बागलुङमा ३० सैनिकमा काेराेना पुष्टि

जिल्ला प्रहरी कार्यालयका दुई पुरुष, उच्च अदालत बागलुङ इजलासका २ कर्मचारी र १ जना थुनुवामा पनि कोरोना संक्रमण पुष्टि भएको हो । चार दिनअघि सेनाका २८ जनामा एकैपटक कोरोना संक्रमण देखिएको थियो । तित्याङस्थित तामाखानीमा काम गर्ने मजदुरमा कोरोना देखिएपछि सुरक्षार्थ गएका सैनिकको स्वाब परीक्षण गरिएको थियो । उनीहरुमा संक्रमण देखिएपछि सेनाको ब्यारेकमा परीक्षण थालिएको थियो । अहिलेसम्म सैनिक ब्यारेकमा मात्रै ६० बढीमा संक्रमण देखिएको हो ।

सैनिकहरुमा धेरै संक्रमण देखिएपछि २३ नम्बर बाहिनीमै ८० बेडको आइसोलेसन बनाइएको छ । ‘अस्पताल वा अन्य स्थानमा लैजानुभन्दा यही सुरक्षित बेड बनाएर राखेका छौं’ एक सैनिक अधिकारीले भने, ‘समुदायमा नपुगोस् भनेर उच्च सर्तकता पनि अपनाएका छौं ।’

प्रहरीमा यसअघि एक निरीक्षकलाई कोरोना संक्रमण देखिएको थियो । उनको सम्पर्कमा आएका अन्य दुई जनामा कोरोना पुष्टि भएको हो । प्रहरीका संक्रमित भने अस्पतालको आइसोलेसन जानेछन् । बागलुङ नगरपालिकाकै एक जनप्रतिनिधि र अर्का एक होटल व्यवसायीमा पनि संक्रमण पुष्टि भएको हो ।

अहिलेसम्म जिल्लामा ५ सय २५ जनामा कोरोना संक्रमण भइसकेको छ । तीमध्ये ३ सय ६७ जना निको भएका छन् । अझै १ सय ५७ जना आइसोलेसनमा रहेका छन् । संक्रमणको दर बढेपछि जिल्लाका दशवटै पालिकाले १०/१० वटा आइसोलेसन थप गरेका छन् । अहिलेसम्म जिल्लामा २ सय २० बेडको आइसोलेसन बनेको थियो ।