पार्टी कार्यालय आइसोलेसनलाई दिने- गण्डकी - कान्तिपुर समाचार
कान्तिपुर वेबसाईट
AdvertisementAdvertisement

पार्टी कार्यालय आइसोलेसनलाई दिने

कांग्रेसद्वारा पर्वत, स्याङ्जाका जिल्ला पार्टी कार्यालय र पूर्वी नवलपरासीको देवचुली नगरस्तरीय कार्यालय दिने निर्णय
अगन्धर तिवारी

पर्वत — कांग्रेसले नवनिर्मित जिल्ला पार्टी कार्यालयलाई कोभिड प्रभावितका लागि अस्पतालका रूपमा प्रयोग गर्न दिने भएको छ । कार्यकर्ताबाट चन्दा संकलन गरी करिब साढे २ करोड रुपैयाँको लागतमा बनेको उक्त भवनमा एक सय बेडसम्मको अस्पताल सञ्चालन गर्न मिल्छ । 

पर्वतस्थित नवनिर्मित बीपी स्मृति भवन । तस्बिर : कान्तिपुर

करिब डेढ वर्षअघिदेखि निर्माण थालिएको भवन हालै सम्पन्न भएको हो । नवनिर्मित भवन बस्तीभन्दा टाढा रहेको र शौचालय, स्नान कक्षसमेत व्यवस्थित रहेकाले कोभिड अस्पतालका लागि उपयुक्त हुने भएकाले प्रस्ताव गरिएको कांग्रेस केन्द्रीय सदस्य अर्जुनप्रसाद जोशीले बताए ।

‘मैले यो विषयमा केही दिनदेखि सोचिरहेको थिएँ,’ उनले भने, ‘प्रशासनसँग शुक्रबार मौखिक रूपमा प्रस्ताव गरेको छु । उहाँहरू खुसी हुनुहुन्छ । हामीले यस्तै बेलामा त हो जनताका लागि सहयोग गर्ने ।’ उनका अनुसार अस्थायी अस्पताल सञ्चालनका लागि आवश्यक बेड, अक्सिजनलगायत अन्य पूर्वाधारका लागि सहयोग गर्न कार्यकर्ता तयार छन् ।

जिल्लामा दैनिकजसो कोरोना संक्रमित बढेपछि जिल्ला अस्पतालमा बेड अभाव हुने भएकाले कांग्रेस पर्वतले यस्तो निर्णय गरेको पार्टी सचिव अशोक उचैठकुरीले बताए । साढे १४ आनामा बनेको भवन साढे २ तले छ । भुइँतलाको हलमा करिब ६० बेड, बीचको ५ कोठामा २/२ बेडको दरले १० बेड, तेस्रो तलाको हलमा ३० बेड गरी एक सय बेडको अस्पताल सहजै सञ्चालन गर्न सकिने पार्टी सभापति खिमप्रसाद भुसालले बताए । सबै तलामा छुट्टाछुट्टै शौचालय र स्नान कक्ष रहेकाले कोभिड प्रभावितलाई उपयोगी हुने कांग्रेसले जनाएको छ ।

प्रमुख जिल्ला अधिकारी देवी पाण्डे खत्रीले पार्टी कार्यालय कोभिड अस्पतालका रूपमा प्रयोग गर्न दिनु सकारात्मक निर्णय भएको बताइन् । आवश्यकतानुसार भवन प्रयोग गरिने उनको भनाइ छ । गतवर्ष गुप्तेश्वर क्याम्पसको भवनलाई अस्थायी अस्पतालका रूपमा प्रयोग गरिएको थियो । २ साताअघिसम्म क्याम्पसमा नियमित अध्यापन भइरहेको र त्यहाँ रहेका अस्पतालका संरचना अन्यत्र हटाइएकाले क्याम्पस प्रशासनले अस्पतालका रूपमा प्रयोग गर्न तत्काल नमिल्ने जनाएको छ ।

स्याङ्जा संवाददाताका अनुसार स्याङ्जा कांग्रेसले पनि आफ्नो जिल्ला पार्टी कार्यालय आइसोलेसन बनाउन दिने भएको छ । कार्यवाहक सभापति बुद्धिबहादुर राना (कुमार) का अनुसार शुक्रबार बसेको जिल्ला पार्टी कार्यालयको बैठकले कोरोनाका बिरामीलाई मध्यनजर गर्दै कार्यालय भवन आइसोलेसन सेन्टर बनाउन दिने निर्णय गरेको हो । तीन तलाको उक्त भवनमा माथिल्लो तलमा कार्यालय नै रहने भए पनि अन्य दुईवटा तलामा आइसोलेसन सेन्टर बनाउन सकिने रानाले बताए ।

‘बिरामीलाई बेड अभाव नहोस्,’ उनले भने, ‘कांग्रेस पार्टी कार्यालयमा ६० वटा बेड निर्माण गर्न सकिन्छ । हामीले भवन दिएका छौं । संघ, प्रदेश र स्थानीय सरकारले आवश्यकताअनुसार आइसोलेसन सेन्टर निर्माण गर्न सक्छन् ।’ सदरमुकाम पुतलीबजार नगरपालिका–१ स्थित बजारको पछाडिपट्टि रहेको पार्टी कार्यालयमा आइसोलेसन सेन्टर बनाउँदा बिरामी पनि सुरक्षित रहने र अन्य व्यक्तिलाई पनि जोखिम नहुने रानाले बताए ।

पूर्वी नवलपरासीको देवचुली नगरस्तरीय कांग्रेस पार्टी कार्यालय भवन पनि कोरोना संक्रमितको उपचारका लागि आइसोलेसन बनाइने भएको त्यहाँस्थित संवाददाताले जनाएका छन् । कांग्रेस देवचुली नगर सचिव नारायण पौडेलका अनुसार शनिबारको पदाधिकारी बैठकले कोरोना संक्रमणमा सघाउन पार्टी कार्यालयमा आइसोलेसन बनाउने नगरपालिकालाई लिखित जानकारी दिएको हो ।

देवचुली–१३ मा रहेको कार्यालयमा कम्तीमा ५० बेड राख्न मिल्छ । नगरपालिकासँग आइसोलेसन बनाउनेबारे यसअघि नै मौखिक सहमति भएको र शनिबारको पदाधिकारी बैठकले निर्णय गरेर जिम्मा दिइएको पौडेलले बताए । नगरप्रमुख पूर्णकुमार श्रेष्ठ नै देवचुली कांग्रेसका नगर सभापति हुन् । महेन्द्र राजमार्गबाट नजिक एकान्तमा रहेको पार्टी कार्यालय आइसोलेसनका लागि उपयुक्त हुने भएकाले त्यस्तो निर्णय गरिएको हो । देवचुलीमा कोरोना संक्रमित १ सय ११ पुगेका छन् ।

प्रकाशित : वैशाख २६, २०७८ १०:०५
प्रतिक्रिया
पठाउनुहोस्

आइसोलेसन भरिएपछि आकस्मिक कक्षमै उपचार

विप्लव महर्जन

सल्यान — जिल्ला अस्पतालको आइसोलेसन कक्षमा कोरोना संक्रमित बिरामी भरिएपछि आकस्मिक कक्षमा राखेर उपचार गर्न थालिएको छ । आकस्मिक कक्षमा कोरोना संक्रमितलाई उपचार गर्न थालेपछि अन्य बिरामी समस्यामा परेका छन् । 

जिल्ला अस्पताल सल्यानमा कोरोनाका बिरामीको उपचार गर्दै डाक्टर र नर्स । तस्बिर : विप्लव/कान्तिपुर

अस्पतालले ओपीडी बन्द गरेपछि कोरोनाबाहेक अन्य रोगका बिरामी निजी अस्पतालमा र गम्भीर खालका बिरामी जिल्लाबाहिर जान बाध्य छन् । जिल्ला अस्पतालद्वारा सञ्चालित आइसोलेसनमा १८ संक्रमित छन् । स्वास्थ्य कार्यालय सल्यानका प्रमुख दशरथ श्रेष्ठका अनुसार आकस्मिक कक्षमा ६ जना बिरामी छन् । अक्सिजन प्लान्ट र आईसीयू सञ्चालन हुन नसक्दा कोरोनाका जटिल बिरामीलाई कठिन भएको छ । शुक्रबारसम्म १२ जनाको मृत्यु भएको स्वास्थ्य सेवा कार्यालयले जनाएको छ ।

जिल्ला अस्पतालका क्लिनिकल प्रमुख डा. भीमकान्त जैशीले आइसोलेसन र आकस्मिक कक्षमा कोभिडका बिरामी भएकाले अन्य रोगका बिरामीलाई सेवा दिन गाह्रो भएको बताए । जिल्लामा शुक्रबारसम्म कोरोना संक्रमितको संख्या ४ सय ६३ पुगेको छ । २६ जना कोरोना जितेर घर फर्किएका छन् ।

जिल्लाका विभिन्न स्थानीय तहमा आइसोलेसन बनाइएको भए पनि संक्रमितहरू त्यहाँ बस्दैनन् । स्वास्थ्यकर्मीहरू आइसोलेसनमा नबस्ने र उपचारको पनि भरपर्दो व्यवस्था नभएकाले अधिकांश संक्रमित घरमै बसेका छन् । ‘अस्पतालमा ल्याएका बिरामीलाई उपचार नगरी फर्काउन सकिँदैन,’ स्वास्थ्य सेवा कार्यालय प्रमुख श्रेष्ठ भन्छन्, ‘बाहिरका कोभिड अस्पताल पनि भरिभराउ भएकाले रेफर गर्दा बिरामीको ज्यान झनै जोखिममा पर्ने भएकाले अस्पतालको आकस्मिक कक्षमै राखेर भए पनि उपचार गर्नुपरेको हो ।’

महामारीका कारण जिल्ला अस्पतालमा ओपीडी सेवा बन्द भएपछि सामान्य स्वास्थ्य समस्या भएका बिरामी अस्पताल आउन छाडेका छन् । स्थानीयवासीले समेत ओपीडी बन्द भएपछि उपचार पाउन नसकेको गुनासो गरेका छन् । उनीहरूले जनशक्ति र स्थानीय व्यवस्था गरेर भए पनि ओपीडी सेवा सञ्चालन गर्नुपर्ने बताए । ओपीडी बन्द भएपछि उपचारका लागि निजी अस्पताल धाउनुपर्ने बाध्यता छ ।

प्रकाशित : वैशाख २६, २०७८ १०:०५
पूरा पढ्नुहोस्
प्रतिक्रिया
पठाउनुहोस्
×