स्थानीय तहकै व्यवस्थापनमा कोभिड अस्पताल- गण्डकी - कान्तिपुर समाचार
कान्तिपुर वेबसाईट
AdvertisementAdvertisement

स्थानीय तहकै व्यवस्थापनमा कोभिड अस्पताल

नगरपालिकाले यहाँका चिकित्सकलाई ज्येष्ठ नागरिक घरदैलो कार्यक्रममा समेत खटाएको छ
आश गुरुङ

लमजुङ — स्थानीय तहले अक्सिजन सिलिन्डरसहितका अस्थायी कोभिड अस्पताल सञ्चालनमा ल्याएका छन् । कोरोना संक्रमित बिरामीको उपचारका लागि स्थानीय तह आफैंले व्यवस्थापन गरी अस्थायी कोभिड अस्पताल सञ्चालनमा ल्याएका हुन् ।

लमजुङको मध्यनेपाल नगरपालिका १, निबुवाटारीको सूर्यज्योति माविको भवनमा स्थापना गरिएकोअस्थायी कोभिड अस्पताल । तस्बिर : कान्तिपुर

बढी प्रभावित क्षेत्रमा कोभिड अस्पताल सञ्चालनमा छ । कम प्रभावित क्षेत्रमा स्थानीय तहले अस्थायी कोभिड अस्पताल सञ्चालनमा ल्याउने तयारी गरेका छन् ।

संघीय सरकारले बजेट पठाएपछि स्थानीय तहले गत मंसिर १५ देखि अस्थायी कोभिड अस्पताल सञ्चालनमा ल्याएको थियो । केन्द्रको बजेटले ३ महिना मात्रै धानेपछि अहिले स्थानीय तह आफैंले कोभिड अस्पताल सञ्चालन गर्न थालेका छन् ।

दोर्दी गाउँपालिका अध्यक्ष ओमबहादुर गुरुङले वडा नं. ३, श्रीमन्ज्याङस्थित आयुर्वेदको कार्यालयमा ५ वटा बेड र अक्सिजनसहित कोभिड अस्पताल सञ्चालन गरिएको बताए । उनका अनुसार एक जना एमबीबीएस डाक्टर, २ जना नर्स र १ जना कार्यालय सहयोगी भर्ना गरेर राखिएको छ ।

मध्यनेपाल नगरपालिका प्रमुख रमेशकुमार पाण्डेले मध्यनेपाल नगरपालिका १, जिताबेंसी निबुवाटारीमा अस्थायी कोभिड अस्पताल सञ्चालन गरिएको बताए । उनले ५ बेड बनाएर सबै बेडमा अक्सिजन राखिएको बताए । २५ वटा अक्सिजन सिलिन्डर तयारी अवस्थामा राखिएको उनले बताए । ‘कोरोना संक्रमित बिरामीको उपचार गर्न डाक्टर, नर्ससहितका स्वास्थ्यकर्मी तयारी अवस्थामा राखेका छौं’ उनले भने ।

मध्यनेपाल नगरपालिका स्वास्थ्य शाखा प्रमुख सूर्यप्रसाद पौडेलका अनुसार निबुवाटारीको सहरी स्वास्थ्य केन्द्र नजिकैको सूर्यज्योति माविको पुनानो भवनमा कोभिड अस्पताल सञ्चालनमा ल्याइएको छ । अस्पतालका लागि नगरपालिकाले १ जना एमबीबीएस डाक्टर, २ जना स्टाफ नर्स र १ जना कार्यालय सहयोगी खटाएको छ । पौडेलका अनुसार कोभिड अस्पतालका लागि नियुक्त चिकित्सकलाई नगरपालिकाले ज्येष्ठ नागरिक घरदैलो कार्यक्रममा समेत खटाएको थियो ।

