पोखरामा अल्ट्रालाइट सञ्‍चालन - गण्डकी - कान्तिपुर समाचार
कान्तिपुर वेबसाईट
AdvertisementAdvertisement

पोखरामा अल्ट्रालाइट सञ्‍चालन 

प्रतीक्षा काफ्ले

गण्डकी — पोखरामा कोरोना भाइरस महामारीका कारण ८ महिनादेखि बन्द रहेको साहसिक खेल 'अल्ट्रालाइट' सञ्‍चालनमा आएको छ । 

लकडाउनका कारण लामो समयसम्म बन्द गरिएको अल्ट्रालाइट एक हप्तादेखि सञ्चालन भइरहेको छ । पर्यटनलाई चलायमान बनाउने उद्देश्यले विशेष सहुलियत दिएर अल्ट्रालाइट सञ्चालन गरिएको पोखरा अल्ट्रालाइटका संचालक पोमनारायण श्रेष्ठले बताए । उनका अनुसार ७ हजार शुल्क लिइने अल्ट्रालाइटले हाल ५५ सय रुपैयाँमा उडान गरिरहेको छ ।

अल्ट्रालाइटले एक पटकमा १५ मिनेटमात्रै उडान गर्ने संचालक श्रेष्ठले बताए । ‘पोखराको पर्यटन सुस्ताएपछि कसरी चलायमान गर्न सकिन्छ भनेर विशेष सहुलियतको व्यवस्था गरिएको छ’, उनले भने, ‘एक हप्तादेखि सुरु गर्‍यौं तर पर्यटक खासै आएका छैनन् । फाटफुटमात्र चलेको छ ।’ उनले दिनमा चार पटकसम्म उडान गरिएको जानकारी दिए । पोखरामा जम्मा चारवटा मात्रै अल्ट्रालाइट छन् । चारवटा अल्ट्रालाइट दिनमा एक/एकपटक मात्र उडान गरिएको कम्पनीले बताएको छ । स्वास्थ्य मापदण्डलाई ध्यान दिएर उडान गरिएको कम्पनीले जनाएको छ ।

पोखरा विमानस्थलबाट उडान गरिने अल्ट्रालाइट सोही ठाउँमा ल्याएर अवतरण गरिन्छ ।

यसभन्दा अघि प्याराग्लाइडिङ कम्पनीले पनि साविक दरमा ५० प्रतिशत छुट दिएर उडान सुरु गरेपछि अहिले भीड बढेको छ ।

केही दिनअघि मात्रै अल्ट्रालाइट उडान गरेका पोखराका मौसम पराजुलीले पोखराको खुलेको मौसममा अल्ट्रालाइटबाट दृश्यावलोकन गर्दा निकै आनन्द भएको बताउँछन् । उनले भने, ‘अल्ट्रालाइट उडान गर्ने ठूलो इच्छा थियो अहिले पूरा भयो’, उनले भने, ‘उडौला भन्दाभन्दै लकडाउन सुरु भयो । अल्ट्रालाइट बन्द गरिएको रहेछ । अहिले खुलेपछि उडान गर्ने मौका मिल्यो ।’

प्रकाशित : मंसिर ३, २०७७ १६:०३
प्रतिक्रिया
पठाउनुहोस्

दाहालको प्रस्तावविरुद्ध ओलीको पनि ‘काउन्टर’ प्रस्ताव आउने

कान्तिपुर संवाददाता

काठमाडौँ — आफूमाथि गम्भीर आरोपसहित नेकपाका कार्यकारी अध्यक्ष पुष्पकमल दाहालले पार्टी सचिवालयमा राजनीतिक प्रस्ताव पेश गरेपछि प्रधानमन्त्री एवं पार्टी अध्यक्ष केपी शर्मा ओलीले पनि जवाफी प्रस्ताव पेश गर्ने भएका छन् ।

बुधबार दिउँसो बालुवाटारमा बसेको नेकपाको सचिवालय बैठकमा ओलीले आफूले पनि प्रस्ताव पेश गर्ने जानकारी दिएका थिए ।

अध्यक्ष ओलीलेसमेत सचिवालयमा छुट्टै प्रस्ताव पेश गर्ने जानकारी दिएपछि १० दिनसम्म बैठक स्थगित भएको प्रवक्ता नारायणकाजी श्रेष्ठले बताए । श्रेष्ठका अनुसार मंसिर १३ मा बस्ने बैठकमा ओलीको प्रस्तावसहित यसअघि सचिवालयमा पेश भएको कार्यकारी अध्यक्ष दाहालको प्रस्ताव र अन्य पत्रहरुबारे छलफल हुने भएको छ ।

कात्तिक २८ को सचिवालय बैठकमा कार्यकारी अध्यक्ष दाहालले बुहमत सदस्यको समर्थनमा १९ पेज लामो प्रस्ताव पेश गरेका थिए ।

प्रस्तावमा पार्टी र सरकार सञ्चालनमा ओली असफल रहेको दाबीसहित निकासका लागि उनले त्याग गर्न माग गरेका छन् । दाहालले एकलौटी ढंगले गम्भीर आरोपसहित प्रस्ताव पेश गरेको भन्दै ओलीले उक्त प्रस्ताव फिर्ता लिन अडान राखेका थिए । तर, दाहाल प्रस्ताव फिर्ता लिन तयार नभएपछि ओलीले पनि आफ्नो काउन्टर प्रस्ताव सचिवालयमा पेश गर्ने भएका हुन् ।

दाहालको प्रस्तावलाई ओलीसमूहले आरोपपत्रको रुपमा लिएको छ । ओलीले मंगलबार साँझसम्म दाहालले पेश गरेको प्रस्ताव फिर्ता लिन र बुधबारका लागि तय भएको सचिवालय बैठक सार्न आग्रह गरेका थिए ।

तर, बैठक सार्न र प्रस्ताव फिर्ता लिन दाहाल–नेपाल समूह तयार नभएपछि ओलीमाथि दबाब परेको थियो ।

दाहालले पेश गरेको प्रस्तावमा ओलीको राष्ट्रवाद नक्कली भएको, यति होल्डिङ्सदेखि ओम्नी समूहसम्म साँठगाँठ गरेको, बजेटअघि राजस्वको दर रेट सम्बन्धी सूचना चुहाएको, एमसीसीमा पार्टीलाई ढाँटेको, समकक्षी नेताहरूलाई विभिन्न लोभ, प्रलोभन देखाउने गरेको, व्यक्तिवादी प्रवृत्ति हावी भएको, संघीयता विरोधी गतिविधि गरेको, पार्टी विभाजनको कोसिस गरेको आरोप लगाएका छन् ।

पार्टी स्थायी कमिटीले गरेका निर्णय कार्यान्वयन नहुनुमा प्रधानमन्त्रीसमेत रहेका ओली नै जिम्मेवार रहेको तथा पार्टी र सरकारलाई विधिसम्मत सञ्चालनको निर्णयको अवज्ञा गरेको पनि प्रस्तावमा आरोप छ । तर, यसलाई ओली समूहले भने अस्वीकार गरेको छ ।

प्रकाशित : मंसिर ३, २०७७ १५:२७
पूरा पढ्नुहोस्
प्रतिक्रिया
पठाउनुहोस्
×