरखरे क्षेत्रमा मात्रै १ सय ९० मिटर काम गर्नुपर्छ । बजेटबाट बाटोमाथिको माटो निकाल्ने, तौल घटाउने, माथिल्लो क्षेत्रमा किला ठोक्ने, पानीलाई मुनिबाट निकाल्नेलगायत नयाँ प्रविधिबाट काम गरी सडक निर्माण हुने उनले बताए । उनका अनुसार आगामी आर्थिक वर्षदेखि बेंसीसहर–खुदी कालोपत्रको काम पनि सुरु हुन्छ ।

बेंसीसहरबाट मनाङसम्म सडक पुर्‍याउने भनी सडक विभागले आर्थिक वर्ष २०५१/०५२ मा बेंसीसहरबाट सडक निर्माण सुरु गरेको थियो । सडक निर्माण गरेकै वर्षदेखिको यो समस्या अहिलेसम्म पनि छ । पहिरोले माथिल्लो गाउँका २० घर बढी जोखिममा रहेको वडाध्यक्ष रिमालले बताए ।

प्रकाशित : श्रावण ६, २०७८ १३:१७
पूरा पढ्नुहोस्
प्रतिक्रिया
पठाउनुहोस्
×