कांग्रेसद्वारा प्रदेशसभा बैठक अवरुद्ध

पोखरा — आफ्ना मागप्रति सरकारले बेवास्ता गरेको भन्दै गण्डकी प्रदेशसभामा प्रमुख प्रतीपक्षी कांग्रेसले आइतबारको बैठक अवरुद्ध गरेको छ ।

कांग्रेसद्वारा प्रदेशसभा बैठक अवरुद्ध

सभामुख नेत्रनाथ अधिकारीले बैठक सुरु गर्नसाथ कांग्रेस सांसद उठेका थिए । अधिकारीले संसद अवरोध गर्नुपर्ने कारणबारे कुरा राख्‍न कांग्रेस संसदीय दलका नेता कृष्णचन्द्र नेपालीलाई समय दिएका थिए ।

नेपालीलले आफूहरुले असार २३ मा दर्ता गरेको संकल्प प्रस्ताव बहुमतका आधारमा सरकारले अस्वीकृत गरेको भन्दै रोष व्यक्त गरे । संकल्प प्रस्तावमा एक घर एक पीसीआर परीक्षण गरिनुपर्ने, क्वारेन्टाइन विश्व स्वास्थ्य संगठनको मापदण्ड अनुसार हुनुपर्ने, आइसोलेसनको उचित व्यवस्थापन र कोरोनाबाट मृत्यु भएकाको शवको सहिरुपमा व्यवस्थापन हुनुपर्ने माग थिए । तर २२ गतेको सभाको बैठकले प्रस्तावलाई अस्वीकृत गरिदिएको थियो ।

‘कोरोनाको महामारीबाट प्रदेशलाई सुरक्षित राख्ने प्रस्ताव समसामयिक रुपमा ल्याएको भनेर प्रदेश सरकारले स्वागत गर्नुपर्नेमा प्रतीपक्षले ल्याएको भनेर बहुमतका आधारमा अस्वीकृत गरियो,’ नेपालीले भने, ‘आफूहरुले उठाएका यी माग यथावत छन । पुरा नभएसम्म प्रदेशसभा अघि बढ्न सक्दैन ।’

यसैगरी निर्वाचन क्षेत्र पूर्वाधार विकास कार्यक्रममा निर्वाचित र समानुपातिक सांसदलाई पक्षपात भएको भन्दै कांग्रेसले त्यसको कार्यविधि संशोधन गरी समान वितरणको व्यवस्था मिलाउन अनुरोध गरेको छ । माग पूरा नभएसम्म बैठक अवरुद्ध हुने उनले बताए ।

नेपाली बोलिसकेपछि सभामुख अधिकारीले अहिलेसम्म प्रदेशसभा सहमतिका आधारमा अघि बढेको भन्दै यो जारी रहने बताए । आइतबारको कार्यसूचीमा एउटा विधेयक मात्र रहेकाले यसलाई सहमतिकै आधारमा अघि बढाउनुपर्ने भन्दै तीन पटकसम्म विशेष सहयोगसहित अनुरोध गरे पनि कांग्रेस सांसद उठिरहेपछि बैठक आधा घन्टाका लागि स्थगित गरेका थिए ।

आइतबार गण्डकी प्रदेशमा खेलकुदको विकास गर्ने सम्बन्धमा व्यवस्था गर्न बनेको विधेयक टेबुल हुँदै थियो । यसैगरी शून्य र विशेष समयमा सांसदले बोल्ने र दुई मन्त्रीले जवाफ दिने कार्यसूचीमा थियो ।

प्रकाशित : श्रावण ३२, २०७७ १४:२२
प्रतिक्रिया
पठाउनुहोस्
जनताको राय

अध्यादेशबाट कानुन ल्याएर भएपनि सहकारीपीडितको रकम फिर्ता गर्ने गृहमन्त्री रवि लामिछानेको भनाईप्रति तपाईं के टिप्पणी छ ?