मनाङमा हेलिकप्टरबाट ३५ जनाको उद्धार- गण्डकी - कान्तिपुर समाचार

मनाङमा हेलिकप्टरबाट ३५ जनाको उद्धार

आश गुरुङ

लमजुङ — बाढी पीडितको उद्धार गर्न राहतसहित नेपाली सेनाको हेलिकप्टर मनाङ पुगेको छ । मनाङबाट प्रतिनिधिसभामा निर्वाचित पोल्देन छोपाङ गुरुङसहित उद्धार टोली मनाङ पुगेको हो ।

हेलिकप्टरले मनाङको नासों गाउँपालिका–१, सिरानतालमा फसेका २४ जनालाई तालडाँडामा लगेको छ । सानों गाउँपालिका–५, थोंचेका ११ जनालाई उद्धार गरी चामेमा लगिएको प्रमुख जिल्ला अधिकारी विष्णु लामिछानेले बताए ।

यस्तै, नासों गाउँपालिका ६, ताम्राङमा रहेका १६ जनाको उद्धारको प्रयास भइरहेको छ । विघटित प्रतिनिधिसभा सांसद पोल्देन छोपाङ गुरुङले चामेमा पानीको अभाव भएपछि निजी हेलिकप्टरमार्फत खानेपानी लगिएको बताए । उनका अनुसार ३ दिनदेखि बाढीका कारण फसेकाहरुको उद्धार गरिरहेको बताए ।‘बाढीका कारण भौगोलिक रुपमै समस्यामा परेकालाई उद्धार गरेका छौं । सुरक्षित ठाउँमा बसेकालाई ठाउँठाउँमा राहत पुर्‍याएका छौं,’ उनले भने । उनका अनुसार उद्धार प्रयास जारी छ ।

मनाङको नार्पाभूमि गाउँपालिकाको फू गाउँको लेकमा ७५ जना फसिरहेका छन् । पोल्देन छोपाङले ल्याएको हेलिकप्टरमार्फत् उनीहरु बस्ने ठाउँ पत्ता लगाइएको र उनीहरुको अवस्था बुझेर हेलिकप्टर फर्केको छ । फू गाउँको नामु लेक समुद्री सतहदेखि करीब ५ हजार मिटर उचाइमा हिमालमुनि उनीहरु रहेको र उद्धार गर्नुपर्ने अवस्था रहेको चामे गाउँपालिका अध्यक्ष लोकेन्द्र घलेले बताए ।

यस्तै, प्रभु हेलिकप्टरले मनाङबाट आफ्ना कर्मचारीलाई उद्धार गरेको छ । राहत लिएर पूर्व राज्यमन्त्री टेकबहादुर गुरुङ पनि मनाङ पुगेका छन् ।

प्रकाशित : असार ३, २०७८ १५:०८
प्रतिक्रिया
पठाउनुहोस्

जंगल सफारी लजमा ‘पे नाउ, गो लेटर’

कान्तिपुर संवाददाता

काठमाडौँ — चितवन सौराहास्थित जंगल सफारी लजले आन्तरिक पर्यटकलाई लक्ष्य गर्दै ‘पे नाउ, गो लेटर’ अफर ल्याएको छ ।

अफरअन्तर्गत पर्यटकले तीन रातको रुमका लागि ४ हजार रुपैयाँ मात्र तिर्दा हुन्छ । कोभिडका कारण संकटमा परेको पर्यटन क्षेत्रलाई उकास्न यस्तो योजना ल्याइएको होटलका सञ्चालक सुमन घिमिरेले जानकारी दिए ।

‘कोभिडका कारण पर्यटन क्षेत्र तहसनहस भएको छ, यो क्षेत्रलाई उकास्न जसले जति सक्छ, त्यसरी नै योगदान दिनुपर्छ भन्ने मान्यतासाथ हामीले यो योजना ल्याएका हौं,’ उनले भने । होटलका कोठामा ६२ प्रतिशत छुट दिइएको छ । कोठामा दुई वयस्क र एक बच्चा बस्न पाउनेछन् ।

यो योजनामा सहभागी हुन पर्यटकले असारभित्र प्याकेज खरिद गर्नुपर्नेछ । आफूले खरिद गरेको प्याकेजको १ महिनापछि होटलमा आएर बस्न सकिने उनले बताए । यो योजना पर्यटकले २०७८ चैत २८ सम्म प्रयोग गरिसक्नुपर्नेछ ।

प्रकाशित : असार ३, २०७८ १४:५५
पूरा पढ्नुहोस्
प्रतिक्रिया
पठाउनुहोस्
×