म्याग्दीमा होटल व्यवसाय बन्द हुँदा एक हजारभन्दा बढीले रोजगारी गुमाए- गण्डकी - कान्तिपुर समाचार

म्याग्दीमा होटल व्यवसाय बन्द हुँदा एक हजारभन्दा बढीले रोजगारी गुमाए

घनश्याम खड्का

म्याग्दी — लामो समयको लकडाउनले व्यवसाय बन्द भएर घरभाडा तिर्न नसकेपछि व्यवसायी पेसाबाट पलायन हुन थालेका छन् । जिल्लामा साना–ठूला होटल तथा रेस्टुरेन्टमा कार्यरत एक हजारभन्दा बढी मजदुरले रोजगारी गुमाएको होटल व्यवसायी संघले जनाएको छ । 


संघका अनुसार म्याग्दीका ३ सय ५० भन्दा बढी रेस्टुरेन्ट, होटल तथा लजमा १ अर्बभन्दा बढी लगानीे छ । अहिले खुलेका सबै होटल, रेस्टुरेन्ट स्वरोजगारमूलक शैलीमा चलेका छन् ।

‘लामो समयदेखिको लकडाउनका कारण होटल तथा रेस्टुरेन्ट बन्द हुँदा घरभाडा तिर्न नसकेर बेनीका मात्र १५ भन्दा बढी व्यवसायी पलायन भए । आफ्नै घरमा होटल चलाएका बाहेक अरुलाई व्यवसायमा टिक्न समस्या भएको छ,’ संघ अध्यक्ष बाबुराम आचार्यले भने, ‘व्यवसाय नै बन्द गरी व्यवसायी पलायन भएपछि कार्यरत मजदुरले रोजगारी गुमाएका छन् ।’

लकडाउन खुकुलो भइसक्दा पनि कोरोना संक्रमण समुदायमै फैलिएपछि बजारमा मानिसको चहलपहल छैन । होटल–रेस्टुरेन्टमा खाजा, खाना खान पहिलेजस्तो ग्राहक आउँदैनन् । बाह्य पर्यटकमा निर्भर रहेका घोडेपानी, महरे, चित्रे, तातोपानीलगायत स्थानका होटल तथा लज अझै खुलेका छैनन् । घोडेपानी/पुनहिल क्षेत्रमा तिहारअघि पर्यटकलाई प्रवेशमा रोक लगाइएको छ ।

महँगो भाडा तिरिरहेका होटल व्यवसायी घरबेटीले कम्तीमा एक महिनाको घरभाडा छुट दिँदा पनि थेग्न नसकेपछि व्यवसायबाटै पलायन भइरहेको होटल व्यवसायी संघले जनाएको छ । केही व्यवसायी होटलका सामान नै घरबेटीलाई बुझाएर हिँडेका छन् ।

संघका अनुसार कम्तीमा १२ होटल व्यवसायी घरभाडा बुझाउने विकल्प नभएको भन्दै पेसाबाट पलायन भएका छन् ।

संघले गत सोमबार होटल तथा रेस्टुरेन्टलाई धितो मानेर बैंक/वित्तीय संस्थाबाट कर्जा व्यवस्था, पानी, बिजुली, इन्टरनेटमा लकडाउन अवधिको छुट, घरधनीको कर्जाको ब्याजमा छुट र बैंकको ब्याज तथा साँवा गाभेर कम्तीमा २ वर्ष भाका बढाउने व्यवस्था मिलाइदिन’ जिल्ला प्रशासन कार्यालयलाई ज्ञापनपत्र बुझाएको छ ।

प्रकाशित : कार्तिक ८, २०७७ १२:०८
प्रतिक्रिया
पठाउनुहोस्

आएनन् तिब्बती च्यांग्रा

माग बढ्यो, उत्पादन कम भयो, जसकारण बजारमा मूल्य अकासिएको छ
घनश्याम खड्का

म्याग्दी — दसैं सँघारमा छ । यो पर्वलाई लक्ष्य गरी मुस्ताङबाट बर्सेनि भेडाच्यांग्रा बागलुङ, पर्वत, कास्कीलगायत जिल्लामा ल्याइन्थ्यो । पछिल्लो समय काठमाडौं, चितवन, बुटवललगायत क्षेत्रमा पनि लैजान सुरु भएको थियो ।

