२७ सय भूकम्पपीडित सूचीबाट हटे- गण्डकी - कान्तिपुर समाचार

२७ सय भूकम्पपीडित सूचीबाट हटे

दोहोरो भुक्तानी लिएका, एकै परिवारका, घर बनाउन अनिच्छुक र अन्यत्र घर भएका हटे
हरिराम उप्रेती

गोरखा — अनुदान सम्झौता नगर्ने जिल्लाका २ हजार ७ सय तीन भूकम्पपीडितलाई लाभग्राही सूचीबाट हटाइएको छ । पुनर्निर्माण प्राधिकरणले दिएको समयसीमाभित्र अनुदान सम्झौता नगर्नेलाई सूचीबाट हटाइएको हो । हटाउन सिफारिसमा परेका लाभग्राहीमध्ये केही दोहोरो भुक्तानी लिएका, एकै परिवारका, एकभन्दा बढी लाभग्राही सूचीमा परेका, घर बनाउन अनिच्छुक देखिएका र अन्यत्र घर भएकाहरू छन् । 

गत मंसिर मसान्तसम्म अनुदान सम्झौता नगर्ने यस्ता लाभग्राहीको विवरण राष्ट्रिय पुनर्निर्माण प्राधिकरण जिल्ला आयोजना कार्यान्वयन इकाइ अनुदान व्यवस्थापन तथा स्थानीय पूर्वाधारको कार्यालयले पुसमा पठाएको थियो । ‘सार्वजनिक सूचना निकाल्यौं, स्थानीय तहलाई के कारणले अनुदान सम्झौता भएन बुझ्न पत्राचार गर्‍यौं,’ उनले भने, ‘भेरिफाइ सकेर, विवरण यकिन गरी पठाएका थियौं, केन्द्रबाट हटेको जानकारी आएको छ ।’

अनुदान सम्झौता नगरेकै कारण हट्नेमा सबैभन्दा धेरै पालुङटार नगरपालिकाका ६ सय ५ छन् । आरुघाट गाउँपालिकाको ९९, अजिरकोटको एक सय ४, भीमसेन थापाको ७३, चुमनुब्रीको २ सय ६४ छन् । धार्चे गाउँपालिकाको १ सय २४, गण्डकीको ३ सय ९३, गोरखा नगरपालिकाको ४ सय, सहिद लखन गाउँपालिकाको २ सय ५१, सिरानचोकको १ सय ९१ र बारपाक सुलिकोट गाउँपालिकाको १ सय ९८ पीडितलाई सूचीबाट हटाइएको हो ।

भूकम्पपछिको निजी आवास पुनर्निर्माणका लागि आगामी कात्तिक मसान्तसम्म म्याद थप भएको छ । ‘निजी आवास पुनर्निर्माणको काम छिटो सक्नुछ,’ उनले भने, ‘कारण बुझेर लामो समयसम्म सम्झौता नै नगर्नेलाई लाभग्राही सूचीबाट हटाएका हौं ।’ भूकम्पको ६ वर्षमा २०७२ वैशाख १२ को भूकम्पको केन्द्रबिन्दु गोरखामा ९४ प्रतिशत निजी आवास पुनर्निर्माण सम्पन्न भएको छ । भूकम्पले यहाँका ७० हजार बढी निजी संरचनामा क्षति पुर्‍याएको थियो । ७० हजार एक सय ४२ ले पहिलो किस्ता लिएकोमा ६४ हजार चार सय ७० घर पुनर्निर्माण सम्पन्न भएको इकाइ प्रमुख आचार्यले बताए । प्रबलीकरण र पुनर्निर्माण गरी यहाँ ७२ हजार आठ सय ४५ लाभग्राही छन् ।

प्रबलीकरणका दुई हजार तीन सय ९२ मध्ये एक हजार ५ सय ५० ले पहिलो किस्ता लिएका छन् । दोस्रो किस्ता भने ५४ जनाले मात्र लिएको इकाइले जनाएको छ । प्रबलीकरणका लाभग्राहीले घर मर्मतका लागि दुई किस्तामा एक लाख पाउँछन् । ढुंगामाटोले बनेका घर रेक्ट्रोफिटिङ (मर्मत) गरेर बस्न नसकिने भन्दै यस्ता लाभग्राहीले मर्मतमा अनिच्छा देखाएका छन् । केही लाभग्राहीले अनुदान सम्झौता गरी पहिलो किस्ता लगेर पनि घर निर्माणलाई पूर्णता दिएका छैनन् । यस्ता लाभग्राहीको इकाइ र स्थानीय तहबाट खोजी भइरहेको छ ।

प्रकाशित : श्रावण ५, २०७८ ११:४१
प्रतिक्रिया
पठाउनुहोस्

मर्मत सकेको एक सातामै भत्कियो बारपाक जोड्ने पक्की पुल

हरिराम उप्रेती

गोरखा — मर्मत सकेको एक सातामै बारपाक जोड्ने पक्की पुल भत्किएको छ । बाह्रकिलो–बारपाक सडक खण्ड अन्तर्गत बालुवाको पक्की पुलसँग जोडिएको सडक दरौदीको भेलले भत्काएको हो ।

पुल भत्किएपछि सोमबारबाट आवातजावत ठप्प बनेको छ । उक्त सडक भएर बारपाक, लाप्राक, गुम्दाका स्थानीय आउजाउ गर्दै आएका छन् । सडक अवरुद्ध भएपछि अत्यावश्यक कामका लागि सदरमुकामसम्म पुग्न स्थानीयलाई सास्ती भएको छ ।

आइतबार रातिको भेलले अजिरकोट गाउँपालिका र बारपाक सुलिकोट गाउँपालिका जोड्ने बालुवास्थित पक्की पुलको एकापटिको भाग कटान गरेको स्थानीय प्रदीप घलेले बताए । ‘गाडी आउन जान मिल्दैन, मान्छे भने हिँड्न मिलेको छ,’ उनले भने । पुलको बालुवातर्फको ‘एप्रोच’ सडक कटान भएको हो । डेढ साताअघिको दरौदीको भेलले पुलसँग जोडिएको सडक बगाएपछि मर्मत गरेर सवारी सुचारु भएको थियो ।

पुलसँगै जोडिएको सडक भाँसिएको र मर्मतको तयारी भइरहेको ११ किलो छेवेटार भालुस्वाँरा सडकका इन्जिनियर राजेश यादवले बताए । ‘मर्मत सकेको हप्तादस दिन भएको थियो, ग्राभेल राखेर एप्रोच सडक बनाएका थियौं,’ उनले भने,‘फेरि गए रातिको भेलले काटिदिएछ, आजैबाट मर्मत थाल्छौं ।’ नदी डाइभर्ट नहुँदा खोला कर्नरतिर (बालुवातर्फ) बगेको उनले बताए ।

प्रकाशित : श्रावण ४, २०७८ १५:१५
पूरा पढ्नुहोस्
प्रतिक्रिया
पठाउनुहोस्
×