नवलपुर — पूर्वी नवलपरासीको मध्यविन्दु जिल्ला अस्पतालले आफ्नै अक्सिजन प्लान्ट सञ्चालनमा ल्याएको छ । कोरोना संक्रमितलाई अक्सिजन अभाव भएर चितवन रेफर गर्नुपर्ने अवस्था भएपछि अस्पतालले प्लान्ट सञ्चालनमा ल्याएको हो ।
प्लान्टबाट दैनिक १७ सिलिन्डर अक्सिजन उत्पादन हुनेछ । प्लान्ट यसअघि नै जोडिएको भए पनि अन्य आवश्यक उपकरण अभावमा सञ्चालनमा आउन सकेको थिएन् । अस्पताल सञ्चालक समितिले अक्सिजनको माग उच्च भएपछि हतारहतार प्लान्ट प्रयोगमा ल्याएको हो । निजी अक्सिजन उद्योगबाट अक्सिजन खरिद गरेर उपचार गर्दै आएको अस्पतालले अब पाइपलाइनमार्फत २० बेडमा सोझै अक्सिजन पुर्याउनेछ ।
अस्पतालका मेडिकल सुपरिन्टेन्डेन्ट डा.वीरबहादुर थापाले आवश्यक ५० प्रतिशतभन्दा बढी अक्सिजन अब आफैंले उत्पादन गर्नसक्ने र बाँकी निजी उद्योगबाट खरिद गरिने बताए । ‘कोरोना बिरामीको चाप हुँदासम्म अक्सिजनको माग उच्च हुने हो । त्यसपछि आफ्नै प्लान्टबाट उत्पादन भएकाले पुग्छ,’ थापाले भने, ‘अक्सिजन अभावमा छटपटाएका बिरामीलाई चितवन रेफर गर्नुपर्ने अवस्था थियो । अब सहज हुनेछ ।’
अहिले अस्पतालमा दैनिक ३५ देखि ४० सिलिन्डर अक्सिजन खपत हुँदै आएको छ । अस्पतालमा २० वेडको एचडीयू सेवा पनि सञ्चालनमा ल्याइएको छ । अस्पतालमा ४० बेड कोरोना संक्रमितका लागि छुट्टाइएको छ । प्लान्ट सञ्चालनका लागि ३८ लाख र पाइपलाइनका लागि १९ लाख रुपैयाँ प्रदेश सरकारले उपलब्ध गराएको हो ।