क्व्होलासोंथर गाउँपालिका र मर्स्याङ्दी गाउँपालिकाले कोभिड अस्पताल सञ्चालनमा ल्याएको छ । उनीहरूले नर्स भर्ना गरेर राखेका छन् । बेंसीसहर र सुन्दरबजार नगरपालिकाले भने यसअघि नै कोभिड अस्पताल बनाएको थिएन । बेंसीसहरमा जिल्ला अस्पताल रहेको र सुन्दरबजारमा सुन्दरबजार अस्पताल रहेकाले स्थानीय तहले कोभिड अस्पताल सञ्चालन नगरेको हो । अन्य स्थानीय तहले कोभिड अस्पताल सञ्चालनको तयारी गरेको छ ।

स्वास्थ्य कार्यालय प्रमुख अमर दवाडीले केही स्थानीय तहले डाक्टर र केहीले नर्स भर्ना गरेर अस्थायी कोभिड अस्पताल सञ्चालनमा ल्याएको बताए । ‘गाउँ गाउँमै संक्रमित देखिन थालेपछि स्थानीय तहले अस्थायी कोभिड अस्पताल सञ्चालन गरेका हुन्’ उनले भने । उनका अनुसार स्थानीय तहले गत मंसिरबाट सञ्चालनमा ल्याएको अस्थायी कोभिड अस्पताललाई अहिले अक्सिजनसहित थप व्यवस्थापन गरिएको बताए ।

प्रकाशित : वैशाख ३०, २०७८ १२:४७
प्रतिक्रिया
पठाउनुहोस्

गाउँगाउँमा फैलियो कोरोना

कान्तिपुर संवाददाता

बागलुङ — वैशाख ८ गतेदेखि निषेधाज्ञा लगाएको बलेवास्थित पैयुँपाटामा मात्रै मंगलबार ४४ जना कोरोनाका संक्रमित भेटिए । यहाँ परीक्षण गरिएकामध्ये ६० प्रतिशतमा संक्रमण देखिएको हो । 

‘तीन साता बित्यो, चेनब्रेक होला भन्दा झन् झाँगिएको छ,’ स्वास्थ्य कार्यालय बागलुङका कोभिड फोकल पर्सन देवप्रकाश घिमिरेले भने, ‘निषेधाज्ञा पालना नगरी विवाह, व्रतबन्ध र चौरासी पूजा गर्ने र भोज खुवाउने क्रम बढेपछि समस्या आएको देखिन्छ ।’ निषेधाज्ञाकै समयमा बैंकमा वृद्धाभत्ता निकाल्नेको समेत भीड हुने गरेको छ ।

ग्रामीण क्षेत्रमा मानिस जम्मा हुने, क्यारिमबोर्ड, जुवातास र अन्य समूहगत खेल खेल्ने गरेकोले संक्रमण बढेको स्वास्थ्यकर्मीले बताए । निषेधाज्ञाकै समयमा बलेवामा दर्जनौं विवाह सम्पन्न भएका छन् । भोज खाएका पैयुँपाटा र नारायणस्थानमा बुधबार पनि ८९ जना संक्रमित भेटिएका थिए । स्वास्थ्य शाखा प्रमुख चूडामणि कँडेलले भने, ‘घरभित्रै बसिदिनुहोस् भन्दा पनि यो बेला भोजभतेर गर्दा असर परेको छ ।’

जैमिनी नगरपालिका–५ मा परीक्षण गरिएका सबैको संक्रमण देखिएपछि कन्ट्याक्ट ट्रेसिङमा परेकाले स्वाब दिनै नमानेको स्थानीयले बताए । संक्रमण फैलिएका गाउँमा सहरी क्षेत्र र भारतबाट आएकाहरू सिधै घरमा पुगेको जिल्ला प्रशासनका प्रशासकीय अधिकृत सूर्यलाल विकले बताए ।

प्रकाशित : वैशाख ३०, २०७८ १२:४७
पूरा पढ्नुहोस्
प्रतिक्रिया
पठाउनुहोस्
×