लमजुङमा एकैदिन ३० कोरोना संक्रमित निको
लमजुङ — लमजुङमा शुक्रबार एकैदिन ३० जनाले कोरोना जितेका छन् । यो सँगै कारोना संक्रमित निको हुनेको संख्या २ सय ६२ पुगेको छ । कोरोना निको हुनेमा महिला ४४ र पुरुष २ सय १८ छन् । शुक्रबार कोरोना निको भएकामा सुन्दरबजार नगरपालिका ९, सिउँडीबारस्थित नेपाली सेनाको कृषि तथा व्यवसायीक तालिम केन्द्रका ८ जना पुरुष छन् । उनीहरु नेपाली सेनाको आइसोलेसनमा थिए ।
यस्तै, लमजुङ कृषि क्याम्पस आइसोलेसनमा रहेका १७ जना पुरुष छन् । लमजुङ जिल्ला सामुदायिक अस्पतालमा रहेका १ जना पुरुष र ३ जना महिला गरी ४ जना साथै सहरी विकास कार्यालयको भवन आइसोलेसन सहजीमा रहेका १ जना पुरुष कोरोना निको भएको प्रमुख जिल्ला अधिकारी कृष्णप्रसाद शर्माले बताए ।
लमजुङका आइसोलेशनमा अब ३२ जना महिला र ५९ जना पुरुष गरी ९१ जना संक्रमित छन् । उनीहरु सबैको स्वास्थ्य अवस्था सामान्य रहेको स्वास्थ्य कार्यालय लमजुङका प्रमुख अमर दवाडीले बताए । लमजुङमा हालसम्म कोरोना संक्रमित ३ सय ५३ पुगेको छ ।
प्रकाशित : आश्विन ९, २०७७ १८:४१