घान्द्रुकबासीको निर्णय– टीका थाप्न बाहिर नजाने, अरूलाई पनि आउन नदिने- गण्डकी - कान्तिपुर समाचार
कान्तिपुर वेबसाईट
AdvertisementAdvertisement

घान्द्रुकबासीको निर्णय– टीका थाप्न बाहिर नजाने, अरूलाई पनि आउन नदिने

लालप्रसाद शर्मा

पोखरा — गत चैतमा सरकारले लकडाउन गरेदेखि नै बाहिरी व्यक्तिलाई गाउँ प्रवेशमा रोक लगाएका घान्द्रुकबासीले दसैंतिहारजस्ता चाडपर्व घरमै मात्र मनाउने निर्णय गरेका छन् । घान्द्रुक पर्यटन समितिको बिहीबारको बैठकले आफूहरू टीका थाप्न बाहिर नजाने र बाहिरबाट पनि कसैलाई नआउन भनेको हो ।

‘हामी मावली, ससुराली पनि टीका थाप्न नजाने,’ समितिका अध्यक्ष किसम गुरुङले भने, ‘भान्जाभान्जी, छोरीज्वाइँ कसैलाई पनि नआउन भनिएको छ ।’ बिरामी र अन्य अत्यावश्यक कामबाहेक पोखरासमेत नजाने बैठकको निर्णय छ । अध्यक्ष गुरुङका अनुसार समितिको निर्णयलाई घान्द्रुकका सबै टोलमा पुगेर जानकारी गराउने अभियान थालिसकिएको छ । बिहीबारमात्रै दुई टोलमा यो अभियान सकिएको छ । ‘घान्द्रुकमा अहिलेसम्म कोरोना छैन,’ उनले भने, ‘बाहिरी व्यक्ति (आफन्त र इष्टमित्रसमेत) लाई प्रवेश दिइयो भने फैलने डर भयो । त्यसैले रोक लगाउन यस्तो निर्णय गरेका हौं ।’

स्थानीय व्यवसायी कृष्ण गुरुङका अनुसार दसैंका बेला आफन्तलाई पनि नबोलाउने निर्णय भएको छ । ‘आफन्तबाट पनि कोरोना गाउँमा भित्रिन सक्ने अवस्था रह्यो,’ उनले भने, ‘यसअघिको गाउँमा कसैलाई पनि प्रवेश गर्न नदिने निर्णयलाई निरन्तरता दिएर यस्तो अभियानमा लागेका हौं ।’ साबिकको घान्द्रुक गाविस अहिले अन्नपूर्ण गाउँपालिकाको १० र ११ नम्बर वडामा पर्छ ।

कोरोना संक्रमण कम नभएको भन्दै असोज पहिलो दिनदेखि नै होटल नखोल्ने निर्णय पर्यटन व्यवसायीले गरेका थिए । उक्त निर्णयलाई बिहीबारको बैठकले पनि अनिश्चित कालसम्मलाई निरन्तरता दिएको छ । कोरोनाको महामारी नसकिएको र तत्काल होटल र होमस्टे सञ्चालन गर्दा गाउँमा कोरोना भित्रन सक्ने सम्भावना देखिएको समिति अध्यक्ष गुरुङले बताए । पैसाभन्दा पनि ज्यान ठूलो भएकाले सबै व्यवसायीको ठहरपछि होटल सञ्चालनमा नल्याउने निर्णय गरिएको उनको भनाइ छ । भोलि कोरोना कम भएको महसुस भएमात्रै होटल, रेस्टुरेन्ट खोल्ने उनले जनाए ।

पदयात्रा पर्यटनका लागि उपयुक्त अन्नपूर्ण आधार शिविर, घोरेपानी–पुनहिल पुग्न घान्द्रुक हुँदै जानुपर्छ । स्याउलीबजारदेखि मुख्य गाउँ घान्द्रुकसम्मका पाँच दर्जन होटल र केही होमस्टे सञ्चालनमा थिए । गाउँ प्रवेश गर्ने नाका सादीखोलामा स्थानीय युवा क्लबका सदस्य राखेर दैनिक निगरानी हुने गरेको छ । बाहिरबाट जानेलाई ती युवाले रोकिदिन्छन् । ‘दैनिक ३/४ युवा सीमामा खटिन्छन्,’ व्यवसायी कृष्ण गुरुङले भने, ‘यो अरू केही नभएर कोरोनाबाट गाउँ जोगाउने उद्देश्य मात्र हो ।’