यस पटक भने च्यांग्रा निकै कम मात्रामा झरेका छन् । यसले मूल्य अकासिएको छ । आपूर्ति घटेपछि बढी मूल्य हुँदा सामान्य परिवारले मुस्ताङी च्यांग्राको मासु खान नसक्ने अवस्था आएको छ । च्यांग्राको मासु नखाएसम्म दसैं खल्लो हुने सर्वसाधारणको गुनासो छ । मुस्ताङको च्यांग्रासमेत हेर्ने प्रधानमन्त्री कृषि आधुनिकीकरण परियोजनाको अभिलेखअनुसार यो वर्ष मुस्ताङबाट दसैं बजार लक्षित गरी जम्मा ६ हजार २ सय खसी जिल्लाबाहिर गएका छन् ।

संघ तथा प्रदेश सरकारले परियोजनालाई दसैं लक्षित बजार पठाइने च्यांग्राको क्वारेन्टाइन (स्वास्थ्य परीक्षण) गर्ने जिम्मेवारी दिएको छ । ‘बजार लैजान लागिएका खसीको ज्वरो, झोक्राउने, खाना नखाने, छेरौटे लागेकोलगायत रोग लागे/नलागेको परीक्षण गरी पठाउने गरेका छौं,’ परियोजना प्रमुख समीर थापाले भने, ‘यो वर्ष ६ हजार २ सय खसी हाम्रो चेकपोस्टमा अभिलेख गरी तल लगिएको छ । सबै च्यांग्रा यहाँ रहँदा स्वस्थ्य छन् ।’ यसअघि पोखरामा मात्रै ३० हजार हाराहारीमा च्यांग्रा लगिन्थ्यो । मुस्ताङको लोमन्थाङ, लोघेकर दामोदरकुण्ड र बाह्रगाउँ मुक्तिक्षेत्र गाउँपालिकामा च्यांग्रा पाल्ने गरिन्छ । यो वर्ष लोमान्थाङबाट २ हजार र लोघेकर दामोदरकुण्डबाट १५ सयको हाराहारीमा च्यांग्रा तल झारिएको छ । दसैंमा मुस्ताङबाहेक डोल्पाको छर्काभोट, मुगुबाट केही र तिब्बतको कोरला नाकाबाट धेरै खसी ल्याउने गरिन्थ्यो । पहिलापहिला तिब्बतीहरू आफैंले खसी लिएर बेच्न आउँथे । पछिल्ला वर्ष लोमन्थाङ क्षेत्रका व्यापारीले तिब्बती च्यांग्रा एकमुष्ट खरिद गरी ल्याउने गर्न थालेका थिए ।

कोरोना महामारीका कारण कोरला नाका सिल हुँदा तिब्बतबाट एउटै च्यांग्रा नआएको, मुगु र डोल्पाली पनि च्यांग्रा कम भित्रिएको र मुस्ताङमा उत्पादन ह्वात्तै घटेकाले यस पटक कम भएका हुन् । अघिल्लो वर्ष डोल्पाबाट ३ हजार र कोरला नाकाबाट १० हजार तिब्बती च्यांग्रा भित्रिएका थिए । दुई वर्षअघि लामो समयसम्म अधिक भारी हिमपातमा पुरिएर उपल्लो मुस्ताङमा आठ हजारभन्दा बढी भेडाच्यांग्रा मरेका कारण यो वर्ष उत्पादन घटेको लोमन्थाङ र लोघेकर दामोदरकुण्ड गाउँपालिकाले जनाएका छन् ।

प्रकाशित : आश्विन ३०, २०७७ ०७:००
पूरा पढ्नुहोस्
प्रतिक्रिया
पठाउनुहोस्
×