कालिज फार्ममा पसेको चितुवालाई चितवन लगियो- गण्डकी - कान्तिपुर समाचार

कालिज फार्ममा पसेको चितुवालाई चितवन लगियो

घनश्याम खड्का

म्याग्दी — बेनी नगरपालिका–४ सिङ्गास्थित कालिज फार्ममा पसेको चितुवालाई चितवन राष्ट्रिय निकुञ्जबाट आएको टिमले शुक्रबार राति डार्टिङ (बन्दुकबाट सुई हानेर बेहोस बनाउने काम) गरी चितवन लगेको छ ।

हरियाली ग्रुपले पालेको ४ सय बढी चार महिना पुगेका कालिज फार्ममा पसेको चितुवा फलामे तारबार र नाइलन जालीबाट बाहिर निक्लन नसकेपछि चितवनबाट उद्धार टोली झिकाइ चितुवालाई बाहिर निकालिएको हो ।

‘शुक्रबार राति नै चितवनबाट उद्धार टोली आएर कालिज फार्म भित्र रहेको चितुवालाई राति नै आफैले लिएर गएका छन्,’ जिल्ला प्रहरी प्रमुख डिएसपी किरणजंग कुँवरले भने, ‘जिल्लामा हामीसँग समवन्य भएन ।’

तारजालीले भित्र रहेको चितुवा बाहिर निक्लन पटकपटक तारमा ठोक्किने र चिथोर्ने प्रयास गर्दा घाइते भएको थियो ।

‘चितवन निकुञ्ज अन्तर्गतको बाघ नियन्त्रण विभागबाट आएको उद्धार टोलीले राति ११ बजे फार्मभित्रको चितुवालाई आफैले लिएर गएका हुन्,’ हरियाली समूहका निर्देशक शेरबहादुर केसीले भने, ‘बिहान भर्खरैदेखि हामी फार्म भित्र छिरेर मरेका र जिउँदा कालिज गणना गर्न थालेका छौं । खुल्ला रुपमा छोडेका कालिज गन्न सजिलो छैन, कति खायो यकिन भएको छैन ।’

मीनबहादुर श्रेष्ठको अगुवाइमा स्थानीय कृषक र व्यवसायी मिलेर बेनी नगरपालिका, ४ सिङ्गामा १ सय ६० रोपनी जग्गा भाडामा लिएर हरियाली ग्रुपले करिब १० करोड लगानीमा व्यावसायिक तरकारी खेती, कालिज, कुखुरा, माछा, माहुरी पालन फार्म स्थापना गरेको हो ।

प्रकाशित : भाद्र २७, २०७७ ०८:२१
प्रतिक्रिया
पठाउनुहोस्

म्याग्दीको कालिज फार्ममा चितुवा पस्यो

घनश्याम खड्का

म्याग्दी — बेनी नगरपालिका, ४ सिङ्गा स्थित कालिज फार्ममा चितुवा पसेको छ । हरियाली ग्रुप प्रालिद्वारा सञ्चालित कालिज फार्ममा फलामे बार र नाइलन जालीबाटै चितुवा भित्र पसेको हो ।

चितुवा फार्मभित्रै बसिरहेकाले कति कालिज माऱ्यो भन्ने यकिन नभएको फार्म सञ्चालकले बताएका छन् । साथै चितुवा भित्रै रहेकाले वरपरका स्थानीय पनि त्रसित बनेका छन् ।

शुक्रबार बिहान फार्मका कर्मचारी चारो हाल्न भित्र जाँदा चितुवा देखेपछि भागेका थिए । दुई वटा कालिज फार्ममध्ये चल्ला भएको भागमा चितुवा पसेको हरियाली ग्रुपले जनाएको छ ।

भित्र रहेको चितुवा बाहिर निक्लन पटक–पटक तारमा ठोक्किने र चिथोर्ने प्रयास गर्दा घाइते नै भएको छ । तर बाहिर निक्लन सकेको छैन ।

‘कालिज फार्ममा पसेको चितुवालाई खोरमा थु्न्न सक्ने अवस्था छैन । बेहोस बनाउने डार्ट गन जिल्लामा छैन, मान्छेलाई आक्रमण नगरी गोली हान्न पनि मिलेन । उपायको खोजीमै छौं,’ जिल्ला प्रहरी प्रमुख किरण कुँवरले भने, ‘चितवन नेसनल पार्कबाट डार्ट गनसहित प्राविधिक ल्याई बेहोस बनाई बाहिर ल्याउन पनि कोरोनाले गर्दा अप्ठेरो भएको छ । दिनभर पर्खेर राति फार्ममा प्रवेश गर्ने मूल गेट खुल्ला राख्ने र सुरक्षित बाहिर निक्लने वातावरण बनाउने योजनामा छलफल चल्दैछ ।’

मीनबहादुर श्रेष्ठको अगुवाइमा स्थानीय कृषक र व्यवसायी मिलेर बेनी नगरपालिका, ४ सिङ्गामा १ सय ६० रोपनी जग्गा भाडामा लिएर हरियाली ग्रुपले करिब १० करोड लगानीमा व्यावसायिक तरकारी खेती, कालिज, कुखुरा, माछा, माहुरी पालन फार्म स्थापना गरेको हो ।

प्रकाशित : भाद्र २६, २०७७ १३:२४
पूरा पढ्नुहोस्
प्रतिक्रिया
पठाउनुहोस्
×