दमौली कारागारका २५ कैदीबन्दीको स्थानान्तरण- गण्डकी - कान्तिपुर समाचार
कान्तिपुर वेबसाईट
AdvertisementAdvertisement

दमौली कारागारका २५ कैदीबन्दीको स्थानान्तरण

नाइके छनोटको विषयमा झडप
सम्झना रसाइली

तनहुँ — नाइके नियुक्तिको विषयलाई लिएर दमौली कारागारमा आइतबार साँझ झडप हुँदा ५ जना घाइते भएका छन् । कारागारमा दुई समूहबीच भएको झडपलाई व्यवस्थापन गर्न भन्दै जिल्ला प्रशासनले २५ जना कैदीबन्दीलाई आइतबार राति नै अन्यत्र सारेको छ ।

झडपमा संलग्नलाई सुरक्षा जोखिमका कारण स्थानान्तरण गर्ने निर्णय भएको निमित्त जेलर नारायण अधिकारीले बताए । प्रमुख जिल्ला अधिकारी सागर आचार्य, प्रहरी उपरीक्षक अरुण पौडेलसहित कारागारमा आइतबार अबेरसम्म बसेको सुरक्षा अधिकारीको बैठकले उनीहरुलाई अन्यत्र पठाउने निर्णय गरेको थियो ।

झडपमा परी घाइते भएकालाई दमौली अस्पतालमा उपचार पछि पुन: कारागार ल्याइएको छ । घाइते हुने सबैको टाउकोमा चोट लागेको छ । बाँस, कराइ लगायतका वस्तुले आफूहरु माथि आक्रमण भएको घाइते कैदी नाइके धनबहादुर शाहीले बताए । गत कात्तिकमा स्थानान्तरण भएर आएका नयाँ कैदीबन्दीको समूह भित्रिएयता त्यहाँ गुटबन्दी भएको स्रोतले बताएको छ ।

कारागारको नयाँ भवनमा सरुवा भएर आएका पाल्पा, काठमाडौंसहित विभिन्न ठाउँका कैदीबन्दी र स्थानीय समूह आपसमा भिडेका थिए । नाइके नियुक्तिमा विवाद सिर्जना भएयता कैदीबन्दी दुई समूहमा विभाजित भएको बताइएको छ ।

यस्तै, कारागारका कैदीबन्दीबीच झडप भएपछि जिल्ला प्रशासन कार्यालयले कारागार कार्यालयको अध्ययनका लागि सहायक प्रमुख जिल्ला अधिकारी चित्राङ्गत बरालको संयोजकत्वमा छानबिन समिति गठन गरेको छ । घटना सम्बन्धमा कारागारभित्रका विविध पक्षको अध्ययन, छानबिन गरी आवश्यक सुझावसहितको प्रतिवेदन पेश गर्न तीन सदस्यीय छानबिन टोली गठन गरिएको सहायक प्रमुख जिल्ला अधिकारी बरालले बताए ।

उनले भने, ‘विवादित र झगडामा संलग्न कैदीबन्दीलाई आइतबार राति नै विभिन्न कारागारमा स्थानान्तरण गरिएको र हाल कारागारको सम्पूर्ण स्थिति सामान्य भएको छ ।’

प्रकाशित : फाल्गुन १७, २०७७ १८:२२
प्रतिक्रिया
पठाउनुहोस्

उर्लाबारी युवक मृत्यु प्रकरण : गिरीलाई एक लाख धरौटीमा छाड्न आदेश

देवनारायण साह

मोरङ — उर्लाबारी-५ का ३१ वर्षीय प्रविण बास्तोलाको शंकास्पद मृत्यु भएको प्रकरणमा प्रतिवादीमध्ये थप एक जनालाई जिल्ला अदालत मोरङले सोमबार एक लाख धरौटीमा छाड्न आदेश दिएको छ ।

जिल्ला न्यायाधीश सुदर्शन लामिछानेको इजलासले उर्लाबारी-६ का रमेश गिरीलाई एक लाख धरौटीमा छाड्ने आदेश गरेको अदालतका सूचना अधिकारी राजेन्द्र धमलाले बताए । आइतबार प्रहरीको सम्पर्कमा आएका गिरीलाई नियन्त्रणमा लिई प्रहरीले सोमबार जिल्ला अदालतमा उपस्थित गराएका थिए । अदालतले बयान लिएपछि न्यायाधीश लामिछानेले धरौटीमा छाड्ने आदेश दिएको सूचना अधिकारी धमलाले बताए । गिरीकै घरमा बास्तोलाको पुस ४ गते राती हत्या भएको थियो ।

जिल्ला प्रहरी मोरङका प्रवक्ता प्रहरी नायब उपरीक्षक मानबहादुर राई गिरी आफैं प्रहरीको सम्पर्कमा आएपछि आइतबार नियन्त्रणमा लिएको बताए । उक्त घटनामा संलग्न रहेका अझै तीन जना फरार छन् । फरार रहेका उर्लाबारी ६ का राजेश रणपहेली, सुदीप परियार र दीपेश पौडेलको खोजी कार्य भइरहेको र उनीहरु पनि चाँडै पक्राउ पर्ने राईको भनाई थियो ।

उक्त घटनाको सत्यतथ्य लुकाएर दोषीलाई उन्मुक्ति दिने षडयन्त्र गरेको भन्दै परिवारजन विरोधमा उत्रेपछि प्रहरीले गत मंगलबार ६ जनाविरुद्ध जिल्ला अदालत मोरङमा कर्तव्य ज्यान मुद्दा दर्ता गराएको छ । प्रहरीले मिसिलसाथ उपस्थित गराएका उर्लाबारी-६ का रिकेश शिवा भन्ने मेहरमान दर्जीलाई पूर्पक्षका लागि थुनामा राख्न र होटल सञ्चालक कुमार राईलाई ३ लाख धरौटीमा छाड्ने जिल्ला न्यायाधीश लामिछानेको इजलासले बिहीबार आदेश दिएको थियो ।

प्रकाशित : फाल्गुन १७, २०७७ १८:२०
पूरा पढ्नुहोस्
प्रतिक्रिया
पठाउनुहोस्
×