बागलुङको कालिका मन्दिर सुनसान- गण्डकी - कान्तिपुर समाचार
कान्तिपुर वेबसाईट
AdvertisementAdvertisement

बागलुङको कालिका मन्दिर सुनसान

प्रकाश बराल

बागलुङ — गृह मन्त्रालयको निर्देशन भन्दै जिल्ला प्रशासन कार्यालय बागलुङले मठमन्दिरमा निशेधाज्ञा लगाएपछि घटस्थापनाको दिन बागलुङ कालिका मन्दिर सुनसान भएको छ ।

कोरोना संक्रमण समुदाय स्तरमा पुगेको भन्दै प्रशासनले शनिबारदेखि लागू हुने गरी दसैंको अष्टमीसम्म मठमन्दिरमा निशेधाज्ञा लगाएको छ । अन्यत्र भने निशेधाज्ञा लगाइएको छैन । बजार क्षेत्रमा नियमित सवारी, पसल र व्यवसाय सञ्चालनमा छ ।

लकडाउन खुकुलो भएपछि मन्दिरमा दैनिक पूजापाठ सञ्चालनमा थियो । दसैंकालागि सरसफाइ, पूजा व्यस्थापन र दूरी कायम गरेर पूजा गराउने तयारी गरिसकेपछि निशेधाज्ञा लगाइएको हो । प्रशासनले शुक्रबार बेलुकी जारी गरेको निशेधाज्ञा कालिका मन्दिरलाई लक्षित गरिएको एक पूजारीले बताए ।

मन्दिरमा सयौं मानिसले पूजा गर्थे भने दर्जनौं बली चढाइन्थ्यो । मन्दिरमा छिमेकी जिल्ला र चितवन, पोखरा लगायतका स्थानबाट समेत भक्तजन आउथे । घण्टौं लाइन बसेर मात्र पूजा गर्न सकिने अवस्था भएको स्थानमा पहिलो पटक सुनसान देखेको बागलुङ उद्योग वाणिज्य संघका सदस्य गणेश लम्सालले बताए ।

बागलुङ कालिका भगवती गुठी व्यवस्थापन समितिसँग सामान्य सोधपुछ पनि नगरी मन्दिर लक्षित निशेधाज्ञा लगाइएको अध्यक्ष राजु खड्काले बताए । ‘हिजो तयारी गरेर गयौं, बिहान मन्दिर आउँदा गेटमा बार लगाइएको छ, प्रहरी र सशस्त्र लगाएर रोकिएको छ,’ खड्काले भने, ‘सयौं मानिस गेटमा आएर ल्याएको फूल प्रसाद चढाएर फर्केका छन् ।’ मन्दिर आसपासका पसल समेत बन्द गराइएको उनले बताए ।


मन्दिरमा पूजाका लागि आएकी पर्वतको पाङकी यमुना सुवेदीले मन्दिरको गेटमै रोकिएपछि फूल प्रसाद छाडेर फर्केको बताइन् । ‘वर्षौंदेखि मन्दिरमा दर्शनका लागि आउने गरेकी थिएँ,’ उनले भनिन्, ‘पहिलो पटक मन्दिर जान नपाएर फर्कन बाध्य भएँ ।’ शुक्रबारसम्म नियमित भक्तजन गएकोमा शनिबारबाटै बन्द गर्दा अस्थामा चोट लागेको उनले टिप्पणी गरिन् ।

दसैं र चैते दसैंमा बागलुङ कालिका मन्दिरमा सयौं भक्तजन आउने गर्छन् । अघिल्लो वर्षको दसैंमा ६ लाख वटा नरिवल चढेको समितिले रेकर्ड राखेको थियो । ‘सबैले चढाएनन्, कोही दोहोरिएर आए होला, तर १५ दिनमा ६ लाख भक्तजन आएको अनुमान गरेका थियौं,’ खड्काले भने, ‘भेटी व्यवस्थाबाट संरचना सुधार पनि गरिएको छ ।’ मन्दिर आसपासमा झण्डै १० करोडको संरचना बनाइएको उनले बताए । अधिकांश लगानी भेटीबाटै भएको हो ।

मन्दिरमा नियमित पूजा, घटस्थापना र जमरा राख्‍ने काम भने गरिने पूजारी गोपीनाथ उपाध्यायले बताए । ‘पाँचसय वर्षदेखि गरिएको संस्कार त हामीले छाड्ने कुरा भएन,’ उपाध्यायले भने, ‘आम मानिसको आस्था मर्न नदिनका लागि सबैको प्रतिनिधित्व गरेर पूजा गरेका छौं ।’ गेटमा चढाइएका फूल प्रसादपनि मन्दिरमा ल्याउने व्यवस्था गरिएको उनले बताए ।

प्रकाशित : कार्तिक १, २०७७ १५:११
प्रतिक्रिया
पठाउनुहोस्

पुच्छरहीन

विश्‍व सिग्देल

म निस्कँदा घरबाट छिँडीको कुकुरले यस्तरी पुच्छर हल्लायोकि हल्लँदै छन् विजय पताकामहान् योद्धाको जितमा

म सिकन्दर

मुस्कुराएँ

सोचेँ,

यो मेरो रोटीको टुक्रामा बाँच्छ

सक्दो हो त

जसरी हल्लाउँछ सारा घर,

यो हल्लाउँदो हो

गल्ली, टोल र सडक


घरबाहिर

टोलको गल्लीमा

उसैगरी हल्लायो पुच्छर

घरविहीन एउटा कुकुरले

जो यदाकदा

म मातिएर घरमा आउँदा

पाउँथ्यो केही टुक्रा सुँगुरको बोसो,

कुखुराको खुट्टा वा खसीको आन्द्राभुँडी

म चंगेज खान

मुस्कुराएँ

सोचेँ,

यो मेरो रोटीको टुक्राको आशामा बाँच्छ

सक्दो हो त पुच्छरको साटो

यो हल्लाउँदो हो

सहर, देश र समग्र विश्व

पुच्छरको साटो


विरानो ठाउँमा

मेरो ठाँट, रवाफ र अत्तरले लटपटिएर

केही कुकुरहरूले यसरी पुच्छर हल्लाए

कि हल्लाउँदै छन्

पिटिएर समर्थनमा

साराका सारा संसद्का टेबलहरू

म महान् सम्राट् अशोक

मुस्कुराएँ

सोचेँ

यी मेरा रोटीका टुक्राका आशीर्वादका भोका

सक्दा हुन् त

पुच्छरको साटो

यी हल्लाउने थिए निकालेर आफ्नो मगज

जसरी हल्लाइरहेछन् अहिले आफ्ना

विश्वविद्यालयका शैक्षिक प्रमाणपत्रहरू

एक एक इमान, जमान र जिब्रोलाई

राखेर हातमा

यी तैयार देखिएका छन् मोहर राखेर

मेरा खुट्टामा भेटी चढाई ढोग गर्न


म निस्केर गन्तव्यमा पुग्दा

कुकुरको पुच्छर हल्लाउने लामभन्दा लामो लाम

र त्यो लामको पुच्छरमा आफूलाई पाएर

विस्मित छु


सत्यले कुनै सम्बन्ध राख्दैन मेरो विस्मयसँग

सत्य त यो हो

यो हाम्रो युग

पुच्छर नभएका कुकुरको युग भएको छ ?

प्रकाशित : कार्तिक १, २०७७ १४:५६
पूरा पढ्नुहोस्
प्रतिक्रिया
पठाउनुहोस्
×