प्रकाशित : आश्विन ३०, २०७७ १३:३७
प्रतिक्रिया
पठाउनुहोस्

बलात्कार र दलितमाथिको दमन रोक्न प्रहरीको सक्रियता आवश्यक : मुख्यमन्त्री राउत

सन्तोष सिंह

जनकपुर — प्रदेश २ का मुख्यमन्त्री लालबाबु राउतले बालिका बलात्कार र दलितमाथि भएको दमन रोक्न प्रहरी सक्रिय हुनुपर्ने बताएका छन् । प्रदेश २ मा बलात्कारसहित अन्य आपराधिक घटना मौलाएको उल्लेख गर्दै मुख्यमन्त्री राउतले प्रहरीले अपराधीको मानसिकता नै परिवर्तन गर्ने समय आएको बताए । 

‘अपराध गर्नेको मनोबल बढेकोले अपराध गर्नेलाई कसरी दण्ड दिने तर्फ प्रहरी लाग्ने समय आएको छ,’ मुख्यमन्त्री राउतले भने, ‘ बलात्कार र दलितमाथि हिंसा बढेकोले अपराध न्यूनीकरण गर्न रणनीति बनाएर प्रहरीलाई अगाडि बढ्न प्रदेश सरकारले समन्वय गर्ने छ ।’

प्रदेश प्रहरी कार्यालयले आयोजना गरेको ६५औं नेपाल प्रहरी दिवसको अवसरमा शुभकामना दिँदै मुख्यमन्त्री राउतले ‘प्रहरी मेरो साथी’को नारालाई यथार्थमा रुपान्तरण गर्न प्रहरी नागरिकमैत्री हुनु पर्ने बताए । मुलुकको शान्ति सुरक्षामा महत्वपूर्ण भूमिका निर्वाह गर्दै आएको नेपाल प्रहरी जनतासँगको सुमधुर सम्बन्ध कायम गरे मात्र ‘प्रहरी मेरो साथी’ भन्ने नारा यथार्थमा रुपान्तरण हुने राउतले बताए ।

‘प्रदेश २ का जिल्लाहरु भारतीय सीमासँग जोडिएकोले अपराधसँगै तस्करीको समस्या छ,’ राउतले भने, ‘सिमानामा प्रहरीको भूमिकामाथि प्रश्न उठेको छ । प्रहरीले तस्करीको नाममा समान्य व्यक्तिलाई समेत दु:ख दिएको छ ।’ तस्कर र बिचौलियालाई कारबाही गरी सामान्य नागरिकलाई सहुलियत दिएर सिमानामा प्रहरीको भूमिका परिवर्तन गनुपर्ने राउतले बताए ।

स्रोतसाधनको अभावमा पनि जनताको जी धनको सुरक्षामा अहोरात्र खटिँदै आएको प्रहरीको प्रशंसा गर्दै मुख्यमन्त्री राउतले अपराधका प्रकृतिहरु फरक हुँदै गएको अवस्थामा अपराध नियन्त्रण गर्न प्रहरीलाई अत्याधुनिक स्रोतसाधनसम्पन्न बनाउन प्रदेश सरकार तयार रहेको बताए । ‘सबै ठाउँमा प्रहरी पुग्नै पर्ने तर सवारी अभाव छ,’ राउतले भने, ‘प्रहरी बस्ने घर र कार्यालयहरु अझै भत्केको अवस्थामा छ । प्रहरी बस्ने ठाउँ नै छैन । संरचना भत्किएको छ ।’ मुख्यमन्त्री राउतले भौतिक संरचना अभाव रहेको प्रहरीलाई प्रदेश सरकारले भरपुर सहयोग गर्ने प्रतिबद्धता जनाए ।

कार्यक्रममा उत्कृष्ट कार्य गर्ने प्रहरी अधिकृत, अमर तथा सहिद प्रहरीका परिवारजन, नेपाल प्रहरीलाई सहयोग गर्ने संघसंस्थाका प्रतिनिधिहरुलाई सम्मान गरिएको थियो ।

प्रकाशित : आश्विन ३०, २०७७ १३:३५
पूरा पढ्नुहोस्
प्रतिक्रिया
पठाउनुहोस्
×