हाते औजारबाटै ट्र्याक खन्दै स्थानीय- गण्डकी - कान्तिपुर समाचार
कान्तिपुर वेबसाईट
AdvertisementAdvertisement

हाते औजारबाटै ट्र्याक खन्दै स्थानीय

कान्तिपुर संवाददाता

गोरखा — तिब्बती सीमा रुइला जोड्ने सडकको ट्र्याक खोल्न सुरु भएको छ । चुमनुब्री गाउँपालिका–१ सामागाउँस्थित साम्दोबाट सडक निर्माण थालिएको हो । गल, गैंचीलगायत हाते औजारको प्रयोगबाट सडकको ट्र्याक खनेको स्थानीय लाक्पा डुण्डुप लामाले बताए । साम्दोबाट रुइलास्थित ३५ नम्बर पिल्लरको ९ किलोमिटरमध्ये यस वर्ष साढे ३ किमि सडकको ट्र्याक खोलिने उनले बताए । 

सामागाउँ र साम्दोको ११–११ जनाको ३ टोली बनाएर काम सुरु भएको हो । ‘तलबाट नेपाली सेनाले ट्र्याक खोलिरहेको छ, छिटो ट्र्याक खुलोस् भनेर अहिले बीचबाट काम थालिएको हो,’ लामाले भने । उपभोक्ता समितिमार्फत सडकको ट्र्याक खन्न सुरु भएको हो । लामा उक्त सडकको उपभोक्ता समितिका अध्यक्ष हुन् ।

सीमा क्षेत्रस्थित रुइलाबाट सडकको ट्र्याक खोल्ने तयारी गरिए पनि हिउँ नपग्लँदा साम्दोबाट सडक खनेको लामाले बताए । झन्डै ६ मिटर फराकिलो सडक हातले खनेको उनले बताए । ‘गोरखाको तल्लो बजारबाट खच्चडमा बोकाएर ल्याउँदा ढुवानीमै ठूलो खर्च हुन्छ,’ उनले भने, ‘ट्र्याक खुलिसकेपछि सडक मार्ग भएर सामग्री ढुवानी गर्दा निकै कम पर्छ । ट्र्याक खोलेर गाडी चले त चामल, नुनतेल र निर्माण सामग्री सस्तो पर्ने भयो ।’ स्थानीय तथा पर्यटकलाई पनि सजिलो हुने भन्दै स्थानीय खुसी हुँदै सडक खन्न सहभागी भएको उनले बताए । ‘सडक सञ्जालले जोडिए जीवनस्तर उकासिन्छ भनेर स्थानीय उत्साहित छन्,’ लामाले भने ।

गण्डकी प्रदेश सरकारले रुइला भन्ज्याङबाट गोरखातर्फ ३१ किमि सडकको ट्र्याक खोल्ने लक्ष्यसाथ अघिल्लो वर्ष स्थलगत सम्भाव्यता अध्ययन तथा अवलोकन गरेको थियो । चालु वर्ष रुइला भन्ज्याङ–साम्दो–ल्हो–प्रोक–बिही–सिर्दिवास सडकका लागि ५० लाख रुपैयाँ विनियोजन भएको भौतिक पूर्वाधार कार्यालयका सूचना अधिकारी गणेश सुवेदीले बताए । ‘आठ लाख श्रमदान र ५० लाख बजेट गरी ५८ लाख रुपैयाँले साढे ३ किमि सडकको ट्र्याक खोल्न सुरु भएको हो,’ उनले भने ।

प्रकाशित : जेष्ठ २८, २०७८ ०७:४९
प्रतिक्रिया
पठाउनुहोस्

लिपुलेक जोड्ने भारतीय सडकले नेपालको घोडेटो पुरियो

मनोज बडू

दार्चुला — महाकाली नदी किनारमा भारतले बनाइरहेको धारचुला–लिपुलेक सडक निर्माणका क्रममा विस्फोट गराउँदा खसेको चट्टानले नेपालको व्यास जोड्ने घोडेटो बाटो पुरिएको छ ।

भारतले धारचुला–लिपुलेक सडक निर्माणका क्रममा गर्वाधार क्षेत्रमा विस्फोटक पदार्थ प्रयोग गर्दा खसेको चट्टानले महाकाली नदीवारि नेपालको व्यास गाउँपालिका–२ स्थितकल्जु क्षेत्रमा भत्किएको घोडेटो । महाकालीपारिबाट खसेको चट्टान वारिसम्म आएर बाटो पुरिएको हो। पहिरो खसेको दिन मंगलबार केही समय महाकालीसमेतथुनिएको थियो। तस्बिर सौजन्य : हरकसिंह बुढाथोकी

भारतले दुई दिनअघि उक्त बाटोको गर्वाधारमा चट्टान फुटाउन विस्फोटक पदार्थ प्रयोग गर्दा दार्चुलाको व्यास गाउँपालिका–२ स्थित कल्जु क्षेत्रको बाटो भत्किएको हो । व्यासको घोडेटो बाटोमा ५/६ वर्षयता भारतीय सडकका कारण क्षति पुग्दै आएको छ ।

‘व्यासको घोडेटो महाकाली किनारैकिनार भएकाले भारतले सडक खन्दा नदीको बहाव नेपालतर्फ सरेको छ,’ कल्जुका नरेन्द्र धामीले भने, ‘अहिले हामीलाई गाउँ जान बाटो बन्द भएको छ । दुम्लिङ–कल्जु आवतजावत गर्न सकिएको छैन ।’ उनका अनुसार सडक चौडा बनाउने क्रममा विस्फोट गराउँदा ठूलो पहाड खसेर बाटो पुरिएको हो । बाटो अवरुद्ध हुँदा व्यासको छाङरु र टिंकर आवतजावतसमेत बन्द भएको छ । चट्टान खस्दा मंगलबार केहीबेर महाकाली नदीसमेत थुनिएको स्थानीयले बताए । भारतले अतिक्रमित नेपाली भूमि लिपुलेक हुँदै मानसरोवर जाने सडक बनाउन ठाउँ–ठाउँमा विस्फोटक पदार्थ प्रयोग गर्दै आएको छ ।

भारतीय सडक महाकालीभन्दा आधा किलोमिटर उचाइमा छ । नेपाली बाटो भने नदीभन्दा २० मिटर माथि पर्छ । पारिबाट खसेका ढुंगा नदी साँघुरो भएकाले वारिसम्म झरेर बाटो पुरिएको हो । जिल्ला प्रहरी कार्यालयका प्रहरी निरीक्षक नरेन्द्रबहादुर चन्दका अनुसार प्रहरी चौकी दुम्लिङबाट करिब दुई सय मिटर उत्तरी क्षेत्रमा पर्ने कल्जु क्षेत्र नजिकै नेपालतिरको बाटो पूरै अवरुद्ध भएको छ । घोडेटो भत्किँदा नेपालतिरको आवतजावत पूर्णरूपमा बन्द भएको छ ।

यो बाटो व्यास र प्रदेश सरकारको लगानीमा निर्माण गरिएको हो । ‘केही वर्ष पहिले साँघुरो बाटोलाई नदी किनारबाट पिल्लर गाडेर घोडेटो बनाइएको थियो । त्यो सबै चट्टानले पुरिएको छ । उक्त क्षेत्रको नदी किनारमा पर्खाल राख्न ठाउँ छैन, माथि ठूलो चट्टान छ,’ स्थानीय नरेन्द्र धामीले भने ।

भारतले धारचुला–लिपुलेक–मानसरोवर सडक दुई लेनको बनाउन हाल गर्वाधार क्षेत्रमा चट्टान काटिरहेको छ । सडक निर्माणका क्रममा अत्यधिक जिलेटिनको प्रयोग गर्ने भएकाले चट्टान खसेर बेला–बेलामा नेपालतर्फको बाटो अवरुद्ध हुँदै आएको छ । सोही क्षेत्रमा तीन वर्ष अगाडि सडकको ट्र्याक खोल्दा दुम्लिङका चार वटा घरमा क्षति पुगेको थियो । ‘जथाभावी विस्फोट गराउँदा ढुंगा बजारिएर घर खेतमा खस्थे,’ धामीले भने, ‘उफ्रेर बजारिएका ढुंगा लागेर धेरै पशुबस्तु घाइते भएका थिए । अहिले त्यहाँ बसोबास गर्ने सबै मानिस माथि सरेका छन् ।’

कल्जु क्षेत्रमा अवरुद्ध बाटो खुलाउन स्थानीयका साथमा काम सुरु गरेको प्रहरीले जनाएको छ । महाकाली किनारको घोडेटो बन्नुभन्दा पहिलेको बाटोलाई सञ्चालनमा ल्याउने गरी काम भइरहेको प्रहरी निरीक्षक चन्दले बताए ।

प्रकाशित : जेष्ठ २८, २०७८ ०७:४६
पूरा पढ्नुहोस्
प्रतिक्रिया
पठाउनुहोस्
×