बागलुङमा होली खेल्ने क्रममा झडप, दुई युवाको मृत्यु- गण्डकी - कान्तिपुर समाचार

बागलुङमा होली खेल्ने क्रममा झडप, दुई युवाको मृत्यु

प्रकाश बराल

बागलुङ — होली खेल्ने क्रममा झगडा हुँदा बागलुङ, गुल्मी र प्युठानको सिमानाको बलधुरेमा भीरबाट खसेर दुई जनाको मृत्यु भएको छ ।

भीरबाट खसेर उनीहरुको मृत्यु भएको प्रमुख जिल्ला अधिकारी शिवकुमार कार्कीले पुष्टि गरे । मृतकको नाम भने खुलेको छैन ।

बडिगाड गाउँपालिका १० दर्लिङ र निसीखोला गाउँपालिका ७ को राजकुतका युवाबीच झगडा हुँदा प्रकाश कुँवर र दिपक परियार भीरबाट खसेको स्थानीयले बताए पनि प्रजिअ कार्कीले पुष्टि भइनसकेको बताएका हुन् । उनले भेटिएका मृतक उनीहरु हुन् वा अन्य भन्ने नखुलेको बताए ।

दुवै युवालाई अर्को समूहले कुटपिटपछि भीरबाट खसालेको भन्ने थाह पाएपछि उद्धारका लागि प्रहरी खटाएको प्रहरी नायव उपरीक्षक इकवाल हवारीले बताए । घटनास्थल सदरमुकाम देखि १ सय किमि पश्चिममा पर्छ । आइतबार दिउँसो घटना भए पनि बेलुकी ९ बजेमात्र प्रहरी घटनास्थल पुगेको हो । घटनामा भागाभाग भएका १५ जना सम्पर्क बाहिर रहेको स्थानीयले बताए ।

मेलामा होली खेल्ने निहुँ भए पनि राजनीतिक कारण भएको कांग्रेस क्षेत्रीय सभापति द्रोण कुँवरले बताए । बेपत्ता भएका कुँवर कांग्रेस जिल्ला सदस्य हुन् । अर्का पनि कांग्रेस कार्यकर्ता भएको र घटनामा संलग्न अर्को पक्ष माओवादी निकट भएको उनले बताए ।


प्रकाशित : चैत्र १५, २०७७ २१:३४
प्रतिक्रिया
पठाउनुहोस्

समाधिस्थल भत्काएपछि विवाद

कान्तिपुर संवाददाता

धनकुटा — छथर जोरपाटी गाउँपालिका–६ स्थित समाधिस्थल भत्काएको विषयमा विवाद भएको छ । सिधुवा बजार नजिकको क्षेत्रमा बसोबास गर्ने नेवार समुदायले प्रयोग गर्दै आएको चिहानडाँडास्थित समाधिस्थल डोजर लगाएर भत्काइएपछि विवाद उब्जिएको हो । स्थानीय डम्बरबहादुर थापाले राति डोजर प्रयोग गरेर चिहान भत्काएको भन्दै गाउँलेले विरोध जनाएका हुन् ।

सिधुवा बजार व्यवस्थापन समितिका अध्यक्ष शिवकुमार श्रेष्ठका अनुसार वि.सं. १९०० साल पहिले सिधुवाका नेवार समुदायले आफन्तको मृत्युपछि उक्त स्थानलाई समाधिस्थलका रूपमा प्रयोग गर्दै आएका हुन् ।

२०३१ सालमा नापीमा समेत चिहानका रूपमा उक्त स्थान प्रयोग गर्न छुट्याइएको स्थानीयको भनाइ छ । त्यस स्थानमा रहेका १५ वटा चिहान डोजरले उत्खनन गरेर यत्रतत्र छरेको स्थानीयले बताए । स्थानीयले विज्ञप्तिमार्फत घटनाबारे छानबिन गरिनुपर्नेमा जोड दिएका छन् । थापाले आफ्नो नामको कृषि फर्ममा सडक खन्ने क्रममा चिहान खनिएको बताए । दर्शन बहुउद्देश्यीय एग्रो कृषि फर्म खोलेकाले मुख्य सडकसँग जोड्न सडक विस्तार गरिँदा उक्त घटना भएको थापाको भनाइ छ । गाउँपालिकाका अध्यक्ष शेरबहादुर लिम्बूले विवादका विषयमा आफूलाई जानकारी आएको बताए । उनले छिट्टै दुवै पक्ष राखेर समस्या समाधान गर्ने जनाए ।

प्रकाशित : चैत्र १५, २०७७ २१:०६
पूरा पढ्नुहोस्
प्रतिक्रिया
पठाउनुहोस्
×