सहचालक हत्याका आरोपित दिल्लीबाट पक्राउ- गण्डकी - कान्तिपुर समाचार

सहचालक हत्याका आरोपित दिल्लीबाट पक्राउ

घाइते साथीलाई कालीगण्डकीमा बगाएर फरार रहेका दुवै जना पक्राउ
प्रतीक्षा काफ्ले

स्याङ्जा — घाइते सहचालकलाई कालीगण्डकीमा फालेर हत्या गरेको घटनाका आरोपित भारतको नयाँदिल्लीबाट पक्राउ परेका छन् । साथीको हत्याका आरोपित गल्याङ–८ बंग्रान्तीका २७ वर्षीय अमित परियार श्रीमती र छोरीसहित भारत पुगेका थिए । वडा प्रहरी कार्यालय वालिङका प्रहरी निरीक्षक हरिप्रसाद पौडेल र प्रहरी जवान गमबहादुर क्षेत्री उनको पिछा गर्दै दिल्लीसम्म पुगेका थिए ।

सुराकीका आधारमा अमितलाई शुक्रबार दिल्लीको अशोक विहारबाट पक्राउ गरेको हो । त्यहाँबाट पनि परिवारसहित अन्यत्रै भाग्न तयारी रहेको अवस्थामा पक्रिएको प्रहरी निरीक्षक पौडेलले बताए ।

परियारविरुद्ध सोमबार जिल्ला अदालतमा कर्तव्य ज्यानसम्बन्धी मुद्दा दर्ता गरिएको प्रहरीले जनाएको छ । गल्याङ–९ पारीचौरस्थित बेलचौर–साँखर कच्ची सडकमा चैत ५ गते साँझ ढुंगा लिएर आएको ट्र्याक्टरबाट खसेर गल्याङ–८ का १९ वर्षीय सहचालक गणेश गाहा घाइते भएका थिए । परियारले चलाएको ट्र्याक्टरमा अर्का सहचालक २१ वर्षीय सुनील राना पनि थिए ।

घाइते गाहालाई परियार र रानाले कालीगण्डकी नदीमा लगेर फालिदिएका थिए । प्रहरीका अनुसार एकै ठाउँका मिल्ने साथी उनीहरूले घटनाका दिन मदिरा सेवन गरेका थिए । गाहा घाइते भएको थाहा भए आफूहरू जेल जानुपर्ने डरले कालीगण्डकीमा लगेर फालिदिएको प्रहरी अनुसन्धानले देखाएको छ । ‘उपचार पाएको भए गाहाको मृत्यु हुने थिएन,’ एसपी होबिन्द्र बोगटीले भने, ‘उपचारका क्रममा मृत्यु भयो भने जेल जानुपर्छ । अहिले नै बगाइदिए कसैलाई थाहा हुँदैन भनेर नदीमा फालेका रहेछन् ।’

घटनाको भोलिपल्ट गाहाको शव कालीगण्डकी किनारमा भेटिएको थियो । कालीगण्डकीको घाट साँखरस्थित ढुंगा लोड गरी आउने क्रममा गाहा ट्र्याक्टरबाट खसेका थिए । राना र परियारले पुनः बाटो मोडेर नदीमा लगेर फालेको प्रहरीले जनाएको छ । घटनापछि परियार सपरिवार बेपत्ता भएका थिए भने सहचालक राना तानसेनस्थित दिदीको घर पुगेका थिए । घटनाबारे बताएपछि दिदीले भाइलाई प्रहरीमा आत्मसमर्पण गर्न लगाएकी हुन् । रानालाई पाल्पा प्रहरीले नियन्त्रणमा लिएपछि घटनाबारे खुलेको हो । परियार र रानाविरुद्ध कर्तव्य ज्यान मुद्दा दर्ता गरिएको प्रहरीले जनाएको छ ।

प्रकाशित : चैत्र १७, २०७७ २१:५५
प्रतिक्रिया
पठाउनुहोस्

सत्तासमीकरणबारे ठोस निर्णय दिन देउवालाई दाहालको आग्रह

बबिता शर्मा

काठमाडौँ — माओवादी केन्द्रका अध्यक्ष पुष्पकमल दाहालले सत्तासमीकरणबारे विधा तोडेर ठोस निर्णय दिन कांग्रेस सभापति शेरबहादुर देउवालाई आग्रह गरेका छन् । सत्तासमीकरणबारे कांग्रेस र जसपाले ठोस निर्णय लिन नसक्दा नयाँ सरकार गठनबारे अन्योलता कायमै रहेका बेला अध्यक्ष दाहालले मंगलबार कांग्रेस सभापति देउवासँग स्पष्ट जवाफ दिन आग्रह गरेका हुन् । 

दाहालनिकट मानिने माओवादी केन्द्रका स्थायी कमिटीका एक सदस्यका अनुसार भेटमा देउवाले जसपासँग छलफल गरेर आफू चाँडै ठोस निष्कर्षमा पुग्ने आश्वसन दिएका छन् । एमाले र माओवादी केन्द्रबीचको एकता बदर गर्ने सर्वोच्च अदालतको निर्णयमा पुनरावलोकन निवेदन दर्ता गराएलगत्तै निवासमै पुगेर दाहालले देउवासँग भेट गरेका थिए । ‘संसद् पुनस्थापना भएको पनि डेढ महिना भयो । संसद् अधिवेशन सुरु भएको पनि एक महिना हुन लाग्यो । नयाँ सरकारबारे केही प्रगति भएन । तपाईंहरुले ठोस निर्णय लिन नसक्दा अन्योलता भयो । आफै सरकारको नेतृत्व गर्ने गरी अगाडि बढ्नुस् भन्ने मेरो प्रस्ताव छ । होइन, यो प्रस्ताव मान्य छैन भने पनि एउटा निष्कर्षमा पुग्नुस् भन्ने मेरो आग्रह छ’ दाहालले देउवासँग गरेको प्रस्ताव उद्धृत गर्दै दाहाल निकट ती नेताले भने । उनका अनुसार जवाफमा देउवाले भनेका थिए, ‘म जसपासँग पनि छलफल गर्छु र चाँडै निर्णय लिन्छु ।’

पुस ५ मा प्रधानमन्त्री केपी शर्मा ओलीले गरेको संसद् विघटन सर्वोच्च अदालतले फागुन ११ को फैसालमार्फत असंवैधानिक भन्दै उल्टाइदिएपछि ओलीको विकल्पमा नयाँ सरकार गठनको पहल सुरु भएको थियो । माओवादी केन्द्रले देउवालाई प्रधानमन्त्री बन्न आग्रह गरे पनि उनले समय परिपक्क नभएको भन्दै ठोस अग्रसरता लिएका छैनन् ।

नयाँ सत्तासमीकरणलाई लिएर जसपामा दुई धार छ । जसपामा अध्यक्ष महन्थ ठाकुर र वरिष्ठ नेता राजेन्द्र महतो ओलीसँग सहकार्यको पक्षमा छन् भने संघीय अध्यक्ष बाबुराम भट्टराई र उपेन्द्र यादव भने ओलीसँग सहकार्य गर्न नहुने अडानमा छन् ।

सत्तासमीकरणमा अन्योलता रहेकै कारण माओवादी केन्द्रले सरकारलाई दिएको समर्थनसमेत फिर्ता गरेको छैन । यद्यपि पछिल्लोपकट दाहालले राजनीतिक र नैतिक रुपमा अब धेरै समय समर्थन कायम राख्न नसक्ने बताएका छन् ।

प्रकाशित : चैत्र १७, २०७७ २१:३६
पूरा पढ्नुहोस्
प्रतिक्रिया
पठाउनुहोस्
×