‘पहिला खोप अनि पढाइ’- गण्डकी - कान्तिपुर समाचार
कान्तिपुर वेबसाईट
AdvertisementAdvertisement

‘पहिला खोप अनि पढाइ’

सम्झना रसाइली

तनहुँ — नयाँ भेरियन्टसहितको दोस्रो लहरको कोरोना कहरका कारण शिक्षण संस्थाले नियमित पठनपाठन मात्र होइन शैक्षिक सत्रको अन्तिम परीक्षासमेत लिन सकेनन् । कोरोना संक्रमणको त्रासका कारण रोकिएका वार्षिक परीक्षाको नतिजा आन्तरिक मूल्यांकनबाट सार्वजनिक गर्ने तयारी भएको छ ।

साबुनपानीले हात धुँदै विद्यार्थी । फाइल तस्बिर : सम्झना/कान्तिपुर

जिल्लाका १० वटै पालिकामा रहेका सामुदायिक तथा संस्थागत विद्यालयले विद्यार्थीको आन्तरिक मूल्यांकनबाट वार्षिक परीक्षाको नतिजा सार्वजनिक गर्ने तयारी गरेका हुन् ।

यता सरकारले यही असार १ देखि नयाँ शैक्षिक सत्र सञ्चालनको तयारी गरेको छ । तर जिल्लाका शैक्षिक संस्था भने कसरी अगाडि बढ्ने भन्ने दोधारमा छन् । संक्रमण जोखिम पनि नघटेको र कोरोनाविरुद्धको खोप पनि शिक्षक, विद्यार्थी तथा अभिभावकको पहुँचमा नभएकाले आगामी दिनमा कसरी पठनपाठन गर्ने भन्ने समस्या आइलागेको भानु नगरपालिका–२ स्थित होमराज लोहनी राष्ट्रिय शिक्षा सदन माविका प्रधानाध्यापक होमनारायण श्रेष्ठ बताउँछन् । उनले भने, ‘मुलुकका तीनै तहका सरकार तथा सरोकारवाला निकायले यस्तो विषम परिस्थितिलाई ख्याल गरी पठनपाठन कसरी गर्ने भन्ने विषयमा प्रस्ट नीति बनाउनुपर्छ ।’ दैनिक रूपमा कोरोना संक्रमण बढ्दो रहेको र विद्यार्थीको भौतिक उपस्थितिमा कक्षा सञ्चालन गर्दा विद्यार्थी तथा शिक्षकमा संक्रमण हुने जोखिम पनि उत्तिकै रहेको उनले बताए । ‘कोरोनाको जोखिम कायमै छ, शिक्षक अझै पनि खोपको दायरामा आएका छैनन् । संक्रमणको जोखिममा विद्यार्थीलाई पढाउन पनि मुस्किल छ । विद्यार्थीले मन लगाएर पढ्न पनि सक्दैनन्,’ उनले भने ।

विद्यार्थी र शिक्षकलाई कोरोनाविरुद्धको खोप लगाउन सकिए भौतिक कक्षा सञ्चालनमा समस्या नहुने ऋषिङ गाउँपालिका–१ कोइदिमस्थित अम्मर माविका प्रअ कर्मसिंह थापाले बताए । उनले भने, ‘खोप लगाइसकेपछि ढुक्क भएर कक्षा सञ्चालन गर्न सकिन्थ्यो ।’ भौगोलिक विकटताका कारण सबै विद्यार्थी प्रविधिको पहुँचमा नरहेको उनको भनाइ छ । ‘ग्रामीण क्षेत्र भएकाले विद्यार्थी १/२ घण्टा हिँडेर विद्यालय आउनुपर्ने बाध्यता छ,’ उनले भने, ‘दुई सिफ्ट विद्यालय सञ्चालनका लागि पनि कठिन छ । त्यसैले विद्यार्थी र शिक्षकलाई खोपको दायरामा ल्याउन सके सुरक्षित वातावरणमा पठनपाठन गर्न गराउन सकिन्थ्यो ।’

सरकारले चाँडो सबैलाई कोरोनाविरुद्धको खोप उपलब्ध गराउनुपर्ने भानुका नगरप्रमुख उदयराज गौलीले बताए । उनले भने, ‘मुलुकका तीनै तहका सरकारले यस वर्षको विकास बजेटलाई कटौती गरी नागरिकलाई सहज रूपमा कोरोनाविरुद्धको खोप व्यवस्थापनमा ध्यान दिनुपर्छ । हाम्रा सबै विद्यार्थीसँग प्रविधिको पहुँच छैन ।’

प्रकाशित : जेष्ठ २८, २०७८ १२:०९
प्रतिक्रिया
पठाउनुहोस्

राष्ट्रिय जनमोर्चाका सांसद कृष्ण थापा फेरि पदमुक्त

एमाले सांसदद्वारा संसद् अवरुद्ध
प्रतीक्षा काफ्ले

कास्की — राष्ट्रिय जनमोर्चाका प्रदेश सांसद कृष्ण थापा फेरि पदमुक्त भएका छन् । शुक्रबारको संसद् बैठकमा उनी पदमुक्त भएको सूचना सभामुख नेत्रनाथ अधिकारीले पढेर सुनाएका हुन् । 

यसअघि पार्टी निर्देशन नमानेको भन्दै गत बिहीबार सांसद पदबाट हटाइएका थापालाई गत आइतबार सर्वोच्च अदालतले पुर्नबहाली गरिदिएको थियो ।

मुख्यमन्त्री पृथ्वीसुब्बा गुरुङले प्रदेशसभामा विश्वासको मत मागेका बेला भएको मतदानमा बिहीबार थापा तटस्थ बसेका थिए । पार्टीले मुख्यमन्त्रीको विश्वासको मतको प्रस्तावको विपक्षमा मतदान गर्न भनेपनि उनी तटस्थ बसेकाले राष्ट्रिय जनमोर्चाले पदबाट हटाएको हो । सभामुख नेत्रनाथ अधिकारीले शुक्रबारको प्रदेशसभा बैठकमा राजनीतिक दल सम्बन्धि ऐन २०७३ को परिच्छेद ६ दफा ३५ को उपदफा १ बमोजिम उनलाई पदमुक्त भएको जानकारी गराएका हुन ।

पुनर्बहाली गर्ने सर्वोच्चको आदेशमाथि जनमोर्चा, प्रदेशसभा, सभामुखले पुनरावलोकनको माग गरेका थिए । यससम्बन्धी आगामी ३१ गते सुनुवाइ हुँदैछ । जनमोर्चाले यसअघि मुख्यमन्त्री पृथ्वीसुब्बा गुरुङको विपक्षीमा मोर्चाबन्दी गरेका विपक्षी गठबन्धनलाई सहयोग गर्ने निर्णय गरे पनि थापाले मानेका थिएनन । थापा बाग्लुङ निर्वाचन क्षेत्र नम्बर १ को खबाट निर्वाचित सांसद हुन् । उनी संसदीय दलको नेता समेत थिए ।

यस्तै, संसद् बैठक आइतबार १ बजेसम्मका लागि स्थगित भएको छ । सत्तारूढ दल एमालेले प्रदेशसभा सञ्चालन नियमावली अनुसार मन्त्रीहरूको अनुपस्थितिमा नै बैठक चलाएको भन्दै उठेर विरोध जनाएका थिए ।

एमाले संसदीय दलका प्रमुख सचेतक मायानाथ अधिकारीले सभामुखलाई मन्त्रीको सहभागिता बिना बैठक चलाउन नसकिने बताएका थिए ।

प्रकाशित : जेष्ठ २८, २०७८ १२:०५
पूरा पढ्नुहोस्
प्रतिक्रिया
पठाउनुहोस्
